தற்பொழுது மழை தீவிரமாக பெய்து வருகிறது. மழை நீர் வீதிகள், தெருக்களில் தேங்கி நிற்கிறது.

கழிவு நீர் மற்றும் சாக்கடை கால்வாய் நிரம்பி மழை நீரோடு கலந்து விடுவதால் நோய் தொற்று ஏற்படுகிறது.

இதனால் மழைக்கால நோய்கள் வர நிறைய அறிகுறிகள் உள்ளன. தேங்கிய மழை நீரில் இருந்து நுளம்புகள் உற்பத்தியாகி நோய்களை ஏற்படுத்தக் கூடும்.

மேலும் குடிநீர் நிலைகள் எல்லாம் மாசுபடக்கூடிய வாய்ப்புகள் உள்ளன. குடிநீர் தொட்டிகள், பைப்புகள் வழியாக கழிவு நீர் கலப்பதாலும், கிருமிகள் எளிதில் தொற்ற வாய்ப்பு உள்ளது.

மழைகால நோய்களில் மிகவும் அதிகம் பாதிக்க கூடியது வாந்தி பேதி, கொலரா போன்றவையாகும்.

இந்நோய்கள் தண்ணீர் மூலம் ஏற்படக் கூடியவை. தேங்கியுள்ள நீரில் இருந்து உற்பத்தியாகக் கூடிய கொசுக்கள் மூலம் மலேரியா, மூளை காய்ச்சல், டெங்கு, யானைக்கால் நோய் போன்றவை உண்டாகிறது.

மழைக்காலத்தில் வீடுகளில் ஈக்கள் அதிகம் மொய்க்கும், அத்தகைய ஈக்கள் மூலம் அமீயோசிஸ் சீதபேதி, குடல் புழுக்கள் ஆகியவை ஏற்படும்.

மேலும் சாதாரண காய்ச்சலும் அதிகம் வர வாய்ப்பு உள்ளது ஆகவே மழைக்கால நோயில் இருந்து பாதுகாத்து கொள்வது குறித்த சில குறிப்புக்கள்.

மழைக்காலங்களில் குழந்தைகள், முதியவர்களை வயிற்று போக்கு-வாந்தி பேதி அதிகம் பாதிக்கும். இதனால் பொதுவாக தண்ணீரை நன்கு காய்ச்சி குடிக்க வேண்டும்.

தெருவோரம் மற்றும் வீதியோரங்களில் விற்ககூடிய உணவு பண்டங்களை வாங்கி சாப்பிடுவதை தவிர்க்க வேண்டும். குழந்தைகள், பெரியவர்களுக்கு உணவுகளை சூடாக கொடுக்க வேண்டும்.

வீடுகளில் கழிவு நீர் தேங்கிய பகுதிகளை கண்டறிந்து அகற்ற வேண்டும். வீடுகளில் நுளம்புவலை பயன்படுத்த வேண்டும்.

நுளம்பு வலையை பயன்படுத்தினால் கொசுவினால் ஏற்படக்கூடிய மலேரியா, டெங்கு, மூளை காய்ச்சல் போன்றவற்றில் இருந்து தப்பித்து கொள்ளலாம்.

ஹோட்டல்களில் உணவு பொருட்கள் தயாரிப்பதை சுகாதாரத்துறை தீவிர ஆய்வு செய்ய வேண்டும்.

சுத்தமான நீரில் உணவு தயாரிக்கப்படுகிறதா? உணவு தயாரிக்கும் இடங்கள் சுகாதாரமாக உள்ளதா? என்பதை அதிகாரிகள் கண்காணிக்க வேண்டும். ஈ மொய்த்த பண்டங்களை சாப்பிடுவதை தவிர்க்க வேண்டும்.

இவற்றை பின் பற்றினால் மழைக்காலத்தில் வரக்கூடிய நோயில் இருந்து தப்பிக்கலாம் ஆகவே இவற்றைக் கடைப்பிடித்து பாருங்கள்.