இலவச மின்சாரம், மின்திருட்டை கண்டறியவும், அதிக பயன்பாடு
நேரத்தை கண்டறியவும், 65 லட்சம் இணைப்புகளுக்கு, ஆன்-லைன் மின் மீட்டர்கள்
பொருத்தப்பட உள்ளன. இதற்காக, தமிழக மின்வாரியத்திற்கு, மத்திய அரசு 400
கோடி ரூபாய் நிதி அளித்துள்ளது.தமிழகத்தில், 2 கோடியே 23 லட்சம் மின்
இணைப்புகள் உள்ளன. இதற்கு, தினமும் 23 கோடியே 70 லட்சம் யூனிட்கள்
மின்சாரம் செலவாகிறது. இதில், வீடுகளுக்கான ஒரு கோடியே 48 லட்சம்
இணைப்புகளுக்கு, மானிய விலையில் மின்சாரம் வழங்கப்படுகிறது. இதேபோல்,
தெருவிளக்குகள், வழிபாட்டுத் தலங்கள், அரசு கட்டடங்கள், உள்ளாட்சி
அமைப்புகள் ஆகியவற்றுக்கும் மானிய விலை மின்சாரம் சப்ளையாகிறது.

இதுமட்டுமின்றி,
20 லட்சம் விவசாய இணைப்புகளுக்கும், 10 லட்சம் குடிசைகளுக்கும் இலவசமாக
மின்சாரம் அளிக்கப்படுகிறது. இவை அனைத்திற்கும் சேர்த்து நடப்பு ஆண்டிற்கு
மட்டும், அரசின் சார்பில், 2,070 கோடி ரூபாய் மின்துறைக்கு மானியமாக
வழங்கப்படுகிறது.ஆனால், மானியத்தை விட அதிக அளவில் மின்சாரம்
பயன்படுத்தப்படுவதால், மின்துறையில் பெரும் நஷ்டம் ஏற்படுகிறது. இதை
ஈடுகட்ட இலவச மின்சாரம், திருட்டு மின்சாரம் மற்றும் பயன்பாடு அதிகமுள்ள
நேரங்களில் பயன்படுத்தப்படும் மின் அளவு ஆகியவற்றை கண்டறிந்து, உரிய
நடவடிக்கை எடுக்க, மின்துறை முடிவு செய்துள்ளது.

மத்திய எரிசக்தி
துறை அமைச்சக வழிகாட்டுதல்படி, ஒவ்வொரு மாநில மின்வாரியத்திலும்,
தரமுயர்த்தப்பட்ட மின்சாரம் வழங்கும் திட்ட துறை (ஏ.பி.டி.ஆர்.பி.,) என்ற
தனித்துறை செயல்படுகிறது. இந்த துறை மத்திய அரசின் வழிகாட்டுதல்படி,
உயர்தொழில் நுட்பங்களை புகுத்துதல், மின் திருட்டு தடுப்பு நடவடிக்கை, அதிக
அளவு மின் பயன்பாட்டை கண்டறிந்து அதற்கேற்ற கட்டணம் வசூலித்தல் போன்ற
நடவடிக்கைகளை மேற்கொள்கிறது.இதன் ஒருகட்டமாக, அனைத்து மாநிலங்களிலும்,
ஆன்-லைன் மின் மீட்டர்கள் பொருத்த, மத்திய அரசு உத்தரவிட்டுள்ளது. வரும்
2012, ஜூன் 30ம் தேதிக்குள், இந்த நடவடிக்கையை மேற்கொள்ள மத்திய எரிசக்தி
துறை உத்தரவிட்டுள்ளது.

இதுகுறித்து, தமிழக மின் வாரியம் ஆய்வுகள்
மேற்கொண்டதில், 30 ஆயிரம் பேருக்கு அதிகமான மக்கள் தொகை கொண்ட 110
நகரங்களில், 65 லட்சம் இணைப்புகளுக்கு ஆன்-லைன் மின் மீட்டர்கள் பொருத்த
முடிவு செய்தது. இதற்கு மத்திய அரசு ஒப்புதல் அளித்து, ஆன்-லைன் வசதிக்காக
தமிழக மின்வாரியத்திற்கு, 400 கோடி ரூபாய் நிதியுதவி அளித்துள்ளது.

இதன்படி, சென்னை, திருச்சி, மதுரை, கோவை, நெல்லை, ஈரோடு, தஞ்சாவூர்,
திருப்பூர், நாமக்கல், வேலூர் உள்ளிட்ட 110 நகரங்களில், விவசாய மற்றும்
தொழிற்சாலை இணைப்புகள் உட்பட 65 லட்சம் இணைப்புகளுக்கு, ஆன்-லைன்
மீட்டர்கள் என்ற ரிமோட் மீட்டர்கள் பொருத்தப்பட உள்ளன.

இதுகுறித்து
மின்துறை உயரதிகாரி கூறியதாவது:ஆன்-லைன் மீட்டர்களுக்காக, மத்திய
கிராமப்புற மின்மயமாக்கல் நிறுவனத்திலிருந்து நிதியுதவி பெற்றுள்ளோம்.
சென்னை மின்வாரிய தலைமை அலுவலகத்தில், இதற்கான "டேட்டாபேஸ்' கம்ப்யூட்டர்
மையம் கட்டப்படுகிறது.இன்னும் இரு மாதங்களில், 65 லட்சம் மின் மீட்டர்கள்
வாங்கவுள்ளோம். அதில், தகவல் தொழில்நுட்ப வசதி கொண்ட ஆன்-லைன்
இணைப்புக்கான, "மைக்ரோ சிப்' மற்றும், "மோடம்' பொருத்தப்படும். இதற்கு,
ஒவ்வொரு மீட்டருக்கும் கூடுதலாக 3,000 ரூபாய் வரை செலவாகும். இந்த
மோடத்திலிருந்து, ஒவ்வொரு 15 நிமிடங்களுக்கு ஒரு முறை, தன்னிச்சையாகவே மின்
அளவு கணக்கிடப்பட்டு, டேட்டா சென்டரில் பதிவாகும்.


இந்த
மீட்டர்களை யாரும் சேதப்படுத்தவோ, திருத்தவோ முடியாது. அவ்வாறு செய்தால்,
உடனடியாக அலாரம் அடித்து காட்டி கொடுத்து விடும்.இதற்கு, பிரபலமாகவுள்ள
இன்போசிஸ், ஹெச்.சி.எல்., டி.சி.எஸ்., ரிலையன்ஸ் போன்ற, பல முன்னணி
நிறுவனங்களுடன் பேச்சு நடத்தி, மோடம் பொருத்தப்படும். இதற்கான நிறுவன
பட்டியலை மத்திய அரசு வரையறுத்துள்ளது. ஆன்-லைன் இணைப்புக்கு,
பி.எஸ்.என்.எல்., டெலிபோன் துறையுடன் ஒப்பந்தம் போடப்படும்.இந்த மீட்டர்
மூலம், 24 மணி நேரமும், நுகர்வோரின் பயன்பாட்டை அறிந்து கொள்ளவும், மின்
திருட்டு நடந்தால் கண்டுபிடிக்கவும் முடியும். இலவச விவசாய இணைப்புகளுக்கான
மின் பயன்பாட்டுக்கான சரியான அளவையும் கண்டறிய முடியும்.இவ்வாறு அவர்
கூறினார்.ஹெச்.ஷேக்மைதீன்.

நன்றி தினமலர்