எம்.பி.பி.எஸ். முதலாம் ஆண்டு தேர்வில் அறிமுகப்படுத்தப்பட்ட புதிய மதிப்பெண் முறையை ரத்து செய்ய தமிழ்நாடு டாக்டர் எம்.ஜி.ஆர். மருத்துவ பல்கலைக்கழக நிர்வாகக் குழு முடிவு செய்துள்ளது.


இதையடுத்து புதிய மதிப்பெண் விதி காரணமாக எம்.பி.பி.எஸ். முதலாம் ஆண்டு தேர்வில் தோல்வி அடைந்த நூற்றுக்கணக்கான மாணவர்களுக்கு நிவாரணம் கிடைத்துள்ளது.




எம்.பி.பி.எஸ். முதலாம் ஆண்டு மாணவர்களுக்கு அனாடமி, பயோ கெமிஸ்ட்ரி, ஃபிஸியாலஜி என்ற மூன்று பாடங்கள் உள்ளன. ஒவ்வொரு பாடமும் பிரிவு 1 மற்றும் பிரிவு 2 என இரண்டாகப் பிரிக்கப்பட்டுள்ளன.

முன்பிருந்த தேர்வு மதிப்பெண் விதிமுறைகளின்படி, ஒரு பாடத்தில் இரண்டு பிரிவுகளிலும் சேர்த்து மொத்தம் குறைந்தபட்சம் 100 மதிப்பெண்கள் பெற்றாலே, அந்தப் பாடத்தில் தேர்ச்சி அளிக்கப்பட்டு வந்தது.


ஆனால், எம்.பி.பி.எஸ். முதலாம் ஆண்டு தேர்வில் ஒவ்வொரு பாடப் பிரிவிலும் குறைந்தபட்சம் 50 மதிப்பெண் எடுத்தால்தான் தேர்ச்சி பெற முடியும் என்ற புதிய விதிமுறையை தமிழ்நாடு டாக்டர் எம்.ஜி.ஆர். மருத்துவ பல்கலைக்கழகம் அறிமுகப்படுத்தியது.


கடந்த ஆகஸ்ட் மாதம் எம்.பி.பி.எஸ். முதலாம் ஆண்டு தேர்வு எழுதிய 3,184 மாணவர்களில், 1,967 மாணவர்கள் மட்டுமே தேர்ச்சி அடைந்தனர்; 1,217 மாணவர்கள் (40 சதவீதம்) தோல்வி அடைந்தனர். புதிய மதிப்பெண் விதிமுறை காரணமாக சென்னை மருத்துவக் கல்லூரி உள்ளிட்ட பிரபல மருத்துவக் கல்லூரிகளிலும் கடந்த ஆண்டுகளைக் காட்டிலும் அதிக மாணவர்கள் தேர்ச்சி பெற முடியாத நிலை ஏற்பட்டது.


எம்.பி.பி.எஸ். முதலாம் ஆண்டு தேர்வில் தோல்வி அடையும் மாணவர்கள், இந்திய மருத்துவக் கவுன்சிலின் விதிகளின்படி இரண்டாம் ஆண்டு படிப்புக்குச் செல்ல முடியாத வகையில் "பிரேக் சிஸ்டம்' நடைமுறையில் உள்ளது.


நீதிமன்றத்தில் வழக்கு: இதனால் தேர்வில் தோல்வி அடைந்த 40 சதவீத மாணவர்களில் பெரும்பாலான மாணவர்கள், தமிழ்நாடு டாக்டர் எம்.ஜி.ஆர். மருத்துவ பல்கலைக்கழகத்தின் புதிய மதிப்பெண் முறையை ரத்து செய்ய வேண்டும் என்று கோரி சென்னை உயர் நீதிமன்றத்திலும் உயர் நீதிமன்ற மதுரைக் கிளையிலும் வழக்கு தொடர்ந்தனர்.


எம்.பி.பி.எஸ். முதலாம் ஆண்டு ஃபிஸியாலஜி பாட முதல் பிரிவில் 100-க்கு 59 மதிப்பெண்ணும், இரண்டாம் பிரிவில் 100-க்கு 42 மதிப்பெண்ணும் பெற்று, மொத்தம் 101 மதிப்பெண் பெற்றும்கூட தேர்ச்சி அடையாத மாணவி பூர்ணசௌந்தரி உள்பட 23 மாணவர்கள் உயர் நீதிமன்ற மதுரைக் கிளையில் வழக்கு தொடர்ந்தனர்.


சென்னை-மதுரை நீதிமன்றங்களில் தொடரப்பட்ட வழக்கை சேர்த்து சென்னை உயர் நீதிமன்ற தலைமை நீதிபதி எம்.ஒய்.இக்பால், நீதிபதி டி.எஸ். சிவஞானம் ஆகியோர் அடங்கிய பெஞ்ச் விசாரித்து வருகிறது. இந்த வழக்கின் இறுதிக்கட்ட விசாரணை புதன்கிழமை (நவ.9) நடைபெற உள்ளது; அப்போது புதிய மதிப்பெண் விதிமுறை ரத்து செய்த தகவலைத் தெரிவிக்க தமிழக அரசு முடிவு செய்துள்ளது.

நன்றி : நக்கீரன் இணையம்