மும்பையில் "சகாரா' விருது வழங்கும் விழா கடந்த சனிக்கிழமை வண்ணமயமாக நடந்தது. பொலிவூட் நடிகை கரீனா கபூர், சோனாக்ஷி சின்காவின் கவர்ச்சி ஆட்டம் ரசிகர்களை கிறங்கடித்தது. இவர்களுடன் இந்தி சுப்பஸ்டார் ஷாருக்கான் மற்றும் கிரிக்கெட் வீரர்களும் கைகோர்த்துக்கொள்ள இரவெல்லாம் ஆடல்,பாடலுடன் நிகழ்ச்சிகள் களை கட்டின.



கடந்த ஆயிரம் ஆண்டுகளில் சிறந்த நட்சத்திரம் உட்பட இரண்டு விருதுகளைச் சச்சின் தட்டிச் சென்றார்.இந்திய விளையாட்டு அரங்கில் சிறந்து விளங்குபவர்களுக்கு சகாரா நிறுவனம் ஆண்டுதோறும் விருது வழங்கிக் கௌரவிக்கிறது. இரண்டாவது சகாரா விருது வழங்கும் நிகழ்ச்சி மும்பையில் நடந்தது. இதில் பொலிவூட் நடிகர் ஷாருக்கானிடம் விளையாட்டு வீரர்கள் சிக்கித் தவித்தனர்.

இவர் நடித்த "சக்தே இந்தியா' படத்தின் வசனங்களை நகைச்சுவையாகப் பேசும்படி ஹொக்கி வீரர்கள் ராஜ்பால் சிங்,சந்தீப் சிங்கை கேட்டுக்கொண்டார். குத்துச்சண்டை வீரர் விஜேந்தருடன் அளவளாவி மகிழ்ந்தார். பின் இரண்டு குழந்தைகளுக்குத் தாயான நிலையிலும் குத்துச்சண்டையில் சாதிக்கும் மேரி கோமைப் பாராட்டினார். அவரைப் பார்த்து தொடர்ந்து ஐந்துமுறை உலக சாம்பியன் பட்டம் வெல்வது சாதாரண காரியமல்ல. "ஐ லவ் யு' என்று ஷாருக் சொல்ல அரங்கம் அதிர்ந்தது.

சானியா புதுமை:

தனது கணவர் சொய்ப் மாலிக்குடன் பங்கேற்ற டெனிஸ் வீராங்கனை

சானியா மிர்சா,தொகுப்பாளினியாக புதிய அவதாரம் எடுத்தார். இவர் சிறிது நேரம் நிகழ்ச்சிகளைத் தொகுத்து வழங்கினார். கிரிக்கெட் வீரர் ஸ்ரீசாந்த் தனது "பிரேக் டான்சை' மீண்டும் அரங்கேற்றினார். இம்முறை பற்மின்டன் நட்சத்திரங்கள் ஜுவாலா கட்டா மற்றும் அஷ்வினி பொன்னப்பாவுடன் சேர்ந்து ஆடினார்.

கரீனா கலக்கல்:

இந்நிகழ்ச்சியில் பொலிவூட் நடிகைகளான கரீனா கபூர்,பிராச்சி தேசாய்,ஜாக்குலின் பெர்னாண்டஸ்,சோனாக்ஷி சின்கா போன்றவர்கள் பிரபல இந்திப் பாடல்களுக்குக் கவர்ச்சியாக நடனம் ஆடினர்.

சச்சின் மகிழ்ச்சி:

இந்திய அணியின் சாதனை நாயகன் சச்சின் கடந்த ஆயிரம் ஆண்டுகளில் போற்றுதலுக்குரிய சிறந்த நட்சத்திரம் மற்றும் ஆண்டின் சிறந்த கிரிக்கெட் வீரர் ஆகிய இரண்டு விருதுகளைக் கைப்பற்றினார். அப்போது சச்சின் கூறுகையில்;

"கவாஸ்கரின் ஆட்டத்தைப் பார்த்து வளர்ந்தேன். எனக்கு ஊக்க சக்தியாகவிருக்கிறார். எனது 14 வயதில் வெங்கசர்க்கார் துடுப்புமட்டை ஒன்றைப் பரிசாக அளித்தார். இவற்றையெல்லாம் மறக்க முடியாது. தொடர்ந்து மகிழ்ச்சியுடன் கிரிக்கெட் விளையாடி வருகிறேன் என்றார்.

தினக்குரல்