பற்றி எரியுதே நெஞ்சு!

by ரௌத்திரன் Sun Jan 20, 2013 2:29 am

சொந்த இனங்காக்க சக்தி சிறிதுமிலை
இந்தப் பிறப்பேனடி?-சகியே
இந்தப் பிறப்பேனடி?

வீழ்ந்து வதைவாரை வாரி அணைத்தற்கிலை
வாழ்ந்து பயனென்னடி?-சகியே
வாழ்ந்து பயனென்னடி?

"கோ"வென் றழுவார்தம் கண்ணீர் துடைத்தற்கிலை
ஆவியும் எதுக்கடி?-சகியே
ஆவியும் எதுக்கடி?

தட்டிக் கேட்டிங்கு தர்மம் காத்தற்கிலை
வெட்டிப் பேச்சேனடி?-சகியே
வெட்டிப் பேச்சேனடி?

வானேறி முழக்கமிட்ட வீரத் தமிழ்க்குலத்து
ஊனேறிப் பாடையிலே-சகியே
ஊர்வலம் போகுதடி!

வேடிக்கை பார்ப்பதற்கே விழிகள் திறப்பதிவர்
வாடிக்கை யானதடி-சகியே
வாடிக்கை யானதடி!

இப்பாரில் எவர்வந்து இன்னல்கள் புரிந்தாலும்
ஒப்பாரி வைப்பதல்லால்-சகியே
ஒன்றும் அறியாரடி!

மாற்றம் வேண்டுமென்று மனதில் நினைப்பதல்லால்
சீற்றம் கொள்ளாரடி-சகியே
சீற்றம் கொள்ளாரடி!

அடிமை விலங்கினுக்கும் ஆடற்சலங்கைக்கும்
கொடுமை மிகக்கொடுமை-இவர்தான்
வேற்றுமை அறிகிலார்!

நீதி உலகினுக்கு நன்கு உரைத்துவிட்டுப்
பேதம் தம்மிடையே-சகியே
பேணிக் கொண்டாரடி!

கூடிக் குறைத்தலன்றி கடிக்கும் திறனிலாத
பேடிப் பயல்களடி-சகியே
பேடிப் பயல்களடி!

வாழைக் கன்றினுக்கு வந்து பிறந்துவிட்ட
கோழைச் சனங்களடி-சகியே
கோழைச் சனங்களடி!

மானம் என்பதனை மந்தையிலே விற்றுவிட்ட
ஈனப் பிறவிகளடி-சகியே
ஈனப் பிறவிகளடி!

தமக்கென்ன வென்றெண்ணித் தள்ளி நடப்போரையும்
சுமக்கப் புவியேனடி?-சகியே
சுமக்கப் புவியேனடி?

----------------ரௌத்திரன்