[You must be registered and logged in to see this image.]காவிரியில் இப்போதைக்கு தண்ணீர் திறந்து விட முடியாது என்று கர்நாடக அரசு கைவிரித்துள்ளது. பெங்களூரில் நடந்த அம்மாநில அனைத்து கட்சி கூட்டத்தில் இம்முடிவு எடுக்கப்பட்டது.

காவிரி நடுவர்மன்ற உத்தரவுப்படி, தமிழகத்துக்கு ஆண்டுக்கு 205டிஎம்சி தண்ணீரைக் காவிரியில் கர்நாடகம் திறந்து விட வேண்டும். காவிரி நீர்ப்பிடிப்பு பகுதியிலுள்ள கே.ஆர்.எஸ். அணை, வழக்கமாக ஜூலையில் நிரம்பி விடும்.

ஆனால், இந்த ஆண்டு இம்மாதம் 17ஆம் திகதிதான் அணை நிரம்பியது. கபினி, ஹாரங்கி, ஹேமாவதி அணைகள் இன்னும் முழுமையாக நிரம்பவில்லை.

இந்நிலையில், காவிரி நடுவர்மன்ற உத்தரவின்படி தமிழகத்துக்கு ஜூன் முதல் அக்டோபர் மாதம் வரை தரவேண்டிய 156டிஎம்சிக்கு பதிலாக இதுவரை 79டிஎம்சி தண்ணீரை மட்டுமே கர்நாடகம் திறந்து விட்டுள்ளது. மீதி தண்ணீரை உடனடியாக விடுவிக்குமாறு, கர்நாடக அரசுக்கு தமிழக அரசு கடிதம் எழுதியது.

இதற்கிடையே, கர்நாடக அரசுக்கு நெருக்கடி ஏற்பட்டு, அம்மாநிலத்தில் அரசியல் குழப்பம் காணப்பட்டதால் தமிழக அரசின் கோரிக்கை கண்டுகொள்ளப்படவில்லை.

இந்நிலையில், தமிழகத்துக்கு காவிரியில் நீர் திறப்பது குறித்து முதல்வர் எடியூரப்பா தலைமையில் அவரது வீட்டில் சட்டமன்ற கட்சி தலைவர்கள் கூட்டம் நடைபெற்றது.

இக்கூட்டத்தில் அமைச்சர்கள், எதிர்க்கட்சி தலைவர் சித்தராமையா, மஜத சட்டமன்ற கட்சி தலைவர் எச்.டி.ரேவண்ணா, மேலவை எதிர்க்கட்சி தலைவர் மோட்டம்மா, மஜத தலைவர் எம்.சி.நானையா, மாநில தலைவர் செயலாளர் எஸ்.வி.ரங்கநாத் மற்றும் நீர்ப்பாசனத்துறை அதிகாரிகள் கலந்துகொண்டனர்.

கூட்டத்துக்கு பின்னர், அமைச்சர் பசவராஜ் பொம்மை கூறுகையில்,

"காவிரியில் தண்ணீர் திறந்து விடும்படி, தமிழக முதல்வர் கருணாநிதி எழுதிய கடிதம் பற்றி விவாதிக்க இக்கூட்டம் நடத்தப்பட்டது. தற்போதைய சூழ்நிலையில் தண்ணீர் திறந்து விட முடியாது என்று ஒருமனதாக தீர்மானிக்கப்பட்டுள்ளது.

அதேநேரத்தில், கேரள மாநிலம் வயநாடு, குடகு மற்றும் காவிரி நீர்ப்பிடிப்பு பகுதிகளில் மழை பெய்து வருகிறது. இதனால் கே.ஆர்.எஸ். அணைக்கு வினாடிக்கு 17 ஆயிரம் கன அடி தண்ணீர் வந்து கொண்டிருக்கிறது. அணையில் தற்போது 124.7 அடி தண்ணீர் உள்ளது.

வெள்ளப் பெருக்கெடுத்து, இன்று இரவுக்குள் அணை நீர்மட்டம் 124.8 அடியை தொட்டால் இரவே அணையின் பாதுகாப்பு கருதி தண்ணீர் திறக்கப்படும். மீண்டும் தமிழக அரசின் சார்பில் கோரிக்கை வந்தால், மீண்டும் அனைத்து கட்சி தலைவர்கள் கூட்டம் நடத்தி முடிவெடுக்கப்படும். இவ்வாறு அமைச்சர் தெரிவித்தார்.

வீரகேசரி