கர்நாடகா முதல்வர் எடியூரப்பாவின் மெஜாரிட்டியை நிரூபிக்க நடந்த இன்றைய வாக்கெடுப்பில், குரல் வாக்குமூலம் எடியூரப்பா தலைமையிலான பாஜக அரசு வெற்றி பெற்றதாக சபாநாயகர் அறிவித்தார்.

முதல்வர் எடியூரப்பா தலைமையிலான கர்நாடக பாரதிய ஜனதா அரசுக்கு அளித்து வந்த ஆதரவை, சுயேட்சை எம்.எல்.ஏக்கள் 5 பேர் உட்பட பாஜகவைச் சேர்ந்த 19 எம்.எல்.ஏ.,க்கள் வாபஸ் பெற்றனர். இதையடுத்து அக்டோபர் 12ம் தேதி மாலை 5 மணிக்குள், சட்டசபையில் மெஜாரிடியை நிரூபிக்க வேண்டும் என, முதல்வர் எடியூரப்பாவுக்கு கவர்னர் பரத்வாஜ் உத்தரவிட்டார்.

இதற்கிடையில், எடியூரப்பாவுக்கு எதிராக போர்க்கொடி தூக்கி ஆதரவை வாபஸ் பெற்ற 19 எம்.எல்.ஏக்களில், பாஜகவைச் சேர்ந்த 11 எம்.எல்.ஏக்கள் மீது கட்சித்தாவல் தடை சட்டத்தின் கீழ் நடவடிக்கை எடுத்து அவர்களைப் பதவியில் இருந்து நீக்க சபாநாயகர் போப்பையா முயற்சி மேற்கொண்டார். இதனையறிந்த கர்நாடகா ஆளுனர், அதிருப்தி எம்.எல்.ஏக்கள் மீது நடவடிக்கை எடுக்கக் கூடாது என, ஆளுநர் பரத்வாஜ் சபாநாயருக்கு உத்தரவிட்டார்.

ஆட்சிக்கு ஏற்பட்ட சிக்கலிலிருந்து மீள்வது குறித்து முதல்வர் எடியூரப்பா தனது அமைச்சர்களுடனும், அதிகாரிகளுடனும் ஆலோசனை நடத்தினார். அதன் பின்னர் திடீரென, இன்றே தனது பலத்தைச் சட்டசபையில் நிரூபிப்பதாக அறிவித்தார்.

ஆளுனரின் உத்தரவைத் தொடர்ந்து அதிருப்தி எம்.எல்.ஏக்கள் மீது எடுக்கவிருந்த நடவடிக்கையைச் சபாநாயகர் நிறுத்தி வைத்தார். இன்று ஓட்டெடுப்பு நடைபெறும் நிலையில், சென்னையில் முகாமிட்டிருந்த அதிருப்தி எம்எல்ஏக்கள் 19 பேரும் இன்று காலை கர்நாடகா சட்டமன்றம் திரும்பினர். அவர்கள் இன்று நம்பிக்கை கோரும் தீர்மானத்திற்கு எதிராக வாக்களிக்கும் நிலையில், எடியூரப்பா அரசு கவிழ்வது உறுதி என எதிர்பார்க்கப்பட்டது.

இந்நிலையில் இன்று காலை திடீரென சபாநாயகர் அதிருப்தி எம்எல்ஏக்கள் 16 பேரை பதவிநீக்கம் செய்து உத்தரவிட்டார். இதையடுத்து கர்நாடக சட்டசபையில் மொத்த உறுப்பினர்களின் எண்ணிக்கை 208ஆக குறைந்துவிட்டது.

ஆளும் பாஜகவிற்கு 103 எம்.எல்.ஏக்களுடன் 3 சுயேட்சை எம்.எல்.ஏக்களின் ஆதரவு உள்ளதால், நம்பிக்கை வாக்கெடுப்பில் எடியூரப்பா அரசு வெற்றி பெறும் வாய்ப்பு இதனால் உருவானது.

அதிருப்தி எம்.எல்.ஏக்களைப் பதவி நீக்கம் செய்ததால், அசம்பாவிதம் ஏதும் நிகழாமல் இருக்க பெங்களூருவில் சட்டமன்றத்தைச் சுற்றி சுமார் 2 கிலோ மீட்டர் தூரத்திற்கு 144 தடை உத்தரவை அரசு பிறப்பித்தது. நம்பிக்கை ஓட்டெடுப்பில் எதிர்த்து வாக்களிக்க வந்த அதிருப்தி எம்.எல்.ஏக்கள் பதவி பறிக்கப்பட்டதால் சட்டசபைக்குள் செல்ல அனுமதி மறுக்கப்பட்டனர்.

இதனால் சட்டசபை வளாகத்திலேயே அதிருப்தி எம்.எல்.ஏக்கள் அமளியில் ஈடுபட்டதோடு, பேரவையின் கண்ணாடிகளை அடித்து நொறுக்கினர்.

இந்நிலையில் எடியூரப்பா தலைமையிலான பாஜக அரசின் பலத்தை நிரூபிப்பதற்காக ஓட்டெடுப்பு நடத்த இன்று காலை 10 மணிக்கு சட்டசபை கூட்டம் கூடியது. சபை கூடிய சிறிது நேரத்தில், சபாநாயகர் குரல் வாக்கெடுப்பு நடத்தினார். இதில் எடியூரப்பா ஆட்சி தொடரத் தேவையான ஆதரவு கிடைக்கப்பெற்றதைத் தொடர்ந்து, எடியூரப்பா அரசு வெற்றிபெற்றதாக சபாநாயகர் அறிவித்தார். அத்துடன் சட்டசபையையும் ஒத்திவைத்து சபாநாயகர் உத்தரவிட்டார்

எல்லாம் பதவிக்கு தான் ...