மழையால் பாதிக்கப்பட்ட முதலாவது 20 ஓவர் கிரிக்கெட்டில் ஆஸ்திரேலியாவை வீழ்த்தியது இந்தியா

by **அ.இராமநாதன்** Sun Oct 08, 2017 10:22 am

[You must be registered and logged in to see this image.]

ராஞ்சி,

இந்தியாவில் சுற்றுப்பயணம் மேற்கொண்டு விளையாடி வரும்
ஆஸ்திரேலிய கிரிக்கெட் அணி ஒரு நாள் தொடரை 1-4 என்ற
கணக்கில் பறிகொடுத்தது.

அடுத்ததாக 3 போட்டிகள் கொண்ட 20 ஓவர் தொடரில் ஆடுகிறது.
இதன் முதலாவது 20 ஓவர் போட்டி ஜார்கண்ட் மாநிலம் ராஞ்சியில்
நேற்றிரவு நடந்தது. மனைவிக்கு உடல்நலக்குறைவு காரணமாக
ஒரு நாள் தொடரில் ஆடாத ஷிகர் தவான் அணிக்கு திரும்பினார்.

லோகேஷ் ராகுல், மூத்த வேகப்பந்து வீச்சாளர் நெஹரா
ஆகியோருக்கு ஆடும் லெவன் அணியில் இடம் கிடைக்கவில்லை.

டாஸ் ஜெயித்த இந்திய கேப்டன் விராட் கோலி, வானிலையை
மனதில் வைத்து முதலில் பந்து வீச்சை தேர்வு செய்தார்.
அதற்கு கைமேல் பலன் கிடைத்தது.

பிஞ்ச் 42 ரன்

ஆஸ்திரேலிய அணியின் இன்னிங்சை கேப்டன் டேவிட் வார்னரும்,
ஆரோன் பிஞ்சும் தொடங்கினர். வார்னர் (8 ரன்)
புவனேஷ்வர்குமாரின் பந்து வீச்சில் கிளன் போல்டு ஆனார்.

அடுத்து மேக்ஸ்வெல் ஆட வந்தார்.
ஆரோன் பிஞ்ச், ரன் சேகரிப்பில் ஓரளவு வேகம் காட்டினார்.
ஸ்கோர் 55 ரன்களை எட்டிய போது மேக்ஸ்வெல் (17 ரன்),
யுஸ்வேந்திர சாஹல் வீசிய பந்தை வளைத்து பிடித்து அடித்த
போது, பும்ராவிடம் சிக்கினார்.
தொடர்ந்து ஆரோன் பிஞ்ச்சை (42 ரன், 30 பந்து, 4 பவுண்டரி,
ஒரு சிக்சர்) குல்தீப் யாதவ் காலி செய்தார்.

தொடர்ந்து சாஹல்-குல்தீப்பின் சுழலில் சிக்கி ஆஸ்திரேலிய
அணி நிலைகுலைந்து போனது. வேகம் குறைந்த இந்த (ஸ்லோ)
ஆடுகளத்தில் பந்து அதிகமாக மேலே எழும்பவே இல்லை.
சரியாக கணித்து ஆடாமல் ஆஸ்திரேலிய பேட்ஸ்மேன்கள்
விக்கெட்டுகளை கொத்து கொத்தாக தாரைவார்த்தனர்.

ஹென்ரிக்ஸ் (8 ரன்), டிராவிஸ் ஹெட் (9 ரன்), டிம் பெய்ன் (17 ரன்),
நாதன் கவுல்டர்-நிலே (1 ரன்), டேனியல் கிறிஸ்டியன் (9 ரன்)
வரிசையாக நடையை கட்டினர்.

மழையால் பாதிப்பு

ஆஸ்திரேலிய அணி 18.4 ஓவர்களில் 8 விக்கெட்டுக்கு 118 ரன்கள்
எடுத்திருந்த போது மழை குறுக்கிட்டது. தொடர்ந்து மழை
பெய்ததால் அத்துடன் ஆஸ்திரேலியாவின் இன்னிங்ஸ் முடித்துக்
கொள்ளப்பட்டது. 2 கேட்ச் மற்றும் ஒரு ஸ்டம்பிங் வாய்ப்பை
இந்திய வீரர்கள் கோட்டை விட்டனர்.

