தமிழ்.வெப்துனியா.காம்: அமாவாசையன்று அசைவ உணவை தவிர்ப்பது ஏன்? இது அமாவாசை தினத்தன்று தீபாவளி வரும்போதெல்லாம் அசைவ பிரியர்களுக்கு பெரும் பிரச்சனையாகிறதே?

ஜோதிட ரத்னா முனைவர் க.ப.வித்யாதரன்: அமாவாசை என்பது சூரியனும் சந்திரனும் சந்திக்கும் ஒரு புள்ளி. சூரியனை ஆத்மக் காரகன் என்றும் சந்திரனை மனோ காரகன் என்றும் கூறுகின்றோம். அதேபோல் சூரியன் பிதுர் காரகன், சந்திரன் மாதுர் காரகன். இப்படிப்பட்ட நாளில் எதையும் துன்புறுத்தாமல் இருக்க வேண்டும் என்பது ஒரு விதி. அடுத்ததாக, இந்த நாளில்தான் சித்தர்களின் நடமாட்டம் அதிகமாக இருக்கிறது என்பதை நாம் உணர்ந்திருக்கின்றோம். சதுரகிரி, கொல்லிமலை, மாதேஸ்வரன் மலை போன்ற இடங்களில் எல்லாம் அன்றைக்கு விசேடம் என்பது சித்தர்களின் நடமாட்டத்தினால்தான். கையிலாயத்தில் பார்த்தீர்களானாலும் கூட, பரிக்கிரமம், அன்று அந்த அதிர்வே மிக பிரம்மாண்டமாக இருக்கும்.

இவை மட்டுமின்றி, அந்த நாளில் சூரியன், சந்திரன் ஆகியவற்றில் இருந்துவரும் அதிகமான ஈர்ப்புத் தன்மை காரணமாக நமது உடலின் செரிமானத்தில் ஒரு பாதிப்பை ஏற்படுத்துகிறது. செரிமானத்தன்மை அந்த நாளில் குறைப்பதால்தான் அமாவாசையன்று விரதம் மேற்கொள்வது நல்லது என்று நமது முன்னோர்கள் கண்டுள்ளார்கள். சும்மா விரதம் இரு என்றால் யாரும் இருக்க மாட்டார்கள் என்பதற்காகவே, உனது முன்னோர்களுக்காக விரதம் இரு, உனது வாழ்வில் இன்றைக்கு நீ அனுபவிக்கும் அனைத்தையும் பெற்றுத் தந்த அவர்களுக்காக விரதம் இரு என்று கூறிவிட்டனர். இப்படித்தான் அதனை ஒரு நன்றிக்கடன் செலுத்தும் நாளாக ஆக்கியுள்ளனர்.

எனவே, அமாவாசையன்று பொதுவாகவே ஜீவராசிகளை துன்புறுத்தக்கூடாது. இதில் மற்றொரு விடயமும் உள்ளது. சித்த வைத்தியர்களாக இருப்பவர்கள், எனது தாத்தா ஒரு சித்த வைத்தியராகவும் இருந்தார். அன்றைக்கு சில வேர்களை, மூலிகைகளை மருத்துவத்திற்காக எடுப்பார்கள். அப்போது கூட அவர்கள் கட்டு கட்டிவிட்டுத்தான் அவைகளை தொடுவார்கள், எடுப்பார்கள். கற்களால் அந்த மரத்தின் வேரை சுற்றிக் கட்டிவிட்டுதான் அதன் பகுதிகளை எடுப்பார்கள். அப்போது ஒரு சில மந்திரங்களை சொல்லித்தான் எடுப்பார்கள். சித்த வைத்தியத்தைப் பொறுத்தவரை அமாவாசையன்று மூலிகை சேகரித்தல், பதப்படுத்துதல் ஆகியவற்றிற்கு முக்கியத்துவம் உண்டு.