“ ஜனநாயகத்தை கொலை செய்யும் அரசாங்கம் ” பிரதமருக்கு கடும் விமர்சனத்துடன் ஹசாரே கடிதம்
புதுடில்லி: லோக்பால் மசோதாவில் மாற்றம் கொண்டு வரும்வரை நான் ஓய மாட்டேன் என கூறி வரும் காந்தியவாதியான அன்னா ஹசாரே பிரதமருக்கு எழுதியுள்ள கடிதத்தில் உங்களுடைய அரசாங்கம் ஜனநாயகத்தை கொலை செய்கிறது என்று கடுமையாக விமர்சித்துள்ளார். வரும் 16 ம் தேதி சாகும்வரை உண்ணாவிரத போராட்டத்தை ஹசாரே துவக்கவுள்ளார். டில்லி போலீசார் தரப்பில் 72 மணி நேரம் மட்டுமே காலம் ஒதுக்கியிருப்பதால் இதனை ஏற்க முடியாது என ஹசாரே குழுவினர் தெரிவித்துள்ளனர்.

இது தொடர்பாக ஹசாரே, பிரதமருக்கு எழுதியுள்ள கடிதத்தில் சாத்வீகமான முறையில் நடத்தவிருக்கும் இந்த போராட்டத்திற்கு நாங்கள் கேட்ட இடத்தை தர டில்லி போலீசார் மறுத்துள்ளனர். இது போராட்டத்ததை திட்டமிட்டு ஒடுக்கும் அரசின் நோக்கம் என்பது தெளிவாகிறது. எங்களின் அமைதி போராட்டத்திற்கு பாரபட்சமின்றி உங்களால் ( பிரதமர் ) இடம் பெற்று தர முடியுமா ? முடியாது. தங்களின் அரசு மக்களின் அடிப்படை உரிமைகளுக்கு கூட தடை விதிக்கிறது. ஊழலுக்கு எதிரான எங்களின் குரலை நெரிக்க திட்மிடுகிறீர்கள். உங்களுடைய அரசாங்கம் சுதந்திரம் அடைந்த காலம் முதல் வெறும் ஊழல் நிறைந்ததாக இருக்கிறது என மக்களே கருத்து தெரிவிக்கின்றனர். மக்களின் அடிப்படை உரிமைகளை மறுக்கும் உங்கள் அரசாங்கம் ஜனநாயகத்தை கொலை செய்வதுடன் அரசியலமைப்பு சட்டத்திற்கும் எதிராக செயல்படுகிறீர்கள் . நாங்கள் நடத்தவிருக்கும் போராட்டத்தில் கைது செய்யதாலும் நாங்கள் அஞ்ச மாட்டோம் என்று கடுதமையாக எழுதியுள்ளார். இவரது கடிதம் இந்தியில் எழுதி அனுப்பி வைக்கப்பட்டுள்ளது.


உலகம் முழுவதும் உருவாகும் அன்னா ஹசாரேக்கள்: லோக்பால் மசோதாவில் மாற்றம் கொண்டு வரவேண்டும் என்று ஊழலுக்கு எதிரான கோஷத்துடன் களம் இறங்கியிருக்கும் தியாகி அன்னா ஹசாரேவுக்கு உலகம் முழுவதும் உள்ள இந்தியர்கள் மத்தியில் ஆதரவு பெருகி வருகிறது. ஐ.நா., சபை வளாகம் முன்பு ஹசாரே தோற்றத்தில் காகித தொப்பி அணிந்தும் அவரைப்போல குர்தா அணிந்தும் இந்திய அரசுக்கு எதிராக கோஷங்கள் எழுப்பினர்.

ஊழல்வாதிகள் தண்டிக்கப்பட வேண்டும், உலகம் முழுவதும் ஒளிந்து கிடக்கும் கறுப்பு பணத்தை இந்திய திருநாட்டிற்கு கொண்டு வரவேண்டும் என்றும் வலியுறுத்தி கடந்த ஏப்ரல் மாதம் சாகும் வரை உண்ணாவிரத போராட்டத்தை துவக்கினார் ஹசாரே. இவரது போராட்டத்திற்கு இந்தியா முழுவதும் ஆதரவு பெருகியது. இதனையடுத்து லோக்பால் வரைவு கமிட்டியில் ஹசாரே மற்றும் சமூக ஆர்வலர்கள் சிலரை சேர்க்க சம்மதம் தெரிவித்தது. இருப்பினும் இந்தக்குழுவினர் பரிந்துரைத்த கருத்துக்களை மத்திய அரசு புறக்கணித்து தன்னிச்சையாக இறுதி வடிவம் கொடுத்துள்ளது.

இதனால் அதிருப்தியுற்ற அன்னாஹசாரே மீண்டும் தனது போராட்டம் தொடரும் ஆகஸ்ட் 16 ம் தேதி முதல் சாகும்வரை உண்ணாவிரத போராட்டம் இருக்கப்போகிறேன் என்று அறிவித்துள்ளார். இவரது போராட்டத்திற்கு போலீசார் உரிய அனுமதி எதுவும் வழங்கவில்லை. இதனால் இவர் கைது செய்யப்படும் சூழலுக்கு செல்ல நேரிடும் . தொடர்ந்து பல்வேறு பிரச்னைகள் எழும் என தெரிகிறது.

இந்நிலையில் நியூயார்க்கில் உள்ள ஐக்கியநாடு சபை முன்பு இந்திய ஊழல் ஒழிப்பு சமூக நல விரும்பிகள் சுமார் 50 க்கும் மேற்பட்டோர் திடீர் ஆர்ப்பாட்டம் நடத்தினர். போராட்டத்தில் பங்கேற்றவர்கள் ஹசாரே போன்ற தோற்றத்துடன் ( குல்லா மற்றும் குர்தாவுடன்) பலர் வந்திருந்தனர். மூவண்ண தேசிய கொடியுடன் வந்த இவர்கள் கையில் பல்வேறு பதாகைகளும் கொண்டு வந்திருந்தனர். இதில் லோக்பால் ஜோக்பால் , ஊழல்வாதிகளை ஜெயிலுக்கு அனுப்பு, அதிகாரத்தை தவறாக பயன்படுத்துவதை நிறுத்து என உள்ளிட்ட வாசகங்கள் இருந்தன.

ஆர்ப்பாட்டத்தில் பங்கேற்ற நியூஜெர்சியை சேர்ந்த பார்த்ததுரகா என்பவர் கூறுகையில்; நாங்கள் அன்னாஹசாரேவுக்கு கொள்கைக்கு ஆதரவு தெரிவித்து போராட களம் இறங்கியிருக்கிறோம். உலகம் முழுவதும் உள்ள இந்தியர்களின் ஒருங்கிணைந்த ஆதரவு ஹசாரேவுக்கு பெருகி வருகிறது. சிறந்த அரசியலமைப்பு அங்கம் உருவாக்கப்படும்போது சாமானிய மனிதனும் பலன் பெற முடியும். ஹசாரே கொள்கைகளை மத்திய அரசு ஏற்கும் வரை நாங்கள் தொடர்ந்து போராடுவோம் என்றார்.

அமெரிக்க அதிகாரி கருத்தினால் சர்ச்சை: இந்நிலையில் அமெரிக்க வெள்ளை மாளிகை செய்திதொடர்பாளர் விக்டோரியா என்பவர் அளித்துள்ள பேட்டியில் ; ஜனநாயக ரீதியிலான போராட்டத்தை இந்திய அரசு நசுக்க கூடாது என்றும் , அஹிம்சை போராட்டத்திற்கு அமெரிக்கா எப்போதும் ஆதரவு தெரிவிக்கும் என்றும் கூறினார். இவரது கருத்து காங்கிரசுக்கு எரிச்சலை ஏற்படுத்தியிருக்கிறது. இந்திய நாட்டில் உள்ள விஷயம் குறித்து அறிந்து கொள்ளாமல் அமெரிக்கா தெரிவித்துள்ள கருத்து முறையானதல்ல என்றும் இது மிக்க கவனத்தில் எடுத்துக்கொள்ளப்படும் என்றும் காங்., செய்தி தொடர்பாளர் அபிஷேக்சிங்வி கூறியுள்ளார். பா.ஜ.,வும் கண்டனம் தெரிவித்துள்ளது.
நன்றி தினமலர்