டெல்டா மாவட்டத்தில் கனமழை பெய்து வருவதால் மேட்டூர் அணையில் இருந்து திறந்து விடப்படும் தண்ணீர் அடியோடு நிறுத்தப்பட்டது.

தொடர்ந்து நீர்வரத்து இருப்பதால் 2 நாளில் அணையின் நீர்மட்டம் 2 அடி உயர்ந்தது. மேட்டூர் அணையில் இருந்து கடந்த 5 மாதமாக காவிரி டெல்டா பாசனத்துக்கு தண்ணீர் திறக்கப்பட்டு வருகிறது.

டெல்டா பகுதியின் தேவைக்கு ஏற்ப தண்ணீர் குறைத்தும், அதிகரித்தும் திறக்கப்பட்டு வருகிறது. இதனால் மேட்டூர் அணையின் நீர்மட்டம் குறைந்து வருகிறது. இந்நிலையில் கடந்த ஒருவாரமாக தமிழகத்தில் வடகிழக்கு பருவமழை தீவிரம் அடைந்து கொட்டி வருகிறது. இதனால் தமிழக காவிரி நீர்பிடிப்பு பகுதிகளில் பலத்த மழை பெய்கிறது.

இதனால் காட்டாற்று வெள்ளம் கரைபுரண்டு காவிரியில் ஓடிவருகிறது. இதனால் கடந்த 4 நாட்களாக படிபடியாக மேட்டூர் அணைக்கு வரும் தண்ணீர் அதிகரித்துள்ளது. இதே போல் காவிரி டெல்டா மாவட்டத்திலும் கனமழை கொட்டி வருகிறது. இதனால் அங்கு தண்ணீர் தேவை குறைந்துள்ளது.

இதனால் கடந்த சில நாட்களுக்கு முன்பு அணையில் இருந்து வினாடிக்கு 3 ஆயிரம் கனஅடி மட்டுமே திறக்கப்பட்டது. நேற்று காலை 10 மணிக்கு மேட்டூர் அணையில் இருந்து டெல்டா பாசனத்துக்கு திறக்கப்படும் தண்ணீர் முற்றிலுமாக நிறுத்தப்பட்டது. கால்வாய் பாசனத்துக்கு மட்டும் 300 கனஅடி தண்ணீர் திறக்கப்பட்டு வருகிறது.

மேட்டூர் அணை மூடப்பட்டு நீர்வரத்து அதிகரித்துள்ளதால் அணையின் நீர்மட்டமும் உயர்ந்து வருகிறது. கடந்த 2 நாட்களில் மட்டும் அணையின் நீர்மட்டம் 2 அடி உயர்ந்துள்ளது. இன்று காலை நிலவரப்படி அணையின் நீர்மட்டம் 86.92 அடியாக இருந்தது. அணைக்கு வினாடிக்கு 14 ஆயிரத்து 510 கனஅடி தண்ணீர் வந்து கொண்டிருக்கிறது