கெய்ரோ:"எகிப்து முன்னாள் அதிபர் ஹோஸ்னி முபாரக்கின், "தேசிய ஜனநாயக கட்சி'
கலைக்கப்படுகிறது. அக்கட்சியின் சொத்துக்கள் அனைத்தும் அரசுக்கு சேர
வேண்டும்' என்று, அந்நாட்டு சுப்ரீம் கோர்ட் உத்தரவிட்டுள்ளது.எகிப்தில்,
அன்வர் சதாத் அதிபராக இருந்தபோது 1978ல் ஆரம்பிக்கப்பட்டது தான்
"தேசிய
ஜனநாயகக் கட்சி'. இதன் பெயர் பல முறை மாற்றப்பட்டுள்ளது. முபாரக்கும்
இக்கட்சியைச் சேர்ந்தவர் தான்.பின், முபாரக் அதிபராக இருந்த போது கட்சியின்
செல்வாக்கு மக்களிடையே வெறுப்புணர்வை சம்பாதித்தது. முபாரக்கை எதிர்த்து
மக்கள் போராட்டத்தில் குதித்த போது கட்சி கலைக்கப்பட வேண்டும் என்ற
கோரிக்கையையும் முன்வைத்தனர்.முபாரக்கின் வெளியேற்றத்துக்குப் பின்,
அக்கட்சியின் மூத்த பிரமுகர்கள் அனைவரும் ஊழல் குற்றச்சாட்டின் பேரில் கைது
செய்யப்பட்டு விசாரிக்கப்பட்டு வருகின்றனர். கட்சியை மேலும்
வலுப்படுத்தும் விதமாக, அன்வர் சதாத்தின் உறவினர் தலத் எல் சதாத் கட்சித்
தலைவராக சமீபத்தில்நியமிக்கப்பட்டார்.
அடுத்து வர இருக்கும் தேர்தலில்
பங்குபெறுவதற்கான முயற்சிகளில் ஈடுபட்டிருப்பதாக அக்கட்சி சமீபத்தில்
அறிவித்திருந்தது.இந்நிலையில், வக்கீல்கள் சிலர் அக்கட்சியைக் கலைத்து
உத்தரவிட வேண்டும் என்று கோரி, எகிப்து சுப்ரீம் கோர்ட்டில் மனு தாக்கல்
செய்தனர். அம்மனுவை விசாரித்த சுப்ரீம் கோர்ட், "கட்சி கலைக்கப்பட
வேண்டும். அதன் அசையும் மற்றும் அசையா சொத்துக்கள் அனைத்தும்
கைப்பற்றப்பட்டு அரசிடம் ஒப்படைக்கப்பட வேண்டும்' என்று நேற்று முன்தினம்
தீர்ப்பளித்துள்ளது.இதன் மூலம் எகிப்து மக்களின் மற்றொரு ஜனநாயகக் கோரிக்கை
நிறைவேறியுள்ளது.

நன்றி தினமலர்