சென்னை: ஐ.பி.எல்., "டுவென்டி-20' போட்டியில் சென்னை சூப்பர் கிங்ஸ் அணி,
25 ரன்கள் வித்தியாசத்தில் அசத்தல் வெற்றி பெற்றது. பேட்டிங்கில் சொதப்பிய
புனே வாரியர்ஸ் அணி, இத்தொடரில் "ஹாட்ரிக்' தோல்வியை பதிவு செய்தது.
நான்காவது
ஐ.பி.எல்., "டுவென்டி-20' தொடரின், லீக் போட்டிகள் தற்போது இந்தியாவில்
நடக்கிறது. இதில் சென்னையில் நடந்த போட்டியில், தோனியின் சென்னை சூப்பர்
கிங்ஸ், யுவராஜ் சிங்கின் புனே வாரியர்ஸ் அணியை சந்தித்தது. "டாஸ்' வென்ற
புனே கேப்டன் யுவராஜ் சிங், பீல்டிங் தேர்வு செய்தார். சென்னை அணியில்
ஜொகிந்தர் சர்மா நீக்கப்பட்டு, சதாப் ஜகாதி இடம் பெற்றார்.
நல்ல துவக்கம்:
சென்னை
அணிக்கு மைக்கேல் ஹசியுடன் இணைந்து, தமிழக வீரர் முரளி விஜய் துவக்கம்
கொடுத்தார். முதல் இரண்டு முறை "ரன் அவுட்' வாய்ப்பில் இருந்து தப்பி
பிழைத்த முரளி விஜய், பின் சுதாரித்துக் கொண்டார். டெய்லர், தாமஸ்
பந்துகளில் பவுண்டரி அடித்து அசத்திய இவர், முரளி கார்த்திக் பந்தில்
"சூப்பர்' சிக்சர் அடித்தார்.
முதல் விக்கெட்டுக்கு 64 ரன்கள் சேர்த்த
நிலையில், முரளி விஜய் (31), தாமஸ் பந்தில் அவுட்டானார். இதே ஓவரின் கடைசி
பந்தில், இத்தொடரில் "பார்ம்' இல்லாமல் தவித்து வரும் ரெய்னாவும் (2)
போல்டானார்.
ஹசி அரைசதம்:
மற்றொரு துவக்க வீரர் ஹசி, நேற்று மீண்டும்
அசத்தலான ஆட்டத்தை வெளிப்படுத்தினார். மெக்கலம் பந்தில் சிக்சர் விளாசிய
இவர், கார்த்திக் ஓவரில் அடுத்தடுத்து பந்துகளை பவுண்டரிக்கு விரட்டினார்.
28 ரன் எடுத்த போது "அவுட்' வாய்ப்பில் இருந்து தப்பிய ஹசி, தாமஸ் பந்தில்
பவுண்டரி அடித்து அரைசதம் கடந்தார்.
தோனி ஏமாற்றம்:
ராகுல் சர்மாவின்
ஓவரில் அடுத்தடுத்து பவுண்டரிகள் அடித்த, கேப்டன் தோனி (26) தேவையில்லாமல்
"ஸ்டம்டு' ஆனார். சிறப்பாக விளையாடிக் கொண்டிருந்த ஹசியும், 61 ரன்களில்
வெளியேற, அணியின் ஸ்கோர் உயர வழியில்லாமல் போனது. பின் வந்த மார்கல், "டக்'
அவுட்டானார். அனிருதாவும் (7) சொதப்ப, சென்னை சூப்பர் கிங்ஸ் அணி, 20
ஓவரில் 6 விக்கெட்டுக்கு 142 ரன்கள் மட்டும் எடுத்தது.
பத்ரி நாத் (11) அவுட்டாகாமல் இருந்தார். புனே அணியின் டெய்லர் 3 விக்கெட் வீழ்த்தினார்.
மோசமான துவக்கம்:
எளிய
இலக்கை விரட்டிய புனே அணிக்கு மோனிஷ் மிஸ்ரா (9) சுமாரான துவக்கம்
கொடுத்தார். அஷ்வின் பந்தில் சிக்சர் அடித்து மிரட்டிய ரைடர் (15), அடுத்த
பந்தில் போல்டானார். முதல் நான்கு போட்டிகளில் தடை காரணமாக பங்கேற்காத
மனிஷ் பாண்டே, மார்கல் ஓவரில் அடுத்தடுத்து பவுண்டரி விளாசினார்.
ஆனால்
இவரும் (12) அடுத்த பந்தில் போல்டாகி பெவிலியன் திரும்பினார். இத்தொடரின்
துவக்கத்தில் இருந்தே சொதப்பி வரும் அதிரடி உத்தப்பாவும், அஷ்வின் சுழலில்
சிக்கி "டக்' அவுட்டாக, புனே அணி 40 ரன்னுக்கு 4 விக்கெட்டுகளை இழந்து
தத்தளித்தது.
வீணான போராட்டம்:
இதன் பின் இணைந்த கேப்டன் யுவராஜ்
சிங், மிதுன் மன்ஹாஸ் ஜோடி, அணியை சரிவில் இருந்து மீட்கும் முயற்சியில்
ஈடுபட்டனர். இந்நிலையில் மன்ஹாஸ் (20), போலிஞ்சர் வேகத்தில் சிக்கினார்.
சென்னை
வீரர்களின் துடிப்பான பவுலிங், அசத்தலான பீல்டிங் முன்னால், இவர்கள்
ஒன்றிரண்டு ரன்கள் எடுப்பதே பெரும்பாடாக இருந்தது. நீண்ட நேரம் களத்தில்
போராடிய யுவராஜ், 43 பந்துகளில் 34 ரன்கள் எடுத்து, ஜகாதியின் "சூப்பர்'
கேட்சில் வெளியேறினார். ராகுல் சர்மா (1) ரன் அவுட்டானார்.
அடுத்து
போலிஞ்சர் ஓவரில் டெய்லர் (2), நாதன் மெக்கலம் (15) அவுட்டாக, புனே அணி 20
ஓவரில் 9 விக்கெட்டுக்கு 117 ரன்கள் மட்டும் எடுத்து, 25 ரன்கள்
வித்தியாசத்தில் தோல்வியடைந்தது. தாமஸ் (1), கார்த்திக் (1) அவுட்டாகாமல்
இருந்தனர். சென்னை சார்பில் மார்கல் 3, போலிஞ்சர், அஷ்வின் தலா 2 விக்கெட்
கைப்பற்றினர்.

