திருவனந்தபுரம்: தன் உறவினருக்கு, 2.33 ஏக்கர் அரசு நிலத்தை முறைகேடாக
ஒதுக்கியது தொடர்பாக, கேரள முன்னாள் முதல்வர் அச்சுதானந்தன் மீது, முதல்
தகவல் அறிக்கை (எப்.ஐ.ஆர்.,) பதிவு செய்யப்பட்டுள்ளது. இந்தக் குற்றம்
நிரூபிக்கப்பட்டால், அவருக்கு ஏழு ஆண்டுகள் வரை சிறை தண்டனை கிடைக்கலாம்.
கேரளாவில்,
2006 முதல் 2011 வரை, மார்க்சிஸ்ட் கம்யூனிஸ்ட் கட்சியின் மூத்த தலைவரான,
வி.எஸ்.அச்சுதானந்தன் முதல்வராக இருந்தார். அந்தக் கால கட்டத்தில், அவரது
பெரியம்மா மகனான, சோமன் என்பவருக்கு, காசர்கோடு மாவட்டம், சேர்னி
கிராமத்தில் அரசுக்குச் சொந்தமான, 2.33 ஏக்கர் நிலத்தை ஒதுக்கீடு செய்ததாக
குற்றச்சாட்டு எழுந்தது.

முதல் தகவல் அறிக்கை : இதற்கு மாநில
வருவாய்த் துறை அமைச்சர் ராஜேந்திரன், நான்கு ஐ.ஏ.எஸ். அதிகாரிகள்,
முதல்வரின் தனிச் செயலர் ஆகியோர் உடந்தையாக இருந்ததாகவும் கூறப்பட்டது.
ஆனால், இந்தக் குற்றச்சாட்டை அச்சுதானந்தன் மறுத்து வந்தார். இந்நிலையில்,
2011ம் ஆண்டு நடந்த தேர்தலில், கேரளாவில் ஆட்சி மாற்றம் ஏற்பட்டதும்,
அச்சுதானந்தன், 87, மீதான குற்றச்சாட்டுக்கள் குறித்து விசாரணை நடத்த மாநில
அமைச்சரவை முடிவு செய்தது. அதன்படி, மாநில லஞ்ச ஒழிப்புத் துறை போலீசார்
முதல்கட்ட விசாரணை நடத்தி அறிக்கை சமர்ப்பித்தனர். அறிக்கையின்
அடிப்படையில், அச்சுதானந்தன் மீது வழக்குத் தொடர அனுமதிக்கப்பட்டது.
இதையடுத்து, சதித்திட்டம் தீட்டுதல், மோசடி, ஆதாரங்களை அழித்தல் மற்றும்
லஞ்ச ஒழிப்புச் சட்டம் 13வது பிரிவுகளின் கீழ், அச்சுதானந்தன் மீது
குற்றச்சாட்டு சுமத்தப்பட்டுள்ளது. லஞ்ச ஒழிப்புச் சட்டம், 13வது பிரிவின்
கீழான குற்றச்சாட்டுக்கள் நிரூபிக்கப்பட்டால், ஒன்று முதல் ஏழு ஆண்டுகள்
வரை சிறை தண்டனை வழங்க சட்டத்தில் இடமுண்டு. இவ்வழக்கில், முதல்
குற்றவாளியாக அச்சுதானந்தன் சேர்க்கப்பட்டுள்ளார்.

பதவி விலக முடிவு
: வழக்கு பதியப்பட்டதையடுத்து, சட்டசபை எதிர்கட்சித் தலைவர்
பதவியிலிருந்து அவரை ராஜினாமா செய்யுமாறு, ஆளும் ஐக்கிய ஜனநாயக முன்னணி
கூட்டணிக் கட்சியினர் வலியுறுத்தத் தொடங்கியுள்ளனர். அச்சுதானந்தனும்,
மாநில சட்டசபை எதிர்கட்சித் தலைவர் பதவியை ராஜினாமா செய்ய முன்வந்தார். தன்
முடிவு குறித்து, அவர் நேற்று மார்க்சிஸ்ட் கம்யூனிஸ்ட் கட்சி பொதுச்
செயலர் பிரகாஷ் கராத்திடம் தொலைபேசியில் தெரிவித்தார். ஆனால், அதற்கு அவர்,
"முதல் தகவல் அறிக்கை தானே, இன்னமும் எவ்வளவோ இருக்கு. அவசரப்பட்டு
ராஜினாமா செய்யவேண்டாம்' என தெரிவித்ததாக கட்சி வட்டாரங்கள் கூறின.

தினமலர்