இதையும் கச்சிதமாக செய்திருந்தால் ஆஸ்திரேலியாவின்
நிலைமை இன்னும் மோசமாகி இருக்கும். இந்திய தரப்பில் பும்ரா,
குல்தீப் யாதவ் தலா 2 விக்கெட்டுகளும், புவனேஷ்வர்குமார்,
ஹர்திக் பாண்ட்யா, யுஸ்வேந்திர சாஹல் தலா ஒரு விக்கெட்டும்
வீழ்த்தினர்.

மழையால் சுமார் 2 மணி நேரம் போட்டி பாதிப்புக்குள்ளானது.
பின்னர் டக்வொர்த்-லீவிஸ் விதிமுறைப்படி இந்திய அணி
6 ஓவர்களில் 48 ரன்கள் எடுக்க வேண்டும் என்ற எளிய இலக்கு
நிர்ணயிக்கப்பட்டது.

இந்தியா வெற்றி

இதை நோக்கி பேட்டிங் செய்த இந்திய அணி 5.3 ஓவர்களில்
ஒரு விக்கெட்டுக்கு 49 ரன்கள் சேர்த்து 9 விக்கெட் வித்தியாசத்தில்
வெற்றி கண்டது. பவுண்டரியுடன் இலக்கை எட்ட வைத்த கேப்டன்
விராட் கோலி 22 ரன்களுடனும் (14 பந்து, 3 பவுண்டரி),
ஷிகர் தவான் 15 ரன்களுடனும் களத்தில் இருந்தனர்.

ரோகித் சர்மா 11 ரன்னில் அவுட் ஆனார். 20 ஓவர் கிரிக்கெட்டில்
ஆஸ்திரேலியாவுக்கு எதிராக இந்தியா தொடர்ச்சியாக பெற்ற
7-வது வெற்றி இதுவாகும். குல்தீப் யாதவ் ஆட்டநாயகனாக
தேர்வு செய்யப்பட்டார்.

வெற்றியின் மூலம் 3 போட்டி கொண்ட தொடரில் இந்தியா
1-0 என்ற கணக்கில் முன்னிலை வகிக்கிறது. 2-வது 20 ஓவர் போட்டி
வருகிற 10-ந்தேதி கவுகாத்தியில் நடக்கிறது.

ஆஸ்திரேலிய கேப்டன் சுமித் விலகல்

இந்தியாவுக்கு எதிராக நாக்பூரில் நடந்த கடைசி ஒரு நாள் கிரிக்கெட்
போட்டியின் போது, ஆஸ்திரேலிய கேப்டன் ஸ்டீவன் சுமித்
காயமடைந்தார். பந்தை பாய்ந்து விழுந்து தடுத்த போது, வலது
தோள்பட்டையில் காயம் ஏற்பட்டது. 20 ஓவர் தொடருக்குள் உடல்
தகுதியை எட்டி விடுவார் என்று அணி நிர்வாகம் எதிர்பார்த்த
நிலையில் தோள்பட்டை வலி இன்னும் முழுமையாக குறையவில்லை.

மேலும் தொடர்ந்து விளையாடினால் காயத்தன்மை அதிகரித்து
விட வாய்ப்பு உள்ளது. இதை கருத்தில் கொண்டு இந்தியாவுக்கு
எதிரான 3 போட்டி கொண்ட 20 ஓவர் தொடரில் இருந்து
ஸ்டீவன் சுமித் நேற்று விலகினார். அவர் உடனடியாக தாயகம்
திரும்புகிறார்.

சுமித்தின் விலகலால் நேற்றைய முதலாவது 20 ஓவர் போட்டியில்
ஆஸ்திரேலிய அணியின் கேப்டனாக டேவிட் வார்னர் செயல்பட்டார்.
எஞ்சிய இரு ஆட்டத்திற்கும் அவரே கேப்டனாக தொடருவார் என்று
அறிவிக்கப்பட்டுள்ளது.

ஸ்டீவன் சுமித்துக்கு பதிலாக மார்கஸ் ஸ்டோனிஸ் அணியில்
சேர்க்கப்பட்டுள்ளார்.
-
-------------------------------
தினத்தந்தி

வித்யாசாகரின் எழுத்து பயணம்

தமிழ் அறிஞர்களின் மின்நூல்கள் - யாழ்பாவாணன்

மழையால் பாதிக்கப்பட்ட முதலாவது 20 ஓவர் கிரிக்கெட்டில் ஆஸ்திரேலியாவை வீழ்த்தியது இந்தியா

மழையால் பாதிக்கப்பட்ட முதலாவது 20 ஓவர் கிரிக்கெட்டில் ஆஸ்திரேலியாவை வீழ்த்தியது இந்தியா