ஈழத் தமிழர்களைப் பாதுகாக்க வேண்டுமானால் புலிகள் மீதான தடையை இந்திய அரசு நீக்க வேண்டும் என்று மக்க்ள் திராவிட முன்னேற்றக் கழகப் பொதுச் செயலாளர் வைகோ தெரிவித்தார்.

விடுதலைப்புலிகள் அமைப்புக்கு தடையை நீடிப்பது குறித்து விசாரிக்க நீதிபதி விக்ரம்ஜித் சென் தலைமையில் ஒரு நீதிபதி நடுவர் மன்றம் அமைக்கப்பட்டது. விடுதலைப்புலிகள் மீதான தடையை நீடிப்பது குறித்து பல்வேறு தரப்பினரின் கருத்துகளையும் நீதிபதி விக்ரம்ஜித் சென் விசாரித்து வந்தார்.

தமிழ்நாட்டில் சென்னை, நீலகிரி உள்ளிட்ட இடங்களிலும் விசாரணை நடைபெற்றது. விடுதலைப்புலிகள் அமைப்புக்கு தடை நீடிப்பதை எதிர்த்து ம.தி.மு.க. பொதுச் செயலாளர் வைகோ, பழ.நெடுமாறன் உள்ளிட்டோர் வாதிட்டனர். இந்தச் சூழ்நிலையில், டில்லியில் விசாரணை நடைபெற்றது.

விசாரணையின் போது, நேரில் ஆஜரான வைகோ தனது விவாதத்தை முன் வைத்த போதே மேற்கண்டவாறு தெரிவித்தார்.

"தமிழ் ஈழத்தை அடைவதற்காக விடுதலைப் புலிகள் போராடுவது தமிழ்நாட்டையும் அதில் சேர்த்துகொள்வதற்காகவே என்றும், இவர்களது போராட்டத்தால் இந்தியாவின் ஒற்றுமைக்கும், ஒருமைப்பாட்டுக்கும் ஆபத்து ஏற்பட்டுள்ளதாகவும் அரசு வழக்கறிஞர் குறிப்பிட்டுள்ளார்.

அதேபோல், புலிகளின் தமிழ் ஈழ வரைபடத்தில் தமிழ்நாடும் சேர்க்கப்பட்டுள்ளது என்றும் அரசு வழக்கறிஞர் தெரிவித்தார். இதில் ஒரு சதவீதம் கூட உண்மையில்லை. இதற்கான ஆதாரங்களை அவரால் காட்ட முடியாது.

தமிழ் ஈழம் என்பது இலங்கைத் தீவின் வடக்கு, கிழக்குப் பகுதிகள்தான் என்பதை விடுதலைப் புலிகளின் தலைவர் பிரபாகரன் தனது மாவீரர் தின உரையில் திட்டவட்டமாகக் கூறியுள்ளார்.

நோர்வே அரசு இலங்கையில் அமைதியை ஏற்படுத்த பல ஆண்டுகளாக பேச்சுவார்த்தையில் ஈடுபட்டது. தமிழ் ஈழத்தில் இந்தியப் பகுதியையும் சேர்க்கும் திட்டம் புலிகளுக்கு இருந்திருக்குமானால், அது நோர்வே அரசுக்குத் தெரியாமல் இருக்க முடியாது. அப்படி இருந்திருந்தால் நோர்வே இந்தப் பிரச்சினையில் தலையிட்டிருக்காது.

உண்மைக்குப் புறம்பானது

தமிழ் ஈழத்தைக் காரணம் காட்டியே விடுதலைப் புலிகளுக்கு இந்திய அரசு தடை விதித்துள்ளது. இந்திய ஒருமைப்பாட்டுக்கு ஆபத்து என்று மொத்த வழக்கையும் அரசு எழுப்பியுள்ளது. அதில் உண்மையில்லை என்பதால் விடுதலைப் புலிகள் மீதான தடையை நீடிக்க எந்த நியாயமும் இல்லை.

விடுதலைப் புலிகள் போதைப் பொருள் கடத்தலில் ஈடுபட்டதாக வழக்குகள் இருப்பதாக அரசு வழக்கறிஞர் தெரிவித்துள்ளார். விடுதலைப் புலிகள் அமைப்பைச் சேர்ந்தவர்கள் என்று கூறி ஒருவர் மீது கூட தமிழ்நாட்டில் வழக்கு எதுவும் தொடரப்படவில்லை என்று காவல்துறை அதிகாரியே நீதிமன்ற குறுக்கு விசாரணையில் ஒப்புக்கொண்டுள்ளார்.

விடுதலைப் புலிகளால் இந்தியத் தலைவர்களுக்கு ஆபத்து ஏற்படும் என்றும் ஒரு வாதத்தை அரசு முன்வைக்கிறது. இதை சட்ட விரோதச் செயல் என்ற விளக்கத்துக்குள் கொண்டு வர முடியாது.

புலிகள் இயக்கத்தைத் தடை செய்துள்ளதன் மூலம் ஈழத் தமிழர்கள் தமிழகத்துக்கு வந்தால், அவர்களை புலிகள் என்று கூறி அரசு சிறையில் அடைக்கிறது. ஈழத் தமிழர்கள் இன்று சர்வதேச அகதிகளாகிவிட்டனர்.

இந்திய அரசு புலிகள் இயக்கத்தை தடை செய்ததால், பல நாடுகளும் அந்த இயக்கத்தை தடை செய்துவிட்டன. ஈழத் தமிழர்களைப் பாதுகாக்க புலிகள் மீதான தடையை அரசு நீக்க வேண்டும்" என்று வைகோ வாதாடினார்.

வீரகேசரி