'மைனா' படப் புகழ் பிரபு சாலமனுக்கு வழியில கிடக்கிற கண்ணாடிக் கல்லே வைரமா மாறி இவர் பாக்கெட்டுல விழுற அளவுக்கு அதிர்ஷ்டம் கொட்டிக்கிடக்கிறது. பிரபு சாலமன் தன்னுடைய அடுத்த படத்தில் நடிகர் ஆர்யாவை வைத்து இயக்குகிறார். 'மைனா' படத்தின் மூலம் புகழின் உச்சிக்கு சென்றவர் டைரக்டர் பிரபு சாலமன். கடந்த ஆண்டு வெளிவந்த படங்களில் சத்தமில்லாமல் 100நாட்கள் ஓடி வெற்றி பெற்றுள்ளது 'மைனா'. இந்த வெற்றியை பிரமாண்டமாக விழா எடுத்து கொண்டாட வேண்டும் என்று படக்குழுவினர் கருதுகின்றனர். ஆனால் பிரபு சாலமனோ அதெல்லாம் வேண்டாம் என்று கூறிவிட்டு, தன்னுடைய அடுத்த படத்திற்கான வேலையை தெடங்கிவிட்டார். பிரபு சாலமன் தன்னுடைய அடுத்த படத்தில் 'மைனா' படத்தில் நடித்த விதார்த்தை வைத்து எடுக்க திட்டமிட்டு இருந்தார். இப்படத்தை டைரக்டர் லிங்குசாமி தயாரிக்க இருக்கிறார். ஆனால் விதார்த்தே ஏ.வி.எம்.ன் 'முதல் இடம்' படத்தில் பிஸியாகி விட்டார். இதனால் இந்தபடத்தில் இருந்து அவர் தூக்கப்பட்டுள்ளார். அதேசமயம் லிங்குசாமி, டைரக்டர் மிஷ்கின் இயக்கத்தில், ஆர்யாவை வைத்து ஒரு படம் பண்ணுவதாக இருந்தது. இதற்கு ஆர்யாவும் சம்மதம் தெரிவித்து இருந்தார். ஆனால் சில பிரச்சினைகள் காரணமாக இந்தபடம் கைவிடப்பட்டது. இந்நிலையில் ஆர்யாவிடம் பெற்ற வாய்ப்பை நழுவ விடக்கூடாது என்பதற்காக, அவரிடம் சென்று நடந்தவைகளை கூறி, பிரபு சாலமன் படத்தில் நடிக்க கேட்டுள்ளார் லிங்குசாமி. இதற்கு ஆர்யாவும் ஓ.கே. சொல்லியிருக்கிறார். இதனையடுத்து பிரபு சாலமன் இயக்கும் படத்தில் விதார்த்திற்கு பதிலாக ஆர்யா நடிக்க இருக்கிறார். விரைவில் இதற்கான அதிகாரப்பூர்வமான அறிவிப்பு வெளியிடப்பட இருக்கிறது.