சென்னை, அக்.19,2010

'சுப்ரமணியபுர'த்துக்கு பிறகு தாம் இயக்கியிருக்கும் படத்துக்கு 'ஈசன்' என்று பெயர் சூட்டியிருக்கிறார், சசிக்குமார்.

இப்படம் குறித்து சென்னையில் இன்று செய்தியாளர்களிடம் இயக்குனர் சசிக்குமார் விவரித்தது:

"நான் 'சுப்ரமணியபுரம்' படத்தை அடுத்து இயக்கிருக்கும் படம் 'ஈசன்'. இப்படத்தை இயக்கி முடித்தவுடன் தான் பெயர் வைக்க வேண்டும் என்று விரும்பினேன். கடந்த ஞாயிற்றுகிழமை படப்பிடிப்பு முழுவதும் முடிவடைந்து விட்டது. முழுப்படத்தை பார்த்து முடித்தவுடன் இப்படத்துக்கு ஈசன் என்ற பெயரே பெருத்தமாக இருக்கும் என்று வைத்துவிட்டேன்.

இப்படத்தின் மூலம் கிராமத்தில் இருந்து நகரத்துக்கு வந்து இருக்கிறேன். மதுரையில் இருந்து சென்னைக்கு வந்து இருக்கிறேன். அடுத்து, வெளிநாட்டு சென்று படமாக்க போகலாம் என்று இருக்கிறேன்.



எனது நண்பர் சமுத்திரக்கனியை 'சுப்ரமணியபுரம்' படத்தை பார்த்து திட்டி இருப்பீர்கள். அதனால் ஈசன் படத்தில் அவரை நேர்மையான போலீஸ் அதிகாரியாக காட்டியிருக்கிறேன். அவரை இப்படத்தின் மூலம் அனைவருக்கும் கண்டிப்பாக பிடிக்கும்.

ஈசன் படத்தில் நகரத்தின் வாழ்க்கையைச் சொல்லியிருக்கிறேன். நகரவாசிகளின் பகல் நேர, இரவு நேர வாழ்க்கை, அவர்களது மனநிலை, சந்தோஷம், துக்கம், கவலை, துரோகம் என அனைத்தையும் இப்படத்தில் கூறி இருக்கிறேன்.

நடிகர் விக்ரமுடன் சேர்ந்து மும்பை புரொட்யூஸர் ஒருவரும் இப்படத்தை தயாரிப்பதாக இருந்தது. பட்ஜெட் எதுவும் முன்கூட்டியே முடிவு செய்யவில்லை. இறுதியில், பட்ஜெட் அதிகமாக போகவே இப்படத்தை நானே தயாரிப்பதாக கூறிவிட்டேன்.

சசிக்குமார் எனது நண்பன் என்று விக்ரம் கூறி இருக்கிறார். அவரை விட ஒரு படி மேல் நான். விக்ரம் எனது இனிய நண்பர்.

இப்படத்தில் தயாரிப்பாளர் ஏ.எல்.அழகப்பனை அரசியல்வாதியாக நடிக்க வைத்து அறிமுகப்படுத்தி இருக்கிறேன். ஆனால், இது அரசியல் சம்பந்தமான படமோ, ஈசன் என்ற பெயரால் புராண படமோ, சாமி படமோ அல்ல.

வெறும் இயக்குனராக மட்டுமே இப்படத்தில் பணியாற்றி இருக்கிறேன். இதில் ஒரு காட்சியில் கூட நடிக்கவில்லை.

ஈசன் பட இசை வெளியீடு நவம்பர் மாதத்திலும், படம் டிசம்பரில் வெளியீடலாம் என்று நினைத்திருக்கிறேன்.

கண்டிப்பாக, 'பசங்க' மாதிரி தரமான படங்களை மட்டுமே தயாரிப்பேன். அதனால் தான் நிதானமாக தயாரிப்பில் ஈடுபட்டு இருக்கிறேன்.

என்னுடைய படங்கள் எப்போதும் யதார்த்தமாக இருக்கும். என் மீது வைத்திருக்கும் நம்பிக்கையை ஏமாற்ற மாட்டேன்.

கிராமத்தில் இருந்து நகரத்துக்கு இடம்பெயர்ந்ததால், நான் கமர்ஷியல் பக்கம் வந்து விட்டதாக எண்ண வேண்டாம். கமர்ஷியல் படத்தையும் யதார்த்தமாக எடுக்க முடியும்," என்றார் சசிக்குமார்.

- கா.இசக்கி முத்து

[You must be registered and logged in to see this link.]