பீல்டிங் அபாரம்
புனே அணிக்கு குறைவான இலக்கை
நிர்ணயித்த சென்னை வீரர்கள், நேற்று பீல்டிங்கில் அசத்தினர். ரெய்னா,
அபினவ் முகுந்த், ஜகாதி, அனிருதா ஆகியோரது அபாரமான பீல்டிங்கினால், புனே
வீரர்கள் ரன் எடுக்க மிகவும் சிரமப்பட்டனர். இதன் காரணமாக 14.1 வது ஓவரில்
யுவராஜ் அடித்த பவுண்டரிக்குப் பின், வேறு யாரும் கடைசி வரைக்கும்
பவுண்டரியும் அடிக்க முடியவில்லை.

ஸ்கோர்போர்டு
சென்னை சூப்பர் கிங்ஸ்
முரளி விஜய்(கே)மெக்கலம்(ப)தாமஸ் 31(29)
ஹசி(கே)பாண்டே(ப)டெய்லர் 61(48)
ரெய்னா(ப)தாமஸ் 2(4)
தோனி(ஸ்டம்டு)<உத்தப்பா(ப)ராகுல் 26(21)
மார்கல்(கே)ரைடர்(ப)டெய்லர் 0(4)
பத்ரிநாத்-அவுட் இல்லை- 11(7)
அனிருதா(கே)உத்தப்பா(ப)டெய்லர் 7(7)
உதிரிகள் 4
மொத்தம் (20 ஓவரில் 6 விக்.,) 142
விக்கெட் வீழ்ச்சி: 1-64(முரளிவிஜய்), 2-66(ரெய்னா), 3-118(தோனி), 4-122(மைக்கேல் ஹசி), 5-(ஆல்பி மார்கல்), 6-142(அனிருதா).
பந்து
வீச்சு: நாதன் மெக்கலம் 2-0-12-0, டெய்லர் 4-0-30-3, தாமஸ் 4-0-29-2,
முரளி கார்த்திக் 4-0-29-0, ராகுல் சர்மா 4-0-27-1, யுவராஜ் சிங் 2-0-14-0.
புனே வாரியர்ஸ்
ரைடர்(ப)அஷ்வின் 15(11)
மோனிஷ்(ப)மார்கல் 9(9)
பாண்டே(ப)மார்கல் 12(9)
உத்தப்பா(ப)அஷ்வின் 0(4)
யுவராஜ்(கே)ஜகாதி(ப)மார்கல் 34(43)
மன்ஹாஸ்(கே)தோனி(ப)போலிஞ்சர் 20(23)
மெக்கலம்(கே)ஜகாதி(ப)போலிஞ்சர் 15(16)
ராகுல்-ரன் அவுட்(தோனி) 1(1)
டெய்லர்-ரன் அவுட்(சப்ஸ்-முகுந்த்) 2(1)
கார்த்திக்-அவுட் இல்லை- 1(2)
தாமஸ்-அவுட் இல்லை- 1(2)
உதிரிகள் 7
மொத்தம் (20 ஓவரில் 9 விக்.,) 117
விக்கெட்
வீழ்ச்சி: 1-19(மோனிஷ் மிஸ்ரா), 2-27(ரைடர்), 3-40(மனிஷ் பாண்டே),
4-40(உத்தப்பா), 5-78(மிதுன் மன்ஹாஸ்), 6-109(யுவராஜ் சிங்), 7-110(ராகுல்
சர்மா), 8-114(டெய்லர்), 9-114(நாதன் மெக்கலம்).
பந்து வீச்சு: மார்கல் 4-0-29-3, போலிஞ்சர் 4-0-20-2, அஷ்வின் 4-1-19-2, ரந்திவ் 4-0-23-0, ரெய்னா 2-0-11-0, ஜகாதி 2-0-12-0.

நன்றி தினமலர்