[You must be registered and logged in to see this image.]

பெங்களூரு:ஐ.பி.எல்., லீக் போட்டியில் கடைசி பந்தில் சவுரப் திவாரி சிக்சர் விளாச, பெங்களூரு ராயல் சாலஞ்சர் அணி 6 விக்கெட் வித்தியாசத்தில் திரில் வெற்றி பெற்றது. கெய்ல் புயல் வேகத்தில் விளாசிய 81 ரன்கள், டிவிலியர்சின் அதிரடி 33 ரன்கள், பெங்களூரு அணியின் வெற்றிக்கு கைகொடுத்தது.புனே அணியின் போராட்டம் வீணானது.பெங்களூருவில் நேற்று நடந்த ஐந்தாவது ஐ.பி.எல்., தொடரின் 21வது லீக் போட்டியில் புனே வாரியர்ஸ், பெங்களூரு ராயல் சாலஞ்சர்ஸ் அணிகள் மோதின. டாஸ் வென்ற புனே கேப்டன் கங்குலி, பேட்டிங் தேர்வு செய்தார்.அதிரடி துவக்கம்:புனே அணிக்கு உத்தப்பா, ஜெசி ரைடர் இணைந்து அதிரடி துவக்கம் தந்தனர். தில்ஷன் ஓவரில் உத்தப்பா அடுத்தடுத்து ஒரு சிக்சர், பவுண்டரி விளாசினார். மறுபக்கம் ஜாகிர், ஹர்ஷல் படேல் பந்துவீச்சை அடித்து நொறுக்கினார் ரைடர். முதல் விக்கெட்டுக்கு 63 ரன்கள் சேர்த்த நிலையில், ரைடர்(34) அவுட்டானார். தனது அசத்தல் ஆட்டத்தை தொடர்ந்த உத்தப்பா, அப்பன்னா பந்தை சிக்சருக்கு அனுப்பினார். பின் ஹர்ஷல் படேல், தில்ஷன் பந்துகளை பவுண்டரிக்கு விரட்டிய இவர், அரைசதம் கடந்தார்.கங்குலி ஏமாற்றம்:வினய் குமார் வேகத்தில் கங்குலி(6) வீழ்ந்தார். இந்த நேரத்தில் பெங்களூரு கேப்டன் வெட்டோரியின் பந்தை அவசரப்பட்டு அடித்த உத்தப்பா 69 ரன்களுக்கு(45 பந்தில், 9 பவுண்டரி, 2 சிக்சர்) அவுட்டாக, ரன் வேகம் குறைந்தது.கடைசி கட்டத்தில் ஸ்டீவன் ஸ்மித், மர்லான் சாமுவேல்ஸ் சேர்ந்து நம்பிக்கை தந்தனர். அப்பன்னா, வினய் குமார் ஓவரில் தலா ஒருசிக்சர் அடித்தார் சாமுவேல்ஸ். மறுபக்கம் வெட்டோரி சுழலில் ஸ்மித் ஒரு சிக்சர் விளாசினார். ஸ்மித்(16) ரன் அவுட்டானார். சாமுவேல்சும்(34) ரன் அவுட்டானார். மாத்யூஸ்(10) சோபிக்கவில்லை. புனே வாரியர்ஸ் அணி 20 ஓவரில் 6 விக்கெட்டுக்கு 182 ரன்கள் எடுத்தது. மன்ஹாஸ்(6) அவுட்டாகாமல் இருந்தார்.கடின இலக்கை விரட்டிய பெங்களூரு அணி துவக்கத்தில் திணறியது. டிண்டா பந்தை தனது கண்டுபிடிப்பான ஸ்கூப் முறையில் அடிக்க முயன்ற தில்ஷன்(4), விக்கெட்கீப்பர் உத்தப்பாவிடம் கேட்ச் கொடுத்து வெளியேறினார். நெஹ்ரா ஓவரில் ஒரு பவுண்டரி, இரண்டு சிக்சர் அடித்த நம்பிக்கை தந்தார் கெய்ல். மயன்க் அகர்வால்(9) தாக்குப்பிடிக்கவில்லை. மந்தமாக ஆடிய விராத் கோஹ்லி(16), மாத்யூஸ் பந்தில் வெளியேறினார். அப்போது பெங்களூரு அணி 11.5 ஓவரில் 3 விக்கெட்டுக்கு 72 ரன்கள் எடுத்திருந்தது.பின் ராகுல் சர்மா ஓவரில் 5 சிக்சர் அடித்த கெய்ல், போட்டியில் திருப்புமுனை ஏற்படுத்தினார். தொடர்ந்து நெஹ்ரா பந்திலும் ஒரு சிக்சர் அடித்தார். அடுத்த பந்தை நெஹ்ரா யார்க்கராக வீச, கெய்ல் 81 ரன்களுக்கு( 48 பந்தில், 4 பவுண்டரி, 8 சிக்சர்)போல்டானார். அடுத்து வந்த டிவிலியர்ஸ் அதிரடியாக ஆடினார். இவருக்கு சவுரப் திவாரி நன்கு ஒத்துழைப்பு அளித்தார்.கடைசி ஓவரில் பெங்களூரு அணியின் வெற்றிக்கு 21 ரன்கள் தேவைப்பட்டன. நெஹ்ரா சொதப்பலாக பந்துவீசினார். முதல் பந்தில் சவுரப் திவாரி ஒரு ரன் எடுத்தார். 2வது பந்தில் டிவிலியர்ஸ் பவுண்டரி அடித்தார். 3வது பந்தில் சிக்சர் அடித்தார். 4வது பந்தில் டிவிலியர்ஸ் இன்னொரு சிக்சர் அடிக்க, டென்ஷன் எகிறியது. 5வது பந்தில் ஒரு ரன். 6வது பந்தில் சவுரப் திவாரி சிக்சர் அடித்து வெற்றியை உறுதி செய்தார். அப்போது மழை பெய்ய, பெங்களூரு ரசிகர்கள் வெற்றியை உற்சாகமாக கொண்டாடினர். பெங்களூரு அணி 20 ஓவரில் 4 விக்கெட்டுக்கு 186 ரன்கள் எடுத்து வெற்றி பெற்றது. சவுரப் திவாரி(36), டிவிலியர்ஸ்(33) அவுட்டாகாமல் இருந்தனர்.5 பந்தில் 5 சிக்சர்நேற்று போட்டியின் 13வது ஓவரை ராகுல் சர்மா வீசினார். முதல் பந்தில் சவுரப் திவாரி ஒரு ரன் எடுத்தார். இரண்டாவது பந்தை சிக்சருக்கு விரட்டினார் கெய்ல். தொடர்ந்து 3, 4, 5, 6வது பந்துகளும் சிக்சருக்கு பறந்தன. கெய்ல் வரிசையாக 5 சிக்சர்கள் அடிக்க, இந்த ஓவரில் மட்டும் 31 ரன்கள் எடுக்கப்பட்டன. ஐ.பி.எல்., வரலாற்றில் அதிக சிக்சர்கள்(85) அடித்தவர்கள் பட்டியலில் முதலிடத்துக்கு முன்னேறினார்.