மாலை கொண்டு வருகிறேன்.....

by ரௌத்திரன் Fri Jul 13, 2012 6:11 pm

கண்ணே!

முதலில்

கன்னத்தில் வழியும்

கண்ணீரைத் துடை..

அடி

புடவை கட்டிய

பொக்கிஷமே!

என்

வாலிபம் தவமிருந்து

வாங்கி வந்த வரமே!

என் சீதையே!

மிதிலையில் இருந்துகொண்டு

அசோகவனத்தில் இருப்பதுபோல்

அழுது கொண்டிருப்பவளே !

கண்ணீரைத் துடை...

என்

ரெட்டைக் கண்கள் காணும்

ஒற்றைக் கனவே!

என்

உயிர்க் கரையில்

ஓயாமல் அடிக்கும் அலையே!

என் உடலின்

இரண்டாம் நிழலே!

கண்ணீரைத் துடை...

அறிவாயா?

நீதான்

என்

அதிசயக் கனவென்பதை

அறிவாயா?

ஆம்,

நான்

தூக்கத்தின்

தயவின்றி காணும் கனவு...

தூக்கம் கலைந்தாலும்

தொடரும் கனவு....

ஆம்,

நீதான்

என்

அதிசயக் கனவென்பதை

அறிவாயா?

நாளை

என் தோளுக்கு நீயும்

உன் தோளுக்கு நானும்

சூட்டவிருக்கும்

மாலையைத் தொடுக்கத்தானடி

நான்

நாராய் இளைத்துக் கொண்டிருக்கிறேன்...

நான்

றெக்கைகள் இரண்டும்

பற்றி எரிய எரிய

பறந்து கொண்டிருப்பது

நாளை

நாம் வசிக்கக்

கூடு ஒன்று

கட்டத்தானடி...

இவன் விழுந்தால் போதும்

புதைத்துவிடலாம் என்று

பலர் காத்திருக்கிறார்கள்!

அவர்களுக்கெப்படித் தெரியும்?

இவன்

விழுகின்ற இடங்கள் கூட

வரலாற்றுத் தலங்களாகும் என்று....

இவன்

நிழலுக்கு ஒதுங்கும் மரம்கூட

போதிமரம் ஆகுமென்று....

அவர்களுக்கெப்படித் தெரியும்?

காக்கைகள் கூடி

எச்சமிட்டால்

எரிமலை அணைந்துவிடுமோ?

கிழக்கு தெற்காக

மேற்கு வடக்காக

திசைகளை எல்லாம்

தலை கீழாக மாற்றிவைத்தாலும்

சூரியனுக்கு நட்டமில்லை.

இவன்

உதிக்கும் திசைதான் கிழக்கென்று

உலகம் உரைக்கும்!

கலங்காதே

கண்ணே!

நம்

காதலுக்கிடையில்

குறுக்கிடுவது

காலமே என்றாலும்

அதன்

குரல்வளை தப்பாது....

வேடிக்கை காட்டுவது

விதியே என்றாலும்

அதன்

விலா எலும்புகளை முறித்து

நம்

திருமண மேடையின்

அக்கினிக் குண்டத்திற்கு

விறகாக்குவேன்....

ஏழு கடல்களும் ஒன்றாய்

எழுந்து நிற்கட்டுமே

அந்த

நெருப்புக் குண்டத்திற்கு

நெய்யாய் இறைக்க மாட்டேனோ?

கண்ணீரைத் துடை...

இனியவளே!

இனியுன் கண்ணில்

ஒற்றைத்துளி வழிந்தாலும்

என் உயிரின் வேர்

அந்தக் கண்ணீரில்

அழுகிவிடாதோ?

காதலியே!

உன்

கண்களுக்கு

கனவு காண்பதொன்றே

கடமையென்று

கட்டளை இட்டுக்கொள்!

கவலையின்றி

கனவு காண்!

அப்படி

அந்தக் கனவை ஏதேனும்

கலைக்கக் கூடுமெனில்

அது

நான் கொண்டு வரும்

மணமாலையால்

மட்டுமே முடியும்....

-------------ரௌத்திரன்

by **கவியருவி ம. ரமேஷ்** Fri Jul 13, 2012 6:13 pm

நான் கொண்டு வரும்
மணமாலையால்
மட்டுமே முடியும்...
- காதலின் வெற்றி. தன்னம்பிக்கைதான் காதலுக்கும் காதல் கவிதைக்கும் முக்கியம். காதல் காதலர்களுக்கே... மிக்க மகிழ்ச்சி