வளைவு - காசி ஆனந்தன்

by **அ.இராமநாதன்** Sat Apr 23, 2011 7:54 pm

ஐந்தில் வளையாதது
ஐம்பதில் வளையுமா?

பழமொழி சொல்லியே
வளைத்து விட்டோம் ஊரை

எப்போதும் போல்
நெஞ்சுக்குழி நின்று
வீட்டு வாசலில்
வளைந்தே கிளம்புகிறது
பிச்சைக்காரனின் கதறல்.

நிமிர்வதாய் இல்லை
இன்னும் எங்கள் ஊரில்
தாலிக்கு வளைந்து
கழுத்தைத் தந்த
பெண்மை.

கூனிக் குறுகி
வளைந்தே கிடக்கிறது
நெடுங்காலமாய்
சேரியின் முதுகு

வளவில்தான்
எத்தனை வகை

ஆங்கிலத்தின் காலை
வளைந்து முத்தமிடுகிறது
நேற்று ஆங்கிலேயனை
எதிர்த்து நிமிர்ந்த தலை.

தலைவர்கள் முன் மக்கள்
வளைய
வருமான வரி அதிகாரி முன்
வளைகிறார்கள தலைவர்கள

பார்க்கிறேன்...

மிகவும் பொருத்தமா
நினைவுச் சின்னங்களாய்...

தலைவர்கள் பெயரில்
வளைவுகள் ஊரில்.

காலம் தாழ்த்தாமல்
திருத்தி எழுதத் தோன்றுகிறது

ஐந்தில் நிமிராதது
ஐம்பதில் நிமிருமா..?

===========================

>உணர்ச்சிக் கவிஞர் காசி ஆனந்தன்
நன்றி: மயில் - மாத இதழ் 14 ஏப்ரல் 2011