பன்னி மேய்க்கிற ஒரு வில்லனுக்கும், 'தண்ணி' விற்கிற ஹீரோவுக்கும் இடையே நடக்கும் மோதல்தான் கதை.
பப்ளிக்காக பன்றியை கொன்று அவ்வப்போது பெண்களையும் கொல்லும் கற்கால
வில்லன். அவனிடம் அடிமைப்போல கஞ்சாவும், கள்ளச் சாராயமும் விற்கும் ஹீரோ.
காம்பினேஷன் சரியில்லையே என்று யோசிக்கும் போது வருகிறது இருவரின் பால்யகால
ஃபிளாஷ்பேக். வேலைக்காரன் மகன் என்னைவிட புத்திசாலியாக இருக்கக் கூடாது
என்று அந்த பிஞ்சு வயசிலேயே ஹீரோ ஹரிகுமாருக்கு நஞ்சை பழக்குகிறார் வில்லன்
சாய் ரவி. முதலாளியின் சத்தியத்துக்கு கட்டுப்பட்டு அனைத்தையும் சகித்துக்
கொள்ளும் ஹரிகுமாரின் காதலுக்கும் சாய் ரவி குறுக்கே நிற்கிறார். ஒரு
கட்டத்தில் தான் காதலிக்கும் அருந்ததியை கடத்தி திருமணம் செய்து கொள்ளவும்
முற்படுகிறார் சாய் ரவி. பொறுமை இழந்த ஹரிகுமார் வில்லன் கூட்டத்துடன்
மோதுகிறார், ஜெயிப்பது யார் என்பது இறுதிக்காட்சி.
'மதுரை சம்பவம்' படத்துக்குப் பிறகு ஹரிகுமார் நடித்திருக்கும் படம்.
இந்தப் படத்தில் எல்லாப் பழியையும் சுமக்கும் தியாகத்திருவுரு கேரக்டர்
ஹரிகுமாருக்கு. எந்த சிச்சுவேஷனுக்கும் எக்ஸ்பிரஷன் மட்டும் காட்டவே
மாட்டேன் என்று அவர் அடம் பிடிப்பதுதான் சரியில்லை. பிடிவாதத்தை விடுங்க
பாஸ். இவருக்கு பக்க வாத்தியமாக சூரி. காமெடியனாக வருகிறவரின் கழுத்தில்
சுருக்கு மாட்டி தொங்க விடுகிறார்கள். ஹீரோவுக்கு கோபம்வர என்னவெல்லாம்
செய்ய வேண்டியிருக்கிறது. என்ன... நடன இயக்குநராக இருந்து ஹீரோவானதால்,
ஹரிகுமாரின் நடனம் ரசிக்கும்படியாக இருக்கிறது.
கதாநாயகியாக 'வெளுத்துக்கட்டு' அருந்ததி. ஹரிக்குமார் காதலை சொன்னதும்,
உன்னை எல்லாம் யாரு காதலிப்பா என்று படக்கென்று முறுக்கும் போது அடடா இது
நல்லாயிருக்கே என்று தோன்றுகிறது. அவரே அடுத்தக் காட்சியில் பால்ய நட்பை
சொல்லி ஹரிகுமாரிடம் பம்மும் போது சப். வழக்கமான ஹீரோயின்.
படத்தில் மிரட்டோ மிரட்டென்று மிரட்டுவது பன்னி மேய்க்கிற அந்த வில்லன்
சாய் ரவிதான். இவர் வருகிற காட்சிகள் எல்லாம் அடிவயிற்றில் பந்து
சுழல்கிறது.
தனது மனைவியை காப்பாற்றுவதற்காக நண்பனின் தம்பியை காட்டிக் கொடுக்கும்
சூரி, கடைசியில் தற்கொலை செய்து கொள்கிற காட்சி மனசை ரம்பம் போட்டு
அறுக்கிறது. அதை தவிர மற்ற காட்சிகளில் எல்லாம் அவர் போடுகிற ரம்பம் வேறு
ரகம்!
ஆரம்பத்தில் சஸ்பென்சாக செல்லும் கதையில், பிளாஷ்பேக் வரும்போது ஓரளவு
விறுவிறுப்பு தெரிகிறது. என்றாலும் காட்சிகள் ஏற்கனவே நிறைய படங்களில்
பார்த்தது போன்றே இருப்பதால் படம் தொடங்கிய ஒரு பதினைந்து நிமிடத்திலேயே
போர் அடிக்கிறது. அவ்வப்போது ஒரு பாடல் இளையராஜா ஸ்டைலில் வந்து கொஞ்சம்
நிமிர்ந்து உட்கார வைக்கிறது. கதையிலும், காட்சிகளிலும் பெரிதாக சுவராஸ்யம்
எதுவும் இல்லை.
ஹரிகுமார் அடங்கிப் போவதற்கு முதலாளியின் சத்தியம், மூளை வளர்ச்சி
இல்லாத சகோதரன் என்று காரணங்களை அடுக்கியிருக்கிறார் இயக்குநர்.
காட்சிகளுக்கான லாஜிக்கை உருவாக்குவதில் இயக்குநர் ஞானம் இன்னொரு ஹரி.
பன்றி பிடிக்கும் வில்லன் நல்ல கற்பனை. பன்றியை கொல்லும் உலக்கையால்
ஹரிகுமாரின் மூளை வளர்ச்சியில்லாத தம்பியை கொல்வது... தேவையில்லாத கொடூரம்.
காதல், சென்டிமென்ட், ஆக்ஷன் என்று மூன்றையும் கலந்து கொடுத்திருக்கும்
இயக்குநர் ஞானம் வழக்கமான கதை என்றாலும் இன்னும் லேட்டஸ்டாக
வெளிப்படுத்தியிருக்கலாம். ஜான்பீட்டர் பாடல்கள் பழைய ரகம் என்றாலும் கேட்க
இனிமையாக உள்ளது. பின்னணி இசையில் சபாஷ் வாங்குகிறார். தனது ஒளிப்பதிவில்
கிராமத்து அழகை நன்றாக காண்பித்துள்ளார் பிரபாகர். எடிட்டிங்கின் மூலமாக
படத்தை இன்னும் கொஞ்சம் மெருகேற்றி இருக்கலாம்.
போடிநாயக்கனூர் கணேசன் - அன்புக்கு இவன் அடிமை! அதுதான் மிக கொடுமை!!!


நடிகர்கள்
ஹரிகுமார், அருந்ததி, சூரி, சாய் ரவி,
இசை
ஜான் பீட்டர்
இயக்கம்
ஓ. ஞானம்
தயாரிப்பு
ஆதிலெட்சுமி, அதுல் கிருஷ்ணா

நன்றி கூடல்

[You must be registered and logged in to see this image.]
-
:héhé: