ஆந்திராவில், கடப்பா லோக்சபா, புலிவெந்துலா சட்டசபை தொகுதிகளில்
இடைத்தேர்தலுக்கு வேட்பு மனு தாக்கல் துவங்கியுள்ள நிலையில், கட்டு கட்டாக
பணமும், வாக்காளர்களை நோக்கி பயணம் செய்கிறது. கடப்பா தொகுதியில்
போலீசாரின் வாகன சோதனையில், 91.11 லட்ச ரூபாய் பிடிபட்டது.
மறைந்த ராஜசேகர ரெட்டியின் மகன் ஜெகன்மோகன் ரெட்டி, காங்கிரசுக்கு
எதிராக ஒய்.எஸ்.ஆர்., காங்கிரஸ் என்ற புதுக் கட்சியை துவங்கியுள்ளார். தன்
தந்தை ராஜசேகர ரெட்டி மறைவுக்கு பின், முதல்வர் பதவிக்காக பெரும் போராட்டம்
நடத்தி தோல்வியுற்ற ஜெகன்மோகன் ரெட்டி, காங்கிரஸ் கட்சியின் சார்பில்
கிடைத்த கடப்பா எம்.பி., பதவியை ராஜினாமா செய்தார். இத்தொகுதியில்
இடைத்தேர்தல் தவிர்க்க முடியாத தலைவிதியாக இங்கு நடக்க உள்ளது.கணவர்
ராஜசேகர ரெட்டியின் மறைவுக்கு பின் அவர் பதவி வகித்த புலிவெந்துலா சட்டசபை
தொகுதியில், எம்.எல்.ஏ.,வாக போட்டியின்றி தேர்ந்தெடுக்கப்பட்ட விஜயலட்சுமி,
மகன் ஜெகன்மோகன் ரெட்டியை பின் தொடர்ந்து, காங்கிரசுக்கு சவால்விடும்
படியாக எம்.எல்.ஏ., பதவியை ராஜினாமா செய்தார். மீண்டும் ஓட்டுக்காக,
மக்கள் முன் கைகூப்பி, பிரசாரம் செய்து வருகிறார்.இந்த இடைத்தேர்தல்,
ஜெகன்மோகன் ரெட்டிக்கு, பெரும் சவாலாக உருவெடுத்துள்ளது. தேர்தலில் இவரை
தோற்கடிக்க மாநில காங்கிரஸ் கட்சி மூலம், அகில இந்திய காங்கிரஸ் பெரும்
முயற்சியுடன் இந்த இடைத்தேர்தலை சந்திக்க உள்ளது.
டில்லியில் சோனியா, மாநில காங்கிரஸ் கட்சியின் பொறுப்பாளரும், மத்திய
அமைச்சருமான குலாம்நபி ஆசாத்தை சந்தித்து பேசிய பின், ஐதராபாத்
திரும்பியுள்ள ஆந்திர முதல்வர் கிரண்குமார் ரெட்டி, கடப்பா, புலிவெந்துலா
தொகுதிகளில், இடைத்தேர்தல் வெற்றி, தோல்வியை ஒரு பொருட்டாக கருத முடியாது
என கூறியுள்ளார்.இருந்தாலும், இவருக்கு ஏற்பட்டுள்ள பயத்தின் காரணமாக
10க்கும் மேற்பட்ட அமைச்சர்களையும், 20க்கும் மேற்பட்ட
எம்.எல்.ஏ.,க்களையும் தேர்தல் வேலைகளை தீவிரமாக முடுக்கிவிட கடப்பாவில்
முகாமிடும்படி கூறி அனுப்பி வைத்துள்ளார்.காங்கிரசின் சார்பில், கடப்பா
லோக்சபா தொகதிக்கு ஜெகன்மோகன் ரெட்டியை எதிர்த்து, மாநில சுகாதார அமைச்சர்
டி.எல்.ரவீந்திரா ரெட்டி போட்டியிடுகிறார். புலிவெந்துலா சட்டசபை
தொகுதியில், தன் அண்ணி விஜயலட்சுமியை எதிர்த்து, மாநில விவசாய அமைச்சர்
ஒய்.எஸ்.விவேகானந்த ரெட்டி நிறுத்தப்பட்டுள்ளார்.
தெலுங்கு தேசம் கட்சியும், ஜனநாயக முறைப்படி தன் கட்சி சார்பில், கடப்பா
லோக்சபாவிற்கு ராஜ்யசபா உறுப்பினருமான மைசூரா ரெட்டியையும்,
புலிவெந்துலாவில் ரவி என்பவரையும் தேர்தல் களத்தில் நிறுத்தியுள்ளது.இந்த
இரு தொகுதிகளிலும் காங்கிரஸ் - ஒய்.எஸ்.ஆர்., காங்கிரஸ், தெலுங்குதேசம்
கட்சிகளில் பலம் பெரிதாக காணப்படுவதாக தெரியவில்லை. பணம் பலம் தான்
பிரதானமாக தெரிகிறது.
இந்த தேர்தல் முடிவதற்குள் 200 முதல் 300 கோடி
ரூபாய் செலவாகும் என மக்கள் மத்தியில் பேச்சு அடிபடுகிறது. கடப்பா
தொகுதிக்குள் புகுந்த வாகனங்களை பத்வேல் நெல்லூர் சாலை, பி.பி.குண்டா சோதனை
சாவடியில் நிறுத்தியபோது, 55 லட்சத்து 16 ஆயிரம் ரூபாய் பணம் இருந்தது
கண்டுபிடிக்கப்பட்டது. அதேபோன்று மேலும் இரு வாகனங்களில், 27 லட்சத்து 90
ஆயிரம் ரூபாயும், 8 லட்சத்து 5,000 ரூபாயும் கொண்டு செல்லப்பட்டதை போலீசார்
பறிமுதல் செய்தனர்.மேலும், 864 மதுபாட்டில்களும் பறிமுதல் செய்யப்பட்டது.
கடப்பாவில் நடக்க உள்ள இடைத்தேர்தலில், பதவியை பணம் கொடுத்து வாங்க,
ஒய்.எஸ்.ஆர்., காங்கிரஸ், காங்கிரஸ், தெலுங்கு தேசம் கட்சிகள் தீவிரமாக
ஈடுபட்டுள்ளன.
நன்றி தினமலர்

அட அங்கேயுமா..? " longdesc="90" /> " longdesc="90" />