என்று விடியும் எமக்கு?

by ரௌத்திரன் Fri Jul 13, 2012 6:20 pm

எட்டுத் திசையிருந்தும்

எம்மைச் சூழ்ந்தவிருள்

தொட்டுத் துடைப்பதற்கு

திசையொன் றிங்கிலையே

குருடர்களும் சுகமாகக்

கண்ணுறங்கும் பூமியிலே

ஒருநாள் ஒருநொடி

யாமுறங்க வழியிலையே!

பாடையைக் கண்முன்னே

பார்த்துவிட்ட பிறகு

கூடி இமையிரண்டும்

குலவுவதும் எங்ஙனமே?

எடுக்கும் பசியுணர்வும்

எதிரிகள் நினைவினிலே

பிடிக்கும் கிலியதனிற்

பறந்தோடிப் போகிறதே!

பருவக் கனவுகளில்

பாரிலுள இளைஞரெலாம்

துருவங்கள் தோறும்

துள்ளித் திரிந்திருக்க

மரணக் கனவன்றி

மற்றேதும் அறியாராய்

மருண்டெம் மக்களெலாம்

மண்ணிலே உலவுகிறார்!

முத்தமிழ்க் குலத்திலிம்

மண்ணில் பிறப்பதற்கு

அத்தன் அடிதொழுது

அருந்தவம் இயற்றிலமே!

இனம்பார்க்கும் கண்களிலே

இரக்கம் சிறிதிருந்தால்

பிணம்பார்க்கும் பேராசை

பிறந்திருக்க வாய்ப்பிலையே!

கற்பூரத் தீகாணும்

கடவுளர் கண்களுக்கெம்

சடலத் தீகாணும்

சக்தி தானிலையே!

ஒருநாளில் சாவென்று

எல்லோர்க்கும் எழுதியவன்

அன்றாடம் எமக்கென்று

எழுதியதை என்சொல்ல?

நாற்காலி ஆசையிலே

நாற்றிசை எரியவிட்டுப்

பார்க்கின்ற பெரியோரின்

புத்தியினை என்சொல்ல?

புத்தம் சரணமென்றே

பொழுதெலாம் கூறிவிட்டு

ரத்தம் கொண்டுவாய்

கொப்புளிப்ப தென்சொல்ல?

புத்தன் கோவிலிலே

துலங்கும் மணியதனை

யுத்தக் களச்சங்காய்

மாற்றிய தென்சொல்ல?

அகதிகளாய் இந்த

அவனியில் வாழ்வதற்கும்

தகுதிகள் அற்றவராய்த்

தவிப்பதை என்சொல்ல?

நீதியிலா சபைகளே

நானிலத்தில் நிறைந்ததனால்

நாதியிலா தோரினம்

நிற்பதை என்சொல்ல?

------------ரௌத்திரன்

by **கவியருவி ம. ரமேஷ்** Fri Jul 13, 2012 6:26 pm

அவர்களுக்கு நாம் ஓட்டுப்போட்டுத் தொலைக்கிறோமே... அதை என்ன சொல்ல...

கவிதை நன்றாக இருக்கிறது. மாறும் உலகம். நாம் இருக்கும்போது மாறினால் மகிழ்ச்சி அடையலாம். மிக்க மகிழ்ச்சி

by **pakee** Fri Jul 13, 2012 6:45 pm

அகதிகளாய் இந்த

அவனியில் வாழ்வதற்கும்

தகுதிகள் அற்றவராய்த்

தவிப்பதை என்சொல்ல?

ஆட்சிக்கு வரவங்க கொஞ்சமாவது மனசாட்சி இருக்கணும் கவிதை அருமை மிக்க மகிழ்ச்சி

by **அ.இராமநாதன்** Fri Jul 13, 2012 8:10 pm

மாறும் உலகம்.
நாம் இருக்கும்போது மாறினால் மகிழ்ச்சி அடையலாம்...
-

by **கலைவேந்தன்** Sat Jul 14, 2012 3:52 pm

அன்பு இளவலே.. தங்களைப்பற்றிய குறிப்பொன்றும் தங்கள் கவிதைகளின் தொகுப்புத்தொடுப்பொன்றையும் எனது தனிமடலுக்கு விரைந்தளிக்க இயலுமா..?

ஓர் பாரதியின் சொல்வீச்சினை எனது கவிதைகளில் காண்பதாக அனைவரும் கூறியுள்ளனர். அவர்களுக்கு தங்கள் கவிதைகளை அறிமுகப்படுத்த விழைகிறேன்..

இதோ பார்.. மீண்டும் ஒரு பாரதி பிறந்துவிட்டான் எனக்காட்ட விரும்புகிறேன்..

பாராட்டுகள் இளவலே..

பாராட்டுக்கள்

by **கவியருவி ம. ரமேஷ்** Sat Jul 14, 2012 4:31 pm

கலைவேந்தன் wrote:அன்பு இளவலே.. தங்களைப்பற்றிய குறிப்பொன்றும் தங்கள் கவிதைகளின் தொகுப்புத்தொடுப்பொன்றையும் எனது தனிமடலுக்கு விரைந்தளிக்க இயலுமா..?

ஓர் பாரதியின் சொல்வீச்சினை எனது கவிதைகளில் காண்பதாக அனைவரும் கூறியுள்ளனர். அவர்களுக்கு தங்கள் கவிதைகளை அறிமுகப்படுத்த விழைகிறேன்..

இதோ பார்.. மீண்டும் ஒரு பாரதி பிறந்துவிட்டான் எனக்காட்ட விரும்புகிறேன்..

பாராட்டுகள் இளவலே..

இது உண்மையான புகழுக்கும் புகழ்ச்சிக்கும் உரியவைதான். உரியவர்கள் தான். இருவருக்குமே தமிழ்த்தோட்டம் நன்றியையும் மகிழ்ச்சியையும் தெரிவித்துக்கொள்கிறது.

by Sponsored content

வித்யாசாகரின் எழுத்து பயணம்

தமிழ் அறிஞர்களின் மின்நூல்கள் - யாழ்பாவாணன்

என்று விடியும் எமக்கