தென் ஆபிரிக்காவின் கிழக்கு கேப் பிராந்தியத்திலுள்ள கிராமப் பகுதியில்
எயிட்ஸ் நோயால் பாதிக்கப்பட்ட வயோதிபர்களுக்கு அப்பாவி சிறுமிகள் திருமணம்
செய்து வைக்கப்படும் சம்பவங்கள் தொடர்பான செய்திகள் தற்போது வெளியுலகிற்கு
அம்பலமாகியுள்ளது.
கன்னித் தன்மையை இழக்காத சிறுமிகளுடன் பாலியல்
உறவு வைத்துக் கொள்வது எயிட்ஸ் நோயைக் குணப்படுத்தும் என்ற மூட நம்பிக்கை
அப் பிராந்தியத்தில் நிலவுகின்றமையே இதற்குக் காரணமெனத்
தெரிவிக்கப்படுகின்றது.
சுமார் 12 வயது கொண்ட, பருவம் அடைந்து சில
நாட்களே ஆன சிறுமிகளே கடத்திச்செல்லப்பட்டு திருமணம் செய்து வைக்கப்படுவதாக
தெரிவிக்கப்படுகிறது.
சிறுமிகளின் பெற்றோருக்கு பணத்தை வழங்கிய பின்
அவர்களின் அனுமதியுடன் அச் சிறுமிகளைச் சட்டபூர்வமாக எயிட்ஸ் தொற்றால்
பாதிக்கப்பட்ட வயோதிபர்களுக்குத் திருமணம் செய்து வைத்த சம்பவங்களும்
இடம்பெற்றுள்ளன.
இந் நிலையில் மேற்படி பிராந்தியத்தில் பிறந்து
வளர்ந்தவரும் உலக எயிட்ஸ் நோய் எதிர்ப்புப் பிரசாரத்தில் ஈடுபட்டுள்ளவருமான
நொம் பாஸா ஸகுலுவே தனது பிராந்தியத்தில் சிறுமிகள் அனுபவிக்கும்
கொடுமைகளுக்கு எதிராகப் போராடி வருகிறார்.
லுஸி கிஸிகி கிராமத்தைச் சேர்ந்த சிறுமி ஒருவர் விபரிக்கையில்,
"எனது
வீட்டின் அருகில் வசிக்கும் பெண்ணொருவர் என்னிடம் திருமணம் செய்வதற்கு
விருப்பமா என்று வினவினார். நான் இல்லை என பதிலளித்தேன். நான் மறுத்தால்
என்னை பலவந்தமாக அடித்து உதைத்து திருமணத்தை நடத்த நேரிடும் என
அச்சுறுத்தினார்.
மறுநாள் இரவு அந்தப் பெண் எனது வீட்டிற்கு வந்து என்னை ஆற்றங்கரை ஒன்றுக்கு அழைத்துச் சென்றார். அங்கு 7 பேர் காத்திருந்தனர்.
அவர்கள்
என்னை வயதான நபர் ஒருவரின் வீட்டிற்கு அழைத்துச் சென்றனர். எனக்கு அங்கு
திருமணம் நடைபெறுகிறது என்பதை என்னால் நம்ப முடியாமல் இருந்தது.
திருமணத்தின் பின் அந்த வயோதிபரின் அறைக்கு அனுப்பப்பட்டேன்.
அப்போது அவர் நீ எனது மனைவியாக இருக்க விரும்பினாலும் விரும்பாவிட்டாலும் உனக்கு கட்டணமாக கால் நடைகளை வழங்குவதாக கூறினார்.
அவர் அதன் பின் என்னுடன் பலவந்தமாக பாலியல் உறவு கொண்டார்'' என அச் சிறுமி தெரிவித்துள்ளார்.
சில
காலமாகவே நடைமுறையில் இருந்து வந்துள்ள இக்கடத்தல் மற்றும் கட்டாய
திருமணங்கள் தொடர்பான சம்பவங்கள் தற்போதே வெளியுலகிற்கு தெரியவந்துள்ளன.