ஹரியாணாவில் தண்ணீர் விலை உயர்வு

by **கவி கவிதா** Fri Dec 31, 2010 10:25 am

சண்டீகர், டிச. 30: "பணத்தை தண்ணீராக செலவழிக்கிறார்கள்' என்று கூறிய காலம் போய், தண்ணீரை பணத்தைவிட சிக்கனமாக பயன்படுத்த வேண்டும் என்று கூற வேண்டிய நிலை எப்போதோ வந்து விட்டது.
தண்ணீர் பாட்டிலில் அடைக்கப்பட்டு வந்தபோது அதற்கு அதிகவிலையும் நிர்ணயிக்கப்பட்டது. இந்நிலையில் ஹரியாணாவில் செங்கல் சூளை, கட்டுமானப் பணிகள், பெரும் தொழிற்சாலைகள், மின்உற்பத்தி நிலையங்கள் ஆகியவற்றுக்கு விநியோகிக்கப்படும் நீருக்கான விலை 20 சதவீதம் அளவுக்கு உயர்த்தப்பட்டுள்ளது.
அந்த மாநில முதல்வர் பூபிந்தர் சிங் ஹூடா தலைமையில் வியாழக்கிழமை நடைபெற்ற அமைச்சரவைக் கூட்டத்தில் இதற்கான முடிவு எடுக்கப்பட்டது. அதிக அளவு தண்ணீரை செலவு செய்யும் நிறுவனங்களுக்கு 2500 கியூபிக் அடி தண்ணீருக்கு 300 ரூபாய் என விலை நிர்ணயிக்கப்பட்டுள்ளது. முன்பு இது 250 ரூபாயாக இருந்தது.
இப்போது பெட்ரோல் விலையைக் குறைக்கச் சொல்லி போராட்டம் நடத்துவதுபோல, எதிர்காலத்தில் தண்ணீர் விலையைக் குறைக்கச் சொல்லிப் போராடும் நிலையும் ஏற்படும் என்றே தெரிகிறது.