ஈசன் --- திரை விமர்சனம்

by **கவி கவிதா** Tue Dec 28, 2010 5:42 pm

நடிப்பு: சமுத்திரக்கனி, வைபவ், அபிநயா,
அபர்ணா, துஷ்யந்த், காஜா மொய்தீன், மோகன்.
இயக்கம்: எம்.சசிகுமார்
தயாரிப்பு: கம்பெனி புரொடக்ஷன்
இசை: ஜேம்ஸ் வசந்தன் ஒளிப்பதிவு: கதிர்.

சென்னையின் பணக்கார இரவும், அங்கு நடக்கும் திக் திக் பிரச்னையும்தான் கதை. போதை ப்ளஸ் பெண்கள் என்று அடங்காமல் வாழ்பவர் அரசியல்வாதியின் மகன் வைபவ். அவரது நள்ளிரவு ஆட்டங்களால் சீரழிகிறது அழகான கிராமத்து குடும்பம். குழந்தைகளின் படிப்பிற்காக கிராமத்தை விட்டு நகரத்துக்கு குடிபெயர்கிறார் ஒரு கிராமத்து தந்தை. வாய் பேச முடியாத மகள் அபிநயா. வைபவ் படிக்கும் பேஷன் டெக்னாலஜி கல்லூரியில் சேர்ந்து படிக்கிறாள். அல்ட்ரா மாடர்ன் தோழிகளுடன் சேர்ந்து போதைக்கு ஆளாகிறாள். அதையே சாதகமாக்கிக்கொண்டு வைபவும், அவரது நண்பன் நிரஞ்சனும் சேர்ந்து அவளை நாசப்படுத்தி விடுகிறார்கள். கசங்கிய பூவாக வந்து கிடக்கும் மகளை பார்த்து அதிர்ச்சி அடைகிறார் தந்தை. விஷயம் வெளியில் தெரியாமல் இருக்க குடும்பத்தோடு விஷம் குடித்து தற்கொலை செய்து கொள்கிறார். இதில் மகன் துஷ்யந்த் மட்டும் தப்பிக்கிறான். பள்ளியில் படித்துக் கொண்டே தன்னுடைய அறிவால் அக்காவை கெடுத்த பாவிகளை எப்படி பழி வாங்குகிறான் என்பது கதை.

மேல்தட்டு மக்களின் கலாசார சீர்கேட்டால் மானத்தை பெரிதாக மதிக்கும் ஒரு கிராமத்து குடும்பம் எப்படி சின்னாபின்னமாகிறது என்பதை அழுத்தமாகச் சொல்லியிருக்கிறார் சசிகுமார். அரசியல்வாதியின் அடாவடி மகனை தொழிலதிபரின் மகள் காதலிக்கிறாள். எதிலும் லாப நஷ்ட கணக்குப் போடும் அரசியல்வாதி, மகன் காதலிலும் கணக்குபோட்டு பார்த்து தொழிலதிபரை சம்பந்தியாக்கி கொள்ள பார்க்கிறார். ‘நீ அஞ்சு வருஷத்துக்கு மந்திரி. நான் என்றைக்கும் கோடீஸ்வரன்’ என்று தொழிலதிபர் அரசியல்வாதியை உதாசீனப்படுத்த சினம் கொள்கிறார் அரசியல்வாதி. அரசியல்வாதியோடு அடிக்கடி மோதுகிறார் நேர்மையான போலீஸ் அதிகாரி. இப்படி காக்கி சட்டை, வெள்ளை சட்டை, கோட் சூட்டின் மோதலை சொல்லிச் செல்லும் கதை, திடீரென பள்ளி சிறுவனின் பழிவாங்கலுக்கு தடம் மாறுவது எதிர்பாராத திருப்பம்.

இதுவரை பார்த்திராத வித்தியாசமான போலீஸ் அதிகாரி கேரக்டரில் சமுத்திரக்கனி கச்சிதம். அரசியல்வாதிக்கு எதிராக அவர் உருமுவது வரைக்கும் சரி. ஆனால் தன்னந்தனி ஆளாக வருகிறார், போகிறார், சுடுகிறார். பள்ளி மாணவனாக நடித்திருக்கும் துஷ்யந்த் நடிப்பில் ஆச்சர்யப்படுத்துகிறார். கிளைமாக்ஸில், ‘வெஷம் சாப்டே சாகலை... நீ அடிச்சா சாகப்போறேன்’ என்கிற போதும் அவன் கண்களில் தெறியும் கொலை வெறியும் அவ்வளவு எளிதில் மறந்து விடக்கூடியதல்ல. அபிநவ், அபர்ணா, பாலியல் தரகராக வரும் மோகன், போலீஸ் உயரதிகாரியாக வரும் காஜா மொய்தீன், அரசியல்வாதியின் கையாளான நமோ நாராயணன் என அத்தனை பேரும் கேரக்டரை செவ்வனே செய்கிறார்கள். ஜேம்ஸ் வசந்தனின் பின்னணி இசை பிரமாதம். ‘ஜில்லா விட்டு’வைத் தவிர, பாடல்கள் ‘சுப்ரமணியபுர’த்தின் சுற்று வட்டாரத்திற்குள் கூட வரவில்லை. கதிரின் ஒளிப்பதிவு ஹெ டெக்.

கிராமத்தில் வசதியோடு வாழும் ஒருவர், பிள்ளைகள் படிப்புக்காக பாரம்பரிய வீடு, சொந்த பந்தங்களை விட்டு நகர்புறத்துக்கு குடிபெயர்வதில் லாஜிக் இல்லை. அபிநயா பலாத்காரம் செய்யப்பட்டதை ஏதோ காய்ச்சல், ஜூரம் என்கிற ரேஞ்சுக்கு டாக்டர் சொல்வதும், அதை போலீசுக்கு சொல்லாமல் வீட்டுக்கு அனுப்பி வைப்பதும் பச். மேற்தட்டு உலகத்தை காட்ட விரும்பிய சசிகுமார், அரசியல்வாதி போலீஸ் அதிகாரி மோதல், அரசியல்வாதி தொழிலதிபர் ஈகோ, கிராமத்து குடும்பத்தின் நகர்புறத்து சீரழிவு என்ற பாணியில் இறங்கி கொஞ்சம் தடுமாறியிருக்கிறார்.

நன்றி : தினகரன்