ஊட்டி ரோஜா பூங்காவில் 7ம் தேதி கண்காட்சி துவக்கம்

ஊட்டி:ஊட்டியில் வரும் 7ம் தேதி ரோஜா கண்காட்சி துவங்குகிறது. பச்சை, நீல
வண்ணங்களில் அரிய வகை ரோஜாக்கள் தயார்படுத்தப்பட்டுள்ளன.ஊட்டியில் கோடை
விழாவுக்காக பல்வேறு ஏற்பாடுகள் செய்யப்பட்டுள்ளன. ரோஜா கண்காட்சி, மலர்
கண்காட்சி, காய்கறி கண்காட்சி, வாசனை திரவிய கண்காட்சி மற்றும் பழக்காட்சி
வரும் 7ம் தேதியில் இருந்து, 29ம் தேதி வரை நடக்கிறது. இதன் ஒரு பகுதியாக,
7ம் தேதி முதல் நிகழ்ச்சியாக ரோஜா கண்காட்சி துவக்கப்படுகிறது.இதற்கென ரோஜா
பூங்கா சிறப்பான முறையில் தயார்படுத்தப்பட்டுள்ளது. மூன்றாயிரத்துக்கும்
மேற்பட்ட ரகங்களில், பல வண்ணங்களில் ரோஜா மலர்கள் பூத்துள்ளன. இதில், சில
தளங்களை தவிர, மற்ற அனைத்து பகுதிகளிலும், ரோஜா மலர்கள் பூத்துக்
குலுங்கியுள்ளன. இந்த காட்சி பார்வையாளர்களை பரவசப்படுத்துவதாக
உள்ளது.தற்போது, சுற்றுலா பயணிகளின் கூட்டம் அதிகரித்து வருகிறது.
தாவரவியல் பூங்காவுக்கு செல்லும், பெரும்பாலான சுற்றுலா பயணிகள் ரோஜா
பூங்காவுக்கும் வருகின்றனர். பச்சை, நீலம் உட்பட பல வண்ணங்களில் அரியவகை
ரோஜாக்கள் உள்ளன.கண்காட்சியின் ஒரு பகுதியாக, தனியார் பூங்காக்களுக்கான
போட்டிகளும் நடத்தப்பட்டு, பரிசுகளும் வழங்கப்படுகின்றன.

நன்றி தினமலர்