கோடை வெயில் தாக்கம் : எலுமிச்சை விலை உயர்வு

ஆண்டிபட்டி: கோடை வெயில் தாக்கம்
அதிகரித்துள்ளதால் எலுமிச்சை விலை உயர்ந்துள்ளது. தேனி மாவட்டத்தில் சில
வாரங்களாக கோடை வெயிலின் தாக்கம் அதிகரித்துள்ளது. வெப்பத்தில் இருந்து
பாதுகாத்துக்கொள்ள குளிர்ச்சி தரும் பானங்கள், இளநீர்,பழங்களை அதிகம்
பயன்படுத்தி வருகின்றனர் மக்கள். குறைந்த செலவில் தாகம் தணிக்கும்
எலுமிச்சை இதில் அதிகம் பயன்படுத்தப்படுகிறது. இதனால் எலுமிச்சை விலை
அதிகரித்து வருகிறது. மாவட்டத்தில் போடி, பெரியகுளம் மலைப்பகுதிகளில்
எலுமிச்சை விளைச்சல் அதிகம் உள்ளது. இப்பகுதியில் கிடைக்கும் எலுமிச்சை
மாவட்டத்தின் பல பகுதிகளுக்கும், மதுரை, கேரளா போன்ற பகுதிகளுக்கும்
விற்பனைக்கு அனுப்பப்படுகிறது. கடந்த
மாதம் கிலோ 30 ரூபாய் ஆக இருந்த எலுமிச்சை விலை தற்போது 60 ஆக
உயர்ந்துள்ளது. சீசன் துவங்கும் நேரத்தில் போதுமான மழை இல்லாததால் உற்பத்தி
குறைந்துள்ளது. மதுரையில் சித்திரை திருவிழாவும், கிராமங்கள் தோறும்
பொங்கல் விழாக்களும் நடந்து வருவதால் எலுமிச்சை தேவை அதிகரித்துள்ளது.
சில்லரை விற்பனையில் ஒரு பழம் 2 முதல் 5 ரூபாய் வரை விற்கப்படுகிறது.
தாமரைக்குளத்தை சேர்ந்த எலுமிச்சை வியாபாரி அழகர்சாமி கூறியதாவது:
எலுமிச்சைக்கான தேவை ஒவ்வொரு ஆண்டும் அதிகரித்து வருகிறது. தேவைக்கேற்ப
உற்பத்தி இல்லை. பெரியகுளம், போடி பகுதிகளின் விளைவிக்கப்படும் எலுமிச்சை
மாவட்ட தேவைக்கே சரியாக உள்ளது. வெளியூர் வியாபாரிகளுக்கு தேவையான பழங்களை
விவசாயிகள் கொடுக்க முடியவில்லை என்றார்