ஸ்டிக்கர் பொட்டு அட்டையில் பணம் வினியோகம்?

by kingmaker Tue Apr 12, 2011 2:09 pm

மடத்துக்குளம் தொகுதி வாக்காளர்களுக்கு, "ஸ்டிக்கர்' பொட்டு அட்டையில் பணம் வைத்து, தி.மு.க.,வினர் வினியோகித்ததாக, தேர்தல் பார்வையாளரிடம், அ.தி.மு.க., புகார் அளித்துள்ளது. மடத்துக்குளம் தொகுதியில், தி.மு.க., வேட்பாளராக சாமிநாதனும், அ.தி.மு.க.,வில் சண்முகவேலும் போட்டியிடுகின்றனர். தி.மு.க.,வினர், வாக்காளர்களுக்கு பணம் வினியோகிப்பதாக, அ.தி.மு.க.,வினர் தொடர் புகார் தெரிவித்து வருகின்றனர். இந்நிலையில், மெட்ராத்தி ராமேகவுண்டன்புதூர் கிராமத்தில், நூதன முறையில் பணம் வினியோகித்ததாக, தேர்தல் பார்வையாளரிடம், அ.தி.மு.க., சார்பில் புகார் மனு அளிக்கப்பட்டுள்ளது. மனுவில், "ராமேகவுண்டன்புதூர் கிராமத்தில், பெண்களுக்கு, "ஸ்டிக்கர்' பொட்டு அட்டைகள் வீடுவீடாக வழங்கப்பட்டுள்ளன. தி.மு.க., சின்னம் மற்றும் தலைவர்கள் படம் அச்சடிக்கப்பட்ட அட்டைகளுக்குள், தலா 500 ரூபாய் வைத்து வினியோகிக்கப்பட்டுள்ளன. சம்பந்தப்பட்ட கிராமத்தில், தேர்தல் அலுவலர்கள் நேரடியாக ஆய்வு செய்து, நடவடிக்கை எடுக்க வேண்டும்' எனக் கூறப்பட்டுள்ளது. பறிமுதல் செய்ததாக கூறப்படும் 50க்கும் மேற்பட்ட ஸ்டிக்கர் பொட்டு அட்டைகளை, தேர்தல் பார்வையாளரிடம் வழங்கினர்.