நெஞ்சு பொறுக்குதில்லையே...!

by **அ.இராமநாதன்** Mon Jan 16, 2012 2:16 pm

[You must be registered and logged in to see this link.]

-
பாரத தேசத்தின் முதுகெலும்பு
விவசாயம் என்போம்...
இந்தியாவின் இதயம்
கிராமங்கள் என்போம்..
இன்றளவும்
இப்பேச்சில் மாற்றமில்லை
உழவுத் தொழிலே
உன்னதம் என்று உரைப்போம்!
-
பண்பாடும் கலையும் வாழ்வது கிராமத்தில் என்போம்
இன்றளவும்
தற்புகழ்ச்சியில் மாற்றமில்லை
எல்லாமே மாறி விட்டன
மாற்றப்பட்டு விட்டன!
-
உழவன் வாழ்வை
உயர்த்துவோம் என்பது அறிவுப்பு
தொழிற்சாலைக்காக நிலத்திற்கு
இழப்பீடு தருவது நடைமுறை!
-
உற்பத்தியைப்
பெருக்குவோம் என்பது சட்டம்
காடுமேட்டையெல்லாம்
வீட்டு மனையாக்குவது வாடிக்கை!
-
நாகரிகத்தின் அம்சம்
நகரங்களும் ஆலைகளுமெனில்
மனிதனின் உண்மையான
முகவரி எங்கே?
-
பளிங்கு மாளிகைகளும்
பகட்டு வாகனங்களும்
முன்னேற்றத்தின் அடையாளமெனில்
உயிர் வளர்ப்பதுஎது?
-
ஆயிரம் கண்டு பிடிப்புகளும்
விஞ்ஞான முன்னேற்றமும்
மனிதனின் சாதனையாகலாம்
சுமையை குறைக்கலாம்!
-
ஒரு சாண் வயிறு
இதற்கா ஆசைப்படும்?
தொழிற்சாலைகள் அதிகரிக்கலாம்
நிலத்தை அதிகரிக்க முடியுமா?
நகரத்தை விரிவுபடுத்தலாம்
கிராமத்தை நிர்மாணிப்பது இயலுமா?
-
விளைநிலமும்
கிராமமும்
சீரழியும்போது
பூமியானது
தற்கொலைக்குத் துணியாதா?
துணிவதை உணர்வது தயார்..?
-
=============================
>ரத்தினமூர்த்தி, திருப்பூர்
நன்றி: வாரமலர்
படம்: இணையம்