என் தந்தை என் மகனாக...

by **pakee** Wed Dec 28, 2011 8:12 am

[You must be registered and logged in to see this link.]

நான் என்றுமே நேரம் தவறுவதில்லை
எல்லாம் உங்களிடம் கற்றுக் கொண்டதுதான்
பிந்திச் செல்வதால் நீங்கள் படும்
அவஸ்தையை பக்கத்தில் இருந்து
அடிக்கடி பார்ப்பவன் நான் .....

நீங்கள் தள்ளாடி நடந்ததாய்
எந்த பதிவும் இல்லை என்னிடம்
எத்தனை மணிக்கு வந்தாலும்
''எல்லாரும் சாப்பிட்டாச்சா'' என்று
கேட்பதில் நீங்கள் தனிரகம்....

அதிகாரம் செய்வது உங்களுக்கு பிடித்தமானதொன்று
ஆனால் பணியாட்களிடமும் அன்பு தான்

அடிக்கடி பொறாமைப்படுவேன் உங்களைபார்த்து
''எப்பிடிதான் இவரால மட்டும் முடியுதோ ''என்று
ஆனாலும் அருமையான அப்பா எனக்கு !!!!!!!

''செய்யமாட்டேன்'' என்று சொல்லி அதை
செய்துமுடித்து செய்யாதது போல இருப்பது
உங்கள் கை வந்த கலை அது
தெரிந்த போதிலும் உங்களிடம்
சண்டை போடுவது என் குணம்.....

சிதிலமடைந்து சிதறிப்போனபோதிலும்
சிறப்பாய் சித்திரையை கொண்டாட
சொன்னவர் நீங்கள்....சிக்கல்களுக்குள்
சிக்கிகொள்ளவே விருப்பம் உங்களுக்கு
ஆனாலும் கண்ணீருடன் கண்டதில்லை

சிற்பமாம் என் அம்மாவின் சிந்தனைகள்
போதனைகள் உங்களுக்கு ....நாங்கள்
''அடார் ஆனந்தன் ''என்றே வீட்டில் அழைத்திடுவோம்
சிரிப்பொன்றே பதிலாயிருக்கும்
சீறிப் பாய்வதில்லை எப்போதுமே ....

உங்கள் பொழுதுபோக்குகள் பிரமிக்க வைக்கும்
தினம் வயலுக்கு போவதும் வீடு கட்டுவதும்
சாதரணமானதா என்ன ?????
முயற்சி திருவினையாக்கும் பழமொழி
புதுமொழி ஆக்குவீர்கள் அடிக்கடி .....

பழமையான விடயங்களில் பற்று அதிகம்
நவீனங்கள் நாங்கள் பேசினால்
மௌனமே பதிலாகும் உங்களிடம்
ஆனாலும் குறை ஏதும் இல்லை எங்களுக்கு
நம் வீடு நவீனம் தான் அப்பா.......

குத்தல் பேச்சில் வல்லவர் நீங்கள்
அதை குற்றம் என்பது என் பழக்கம்
''நீங்க சொல்றது சரியில்ல அப்பா'' என்றால்
ஏதேதோ பேசி சமாளித்தாலும் உள்ளுக்குள்
வருந்துவது எனக்கு தெளிவாக புரியும்.....

திட்டம் தீட்டியே காலத்தை கரியாக்கி
காரியம் சாதிப்பதில் சமர்த்து.....
கால் காசு என்றாலும் கஷ்டபடாமல்
சேராது உங்களிடம் ...கேட்டால்
கை வலிக்கும் காசு அது....தங்காது என்பீர்கள் ......

எத்தனையோ ஆயிரம் சொந்தங்கள் உங்களுக்கு
அத்துணைக்கும் உரிமை கொண்டாடுவீர்கள்
நாங்கள் அதில் எட்டி நின்றாலும்
தட்டி கொடுத்தது ''என் மகன்'' எனும் போது
மனம் மகிழும்.....கண்களும் கூட.....

பல கோடி நன்றிகள் இறைவனுக்கு
என் அப்பாவிற்கு நான் மகன் ஆனதில்
மீண்டும் இறைவனிடம் ஒன்று
இன்னோர் பிறப்பொன்று வேண்டும்...
நான் தகப்பனாக...
என் தந்தை என் மகனாக...