திருச்சி கலைக்காவிரி நுண்கலை கல்லூரியில் பயின்று வரும் கன்னியாஸ்திரி ப்ளாரன்ஸ் மேரியை வன்புணர்ந்ததாகப் பாலியல் புகார் கூறப்பட்டுள்ள, திருச்சி தூய வளனார் கல்லூரி முதல்வர் பாதிரியார் ராஜரத்தினத்தைக் கைது செய்யக்கோரி பாமக மற்றும் மக்கள் கலை இலக்கியக் கழகத்தினர் ஆர்ப்பாட்டம் நடத்தத் திட்டமிட்டுள்ளனர்.
திருச்சி தூய வளனார் கல்லூரியில் முதல்வராக இருப்பவர் ராஜரத்தினம். இவர் மீது, திருச்சி கலைக்காவிரி நுண்கலை கல்லூரியில் பயிலும் அரியலூர் மாவட்டம், ஆண்டிமடம் பகுதியைச் சேர்ந்த கன்னியாஸ்திரி ப்ளாரன்ஸ் மேரி (28), திருச்சி கோட்டை மகளிர் காவல்நிலையத்தில் தன்னை வன்புணர்ந்ததாகப் பாலியல் புகார் கொடுத்தார்.
அவரளித்தப் புகார் மனுவில், "கடந்த 2006ம் ஆண்டு முதல், திருச்சி கலைக்காவிரி நுண்கலை கல்லூரியில், இசையில் இளங்கலை பட்டப்படிப்பு படித்து வந்தேன். தூய வளனார் கல்லூரியின் முதல்வர் ராஜரத்தினம், அந்தக் கல்லூரிக்கு அடிக்கடி வந்தபோது, எங்களுக்குள் பழக்கம் ஏற்பட்டது. பழக்கத்தின் அடிப்படையில் 2006 ஜனவரி 22ம் தேதி, ராஜரத்தினத்தைத் தனியாக சந்தித்தபோது, குளிர்பானத்தில் மயக்க மருந்து கொடுத்து என்னை வல்லுறவுக்குட்ப் படுத்தினார். அதை மொபைல் போனிலும் படம் எடுத்து தொடர்ந்து என்னை மிரட்டி, பல ஊர்களுக்கு அழைத்துச் சென்று வல்லுறவு கொண்டார். இதனால், 2008ம் ஆண்டு நான் கர்ப்பமடைந்தேன்.
இதுகுறித்து பாதிரியார் ராஜரத்தினத்திடம் தெரிவித்தபோது, என்னை சமாதானப்படுத்தி தனியார் மருத்துவமனைக்கு அழைத்துச் சென்று கருவைக் கலைத்தார். இத்தகவல் நான் சார்ந்த சபைக்குத் தெரிந்தவுடன், என்னைச் சபையிலிருந்து அவர்கள் நீக்கிவிட்டனர். இதையடுத்து, பாதிரியார் ராஜரத்தினத்தைச் சந்தித்து நியாயம் கேட்டதற்கு, 'இனிமேல் என்னை பார்க்கக் கூடாது; இதுதொடர்பாக யாரிடமும் பேசக் கூடாது' என என்னை மிரட்டினார். அவருக்கு ஆதரவாக பாதிரியார்கள் தேவதாஸ், சேவியர் பிரான்சிஸ், சேவியர் ஆகியோரும் சேர்ந்து, என்னை மிரட்டினர்.
இதுகுறித்து பாதிரியார் சார்ந்த சபையில் புகார் தெரிவித்தும், நியாயம் கிடைக்கவில்லை. ஆகவே, என்னை வன்புணர்ந்து கர்ப்பமாக்கிய பாதிரியார் ராஜரத்தினம் மீதும் அவருக்கு ஆதரவாக இருந்து என்னை மிரட்டிய பாதிரியார்கள் தேவதாஸ், சேவியர் பிரான்சிஸ் மற்றும் சேவியர் ஆகியோர் மீதும் தக்க நடவடிக்கை எடுக்க கோருகிறேன்" என்று கூறப்பட்டிருந்தது.
இதையடுத்து கோட்டை மகளிர் போலீசார், தூய வளனார் கல்லூரி முதல்வர் ராஜரத்தினம் மீது, வல்லுறவு மற்றும் மிரட்டல் ஆகிய இருபிரிவுகளிலும், அவருக்குத் துணையாக இருந்த மூன்று பாதிரியார்கள் மீது மிரட்டல் விடுத்ததாகவும் வழக்கு பதிவு செய்தனர்.
இதற்கிடையில் கல்லூரி முதல்வர் பாதிரியார் ராஜரத்தினத்தை கைது செய்யக் கோரி, மக்கள் கலை இயக்கிய கழகம் சார்பில் மாவட்ட தலைவர் ராஜா தலைமையில் இன்று ஆர்ப்பாட்டம் நடக்கிறது. ஆர்ப்பாட்டத்துக்குக் காவல்துறை அனுமதி தரவில்லை என்று தெரிவித்துள்ள ராஜா, "தடையை மீறி ஆர்ப்பாட்டம் நடைபெறும்" என்று தெரிவித்துள்ளார்.
இதேபோன்று பாமக சார்பிலும் கல்லூரி முதல்வர் ராஜரத்தினத்தை கைது செய்யக் கோரி, ஆர்ப்பாட்டம் நடைபெறும் என திருச்சி மாநகர பாமக மாவட்டச் செயலாளர் திலீப் குமார் அறிவித்துள்ளார்.