வேலூர் மாவட்டம் திருப்பத்தூரில் இரு தரப்பினர் இடையே திங்கள்கிழமை நள்ளிரவு ஏற்பட்ட மோதலில் ஒருவர் அதே இடத்தில் இறந்தார், 2 பேர் காயமடைந்தனர்.
திருப்பத்தூர் எல்லையம்மன் கோயில் பகுதியைச் சேர்ந்த சுல்தான் மகன் அயூப் (18). இவர் வைத்திருந்த மோட்டார் சைக்கிளை ஓட்டிப் பார்க்கத் தருமாறு அதே பகுதியைச் சேர்ந்த சாகுல் மகன் சாபு (18) கேட்டாராம். அதற்கு அயூப் மறுத்ததால் இருவருக்கும் தகராறு ஏற்பட்டுள்ளது.
இதில் ஆத்திரமுற்ற அயூப், சாபுவை தாக்கினாராம். இதைத் தொடர்ந்து சாபு, திருப்பத்தூர் போஸ்கோ நகர் பகுதியில் தனக்கு தெரிந்தவர்களுக்கு போன் மூலம் தான் தாக்கப்பட்டது குறித்து தெரிவித்துள்ளார்.
இதையடுத்து போஸ்கோ நகரைச் சேர்ந்த 10-க்கும் மேற்பட்ட இளைஞர்கள் கத்தி உள்ளிட்ட ஆயுதங்களுடன் ஆட்டோக்களில் எல்லையம்மன் கோயில் தெரு பகுதிக்கு திங்கள்கிழமை நள்ளிரவு சென்றுள்ளனர். இவர்கள் ஆயுதங்களுடன் ஆட்டோக்களில் வருவதை பார்த்த அப்பகுதியை சேர்ந்த கலிமுல்லா மகன் தமீம் (32), காதர் மகன் அப்துல் வஹாப் (30), இலியாஸ் மகன் கலீம் (23) ஆகியோர் அவர்களை தடுத்து நிறுத்தி எங்கே செல்கிறீர்கள் என கேட்டனராம்.
இதைத் தொடர்ந்து ஆயுதங்களுடன் வந்த கும்பல் அவர்களை தாக்கியுள்ளது. இதில் கத்திக்குத்து காயமடைந்த தமீம் அதே இடத்தில் இறந்துள்ளார். அப்துல் வஹாப், கலீம் ஆகிய இருவரும் படுகாயம் அடைந்துள்ளனர். இதுகுறித்து தகவல் அறிந்த அப்பகுதி இஸ்லாமியர்கள் திரளாக சென்று திருப்பத்தூர் - வாணியம்பாடி மெயின் ரோடில் உள்ள கடைகள், தெரு விளக்குகள் ஆகியவற்றை உடைத்து நொறுக்கியுள்ளனர். தொடர்ந்து செவ்வாய்க்கிழமை காலை, ஊர்வலமாக சென்று திறந்திருந்த கடைகளை அடைக்க வேண்டுமென வியாபாரிகளை வற்புறுத்தியுள்ளனர். அதனால் திருப்பத்தூரில் கடைகள் அடைக்கப்பட்டன. கோட்டை மசூதி தெருவில் அமைக்கப்பட்டிருந்த பல்வேறு கட்சிகளின் கொடிகளை அப்புறப்படுத்தியும், கொடிக்கம்பங்களை வெட்டியும் சாய்த்துள்ளனர். தொடர்ந்து திருப்பத்தூர் போலீஸ் நிலையம் அருகில் கிருஷ்ணகிரி நெடுஞ்சாலையில் மறியல் போராட்டத்தில் ஈடுபட்டுள்ளனர். போலீஸôர் நடத்திய பேச்சுவார்த்தைக்குப் பிறகு போராட்டத்தில் ஈடுபட்டவர்கள் கலைந்து சென்றனர்.
இது தொடர்பாக எல்லையம்மன் கோயில் பகுதியை சேர்ந்த சாகுல் ஹமீத் (48), இவரது மகன் தாஜூதின் (21) ஆகிய இருவரையும் போலீஸôர் கைது செய்தனர்.

இப்ப்டியும் உயிர்பலியா ?

என்னா கொடுமை