பாமக நிறுவனர் ராமதாஸ் வெளியிட்டுள்ள அறிக்கையில்,

தமிழ்நாட்டில் மக்கள் நலப் பணியில் ஈடுபட்டு வந்த மக்கள் நலப் பணியாளர்கள் 12 ஆயிரம் பேரை தமிழக அரசு ஒரே உத்தரவில் பணி நீக்கம் செய்திருக்கிறது. 12 ஆயிரம் குடும்பங்களை ஒரேநாளில் நடுத்தெருவுக்கு கொண்டு வந்துள்ள தமிழக அரசின் இந்த நடவடிக்கை கடுமையாக கண்டிக்கத்தக்கது.


அரசு நிருவாகத்தில் அரசியல் புகுந்ததன் விளைவாக அ.தி.மு.க. அரசு பதவியேற்கும் போதெல்லாம் மக்கள் நலப் பணியாளர்களும், சாலைப் பணியாளர்களும் பதவிநீக்கம் செய்யப்படுவது வாடிக்கையான ஒன்றாகிவிட்டது. இதற்குமுன் 1991ஆம் ஆண்டிலும், 2001ஆம் ஆண்டிலும் மக்கள் நலப் பணியாளர்கள் பணிநீக்கம் செய்யப்பட்டு, அதன்பிறகு வந்த தி.மு.க. ஆட்சியில் மீண்டும் பதவி வழங்கப்பட்ட நிலையில், இப்போது மூன்றாவது முறையாக பணி நீக்கம் செய்யப்பட்டிருக்கிறார்கள்.


இவர்கள் அனைவரும் தி.மு.க. ஆட்சியில் நியமிக்கப்பட்டவர்கள் என்பதும், இவர்களில் பெரும்பாலானோர் தி.மு.க.வைச் சேர்ந்தவர்கள் என்று கூறப்படுவதும்தான் அ.தி.மு.க. அரசின் நடவடிக்கைக்கு காரணமாகும். அரசியல் பகைமையை அரசியலுடன் நிறுத்திக் கொள்ளாமல் அரசு நிருவாகத்திலும் புகுத்துவது நல்ல அரசுக்கு அழகல்ல. இது அரசு நிருவாகத்தையே சீர்குலைத்துவிடும். அதுமட்டுமின்றி மக்கள் நலப் பணியாளர்கள் அனைவரும் 40 வயதைக் கடந்தவர்கள் என்பதால் அவர்களால் வேறு பணிக்கும் செல்ல முடியாது. அவர்களின் குடும்பங்கள் வறுமையில் வாடும் அவலநிலை ஏற்படும்.


2003ஆம் ஆண்டில் ஊதிய உயர்வு உள்ளிட்ட கோரிக்கைகளை முன்வைத்து போராடிய சுமார் 2 இலட்சம் அரசு ஊழியர்களை ஜெயலலிதா ஒரே இரவில் பணிநீக்கம் செய்தார். இதற்காக அவருக்கு உச்சநீதிமன்றம் கடும் கண்டனம் தெரிவித்தது. அதேபோல் பணிநீக்கம் செய்யப்பட்ட சாலைப் பணியாளர்களில் பலர் வறுமையை தாங்க முடியாமல் தற்கொலை செய்து கொண்டனர். இதற்காகவும் முந்தைய அ.தி.மு.க. அரசு நீதிமன்றத்தின் கண்டனத்திற்கு உள்ளானது. இவ்வளவுக்கு பிறகும் மக்கள் நலப் பணியாளர்களை பணிநீக்கம் செய்திருப்பதைப் பார்க்கும் போது முதலமைச்சர் ஜெயலலிதா அவரது போக்கை மாற்றிக் கொள்ளவில்லை என்றே தோன்றுகிறது.


கிராமப்புறங்களில் மக்கள் நலத்திட்டங்களைச் செயல்படுத்துதல், ஊரக வேலைவாய்ப்பு உறுதித் திட்டத்தை செயல்படுத்துதல் உள்ளிட்ட பணிகளை மக்கள் நலப் பணியாளர்கள்தான் செய்து வந்தனர். அவர்கள் பணிநீக்கம் செய்யப்பட்டிருப்பதால் மக்கள் நலப் பணிகள் பாதிக்கப்படும் ஆபத்து உள்ளது. எனவே மக்களின் நலனையும், மக்கள் நலப் பணியாளர்களின் நலனையும் கருத்தில் கொண்டு 12 ஆயிரம் மக்கள் நலப் பணியாளர்களை வேலை நீக்கம் செய்யும் உத்தரவை உடனடியாக திரும்பப் பெற வேண்டும் என்று வலியுறுத்துகிறேன். இவ்வாறு ராமதாஸ் தனது அறிக்கையில் கூறியுள்ளார்.

நன்றி : நக்கீரன் இணையம்

பகிர்ந்து கொண்டமைக்கு மகிழ்ச்சி அரசன்