யோகாசனங்கள் மூலம் உடலை நம் சொல்படி கேட்க வைப்பது எப்படி என்பதைப் பற்றிப் பார்த்துவருகிறோம். இதில் சொல்லப்பட்டுவரும் ஆசனங்களை நீங்கள் முயற்சி செய்திருப்பீர்கள். ஆசனங்கள் பற்றி மேலும் சொல்வதற்கு முன் ஒரு சின்ன அட்வைஸ். குறிப்பிட்ட ஆசனம் செய்ய உடல் ஒத்துழைக்கவில்லை என்றால் முரட்டுத்தனமாக முயற்சி செய்யாதீர்கள். தினமும் முயற்சி செய்யுங்கள். கொஞ்சம் கொஞ்சமாக உடல் மெல்ல மெல்ல நீங்கள் சொன்னபடி கேட்க ஆரம்பிக்கும். அவசரப்பட்டு உடலை வருத்திக்கொள்ளாதீர்கள்.

அப்புறம் இன்னொரு விஷயம். கொஞ்சம் குண்டாக இருப்பவர்கள் தாங்கள் குண்டாக இருப்பதால்தான் யோகா செய்ய வரவில்லை என்று நினைக்க வேண்டாம். ஒல்லியாக இருப்பதால் மட்டும் சிறப்பாக யோகா செய்துவிடலாம் என்பதில்லை. ஒல்லியோ, குண்டோ, பயிற்சி இருந்தால்தான் செய்ய முடியும். ஸோ... பிராக்டீஸ், பிராக்டீஸ், பிராக்டீஸ்... இதுதான் தாரக மந்திரம்.

ஆரோக்கியத்தை விலை கொடுத்து வாங்க முடியாது. ஆரோக்கியத்தின் முக்கியமான விஷயம், வயிற்றை உள்ளேயும் வெளியேயும் ஆரோக்கியமாக வைத்துக்கொள்வது. வயிற்றுப் பகுதி எந்த அளவுக்கு முன்னுக்கு வருகிறதோ அந்த அளவுக்கு ஆரோக்கியம் பின்னுக்குச் செல்கிறது என்று அர்த்தம். வயிறைப் பராமரிக்கும் ஆசனங்களில் முக்கியமான ஒரு ஆசனத்தை இப்போது பார்ப்போம்.

தொப்பையைக் குறைக்கும் ஆசனங்களில் தனுராசனம் முக்கியமான ஒரு ஆசனம். ஆனால் தனுராசனம் போஸைப் பார்த்த உடனேயே இதை நம்மால் செய்ய முடியாது என்ற முடிவுக்கே பலரும் வருவார்கள். ஆனால் அது அவ்வளவு கஷடமானதல்ல என்பது செய்து பார்த்தால் புரியும். உடல் எடையைக் குறைக்கவும் மெலிந்த இடையைப் பெறவும் உதவும் இந்த ஆசனத்தை எப்படிச் செய்வது என்பதைப் பார்ப்போம்.

முதலில் குப்புறப் படுத்துக்கொள்ளுங்கள். இரண்டு கால்களுக்கிடையில் சிறிது இடைவெளி தேவை. கால்களை மேலே தூக்காமல் இரண்டு கைகளையும் கொண்டு பின்புறமாக இரண்டு கால்களையும் பிடித்துக்கொள்ளுங்கள். பிறகு அப்படியே வலது பக்கமும் இடது பக்கமுமாய் உருளுங்கள்.

இந்தப் பயிற்சியைச் செய்யும்போது மூச்சை அடக்கிக்கொள்ளக் கூடாது. கூடியவரை இயல்பாக இருக்கும்படி பார்த்துக்கொள்ள வேண்டும். மூச்சை அடக்கிக்கொண்டு செய்தால் இந்தப் பயிற்சியால் உங்களுக்குப் பலன் கிடைக்காமல் போகும்.

இந்த ஆசனத்தின் நிலையில் சற்று நேரம் அப்படியே இருக்க வேண்டும். எந்த ஆசனத்திலும் சிறிது நேரமாவது நின்றால்தான் அதற்கான பலன் கிடைக்கும். பின்புறம் கால்களைப் பிடித்த நிலையில் சத்தமாக ஒன்று முதல் இருபதுவரை எண்ண வேண்டும். இந்தப் பயிற்சியை முதல் இரண்டு வாரங்கள் செய்யலாம்.

இந்த ஆசனத்தைத் தொடர்ந்து செய்துவந்தால் வயிற்றில் உள்ள தேவையில்லாத சதை குறையும். அது மட்டுமின்றி ஜீரணக் கோளாறு, குடல் புண், மலச்சிக்கல் போன்ற வயிறு சம்பந்தப்பட்ட பல பிரச்னைகளும் குணமாகும்.

இரண்டாம் நிலை

இந்த ஆசனத்தில் மாறுபட்ட சில நிலைகள் உள்ளன. முதலில் கைகளைக் கொண்டு கால்களைப் பின்னோக்கிப் பிடியுங்கள். பிறகு தோள்களையும் தலைப் பகுதியையும் மேல் நோக்கித் தூக்குங்கள். இப்போது இன்னொருவரின் உதவியுடன் கால்களைப் பிடித்து மேலும் கீழுமாகப் பத்து முறை ஆட்டிவிடச் சொல்லுங்கள். வயிற்றுப் பகுதியை மையமாக வைத்து ஊ ஞ்சல் ஆடுவதைப் போன்றது இந்தப் பயிற்சி.

இந்தப் பயிற்சியைச் செய்யும்போது வேகமாக ஆட்டக் கூடாது. மெதுவாகவும் சீராகவும் ஆட்ட வேண்டும். இப்படி ஆட்டும்போது இடம், வலமாக உடல் சாய்ந்துவிடாமல் பார்த்துக்கொள்ள வேண்டும். இந்த ஆசனம் எடையையும் குறைக்கும். இடையையும் குறைக்கும்.

தனுராசனம் பார்க்கக் கஷ்டமாக இருக்கும். ஆனால் பொறுமையாகவும் கவனமாகவும் முயற்சி செய்தால் இதைச் செய்துவிடலாம். தனுராசனம் நம் ஆயுளை நீட்டிக்க உதவும். ஆரோக்கியத்தோடும் அழகாகவும் வாழ வழி செய்யும்.

நன்றி நம்தோழி