சென்னை:ராஜஸ்தான் ராயல்ஸ் அணிக்கு எதிரான ஐ.பி.எல்., லீக் போட்டியில், சென்னை சூப்பர் கிங்ஸ் அணி, 7 விக்கெட்டுகள் வித்தியாசத்தில் "திரில்' வெற்றி பெற்றது. கடைசி பந்தில் தோனி, 2 ரன்கள் எடுத்து வெற்றிக்கு கைகொடுத்தார்.
ஐந்தாவது ஐ.பி.எல்., "டுவென்டி-20' தொடரின் லீக் போட்டிகள் தற்போது நடக்கின்றன. இதில் நேற்று சென்னை சேப்பாக்கத்தில் நடந்த போட்டியில் சென்னை சூப்பர் கிங்ஸ், ராஜஸ்தான் ராயல்ஸ் அணிகள் மோதின. "டாஸ்' வென்ற ராஜஸ்தான் அணி கேப்டன் டிராவிட், "பேட்டிங்' தேர்வு செய்தார்.
சென்னை அணியில் மாற்றம் எதுவுமில்லை. ராஜஸ்தான் அணியில் போத்தா, பங்கஜ் சிங், யாக்னிக் நீக்கப்பட்டு கூப்பர், ஸ்டூவர்ட் பின்னி, கோஸ்வாமி இடம் பெற்றனர்.
ரகானே ஏமாற்றம்:
ராஜஸ்தான் அணிக்கு டிராவிட், ரகானே இணைந்து சுமாரான துவக்கம் தந்தனர். குலசேகரா பந்தில் பவுண்டரி அடித்து ரன் கணக்கை துவக்கினார் ரகானே. பின் பிராவோ ஓவரில் அடுத்தடுத்து பவுண்டரிகள் விளாசிய இவர், 15 ரன்னில் அஷ்வின் சுழலில் வீழ்ந்தார்.
ஷா அரைசதம்:
மறு முனையில் போலிஞ்சர், குலசேகரா பந்துகளை பவுண்டரிக்கு அனுப்பிய டிராவிட், பிராவோ பந்தில் சிக்சர் அடித்து அசத்தினார். ஜகாதி பந்திலும் ஒரு சிக்சர் அடித்த டிராவிட் (26), இவரிடமே சிக்கினார்.
அடுத்து இணைந்த ஓவேஸ் ஷா, மனேரியா ஜோடி சற்று நிதான ஆட்டத்தை வெளிப்படுத்த, ஸ்கோர் மந்தமாக உயர்ந்தது. ஜடேஜா வீசிய போட்டியின் 15வது ஓவரில் ஓவேஸ் ஷா தலா ஒரு சிக்சர், பவுண்டரி அடித்தார். இத்துடன் உதிரியாக 10 ரன்களும் சேர்ந்து கொள்ள, இந்த ஓவரில் மட்டும் 22 ரன்கள் கிடைத்தது.
போலிஞ்சர், பிராவோ வீசிய அடுத்தடுத்த ஓவர்களில் ஒரு சிக்சர், 3 பவுண்டரிகள் அடிக்கப்பட, ஸ்கோர் சற்று வேகமாக சென்றது. இந்நிலையில் மனேரியா (36) அவுட்டானார். கடைசி ஓவரில் அரைசதம் அடித்த ஓவேஸ் ஷாவும் (52) வெளியேற, ராஜஸ்தான் ராயல்ஸ் 20 ஓவரில் 4 விக்கெட்டுக்கு 146 ரன்கள் எடுத்தது.
டு பிளசி அதிரடி:
எட்டிவிடும் இலக்கை துரத்திய சென்னை அணிக்கு பத்ரிநாத், டு பிளசி ஜோடி நல்ல துவக்கம் தந்தது. பின்னி வீசிய போட்டியின் இரண்டாவது ஓவரில் 3 பவுண்டரி அடித்தார் டு பிளசி. தொடர்ந்து அசத்திய இவர், அமித் சிங் ஓவரில் இரு பவுண்டரி விளாசினார். பின் மனேரியா பந்தை சிக்சருக்கு அனுப்பினார்.
மறுமுனையில் பந்துகளை வீணடித்த பத்ரிநாத் 15 ரன்னில் (22 பந்து), பிராட் ஹாக் சுழலில் "ஸ்டம்டு' ஆனார். திரிவேதி, கூப்பர் பந்துகளில் பவுண்டரி அடித்தார் ரெய்னா. அபார ஆட்டத்தை தொடர்ந்த டு பிளசி, இத்தொடரில் மூன்றாவது முறையாக அரைசதம் கடந்தார்.
திடீர் திருப்பம்:
திரிவேதி பந்தில் சிக்சர் அடித்த டு பிளசி (73 ரன்கள், 52 பந்து), கூப்பர் பந்தில் அவுட்டானார். இதே ஓவரின் மூன்றாவது பந்தில் 26 ரன்கள் எடுத்திருந்த ரெய்னாவும் அவுட்டாக, போட்டியில் திடீர் திருப்பம் ஏற்பட்டது. அமித் சிங் வீசிய போட்டியின் 18வது ஓவரில் பிராவோ, தோனி தலா ஒரு பவுண்டரி அடிக்க, சற்று "டென்ஷன்' குறைந்தது.
"திரில்' வெற்றி:
கடைசி ஓவரில் சென்னை அணியின் வெற்றிக்கு 8 ரன்கள் தேவைப்பட்டன. பின்னி வீசிய இந்த ஓவரின் முதல் இரு பந்தில், 2 ரன்கள் எடுக்கப்பட்டன. 3வது பந்தில் தோனி 2 ரன்கள் எடுத்தார். அடுத்த இரு பந்தில் 2 ரன்கள் மட்டும் எடுக்கப்பட, கடைசி பந்தில், வெற்றிக்கு 2 ரன்கள் தேவைப்பட்டன.
பந்தை எதிர்கொண்ட தோனி, "ஸ்கொயர் லெக்' திசையில் அடித்து 2 ரன்கள் எடுக்க, சென்னை சூப்பர் கிங்ஸ் அணி, 20 ஓவரில் 3 விக்கெட்டுக்கு 147 ரன்கள் எடுத்து "திரில்' வெற்றி பெற்றது. தோனி (15), பிராவோ (16) அவுட்டாகாமல் இருந்தனர்.
தேவையா இழுபறி
நேற்று சென்னை அணி, 147 ரன்கள் என்ற இலக்கை எளிதாக எட்டியிருக்கலாம். கடைசி 12 பந்தில் 16 ரன்கள் தான் தேவைப்பட்டன. ஆனால், தோனியும், பிராவோவும் ஒன்றும், இரண்டுமாக ரன்கள் சேர்த்து, போட்டியை கடைசி பந்து வரை கொண்டு சென்றனர். இது ரசிகர்கள் மத்தியில் அதிருப்தியை ஏற்படுத்தியது.