சட்டத்தில் இடமுண்டோ ? முனைவர் ச.சந்திரா

by **eraeravi** Mon Mar 21, 2011 10:39 am

சட்டத்தில் இடமுண்டோ ?
முனைவர் ச.சந்திரா

நிலமகள் பச்சை வண்ண

பட்டாடை களையப்பட்டு

கந்தர் கோலத்துடன் காட்சி !

நாற்று நட்ட பெண்களெல்லாம்

காற்று வாங்கிக் கொண்டு

தீப்பெட்டிஆபீஸ் பேரூந்தில் பயணம் !

களையெடுத்தவரெல்லாம் இன்று

நூற்பாலைக்கு பறக்கின்றனர்

பருத்திப்பஞ்சை விட வேகமாக !

பூமகள் மேனி அளக்கப்பட

சிலுவைத் தழும்புகளாய்

அதில் கல் ஆணிகள் !

புல்பூண்டுகள் இருந்த இடத்தில்

இன்று கற்குவியல்களும்

கான்கீரீட் கலவையும் .

மந்தையிலிருந்து ஆடுகள்

அனைத்துமே தப்பின

இலைதழை இல்லாமல் !

பசும்பயிர்கள் வாழ்ந்த இடத்தில்

பலமாடி கட்டிடங்கள்

பளிங்கு கற்கள் பதிக்கப்பட்டு !

ஐந்தறிவு ஜீவனின் சொத்தை

அபகரிக்கும் ஆறறிவுமனிதன் மீது

வழக்கு தொடுக்க மனுநீதி முதல்

மக்கள் நுகர்வோர் மன்றம்வரை

எச்சட்டத்தில் இடமுண்டு ?

யாரேனும் பதில் சொல்வீரோ ?