காஷ்மீரில், முழு அடைப்பு போராட்டத்திற்கு எதிர்ப்பு தெரிவித்து, நூற்றுக்கும் மேற்பட்டோர் திரண்டு ஆர்ப்பாட்டம் நடத்தினர். கண்ணீர் புகை குண்டுகளை வீசியும், தடியடி நடத்தியும் பொலிசார் அவர்களைக் கலைத்தனர்.

காஷ்மீரில், கடந்த ஜூன் மாதம் முதல் வன்முறைச் சம்பவங்கள் நடந்து வருகின்றன. இதனால், அங்கு ஊரடங்கு உத்தரவு பிறப்பிக்கப்பட்டு வருகிறது. அங்கு இயல்புநிலை திரும்பத் தொடங்கியுள்ளதையடுத்து, ஊரடங்கு விலக்கிக் கொள்ளப்பட்டுள்ளது.

இந்நிலையில், பிரிவினைவாத அமைப்புகள் மூன்று நாள் முழு அடைப்புப் போராட்டத்திற்கு அழைப்பு விடுத்தன. இதனால், காஷ்மீரில் வணிக வளாகங்கள், கடைகள், பள்ளி, கல்லூரிகள் அனைத்தும் அடைக்கப்பட்டன. போக்குவரத்து முற்றிலும் முடங்கியுள்ளது. மக்களின் இயல்பு வாழ்க்கை அடியோடு பாதிக்கப்பட்டுள்ளது.

முழு அடைப்பு போராட்டத்திற்கு எதிர்ப்பு தெரிவித்து, பஸ்களில் வந்த நூற்றுக்கும் மேற்பட்டோர், லால் சவுக் பகுதியில் ஒன்று திரண்டு ஆர்ப்பாட்டம் நடத்தினர். தங்களது கையில் வெள்ளைக்கொடியை ஏந்தியபடி, ஆர்ப்பாட்டத்திற்கு எதிராகக் கோஷமிட்டனர்.

முழு அடைப்புப் போராட்டத்தால், தங்களது இயல்பு வாழ்க்கை அடியோடு பாதிக்கப்பட்டுள்ளதாகவும், எனவே, அதை கைவிட வேண்டும் என்றும் அவர்கள் கோரிக்கை விடுத்தனர். அவர்களைக் கலைந்து செல்லுமாறு பாதுகாப்புப் படையினர் எச்சரிக்கை விடுத்தனர்.

ஆனால், அவர்கள், பாதுகாப்புப் படையினர் மீதும் கற்களை வீசித் தாக்குதல் நடத்தினர். இதனால், ஆர்ப்பாட்டக்காரர்கள் மீது பாதுகாப்புப் படையினர் கண்ணீர் புகை குண்டுகளை வீசியும், தடியடி நடத்தியும் கூட்டத்தைக் கலைத்தனர். இதனால், அங்கு பெரும் பதட்டம் ஏற்பட்டது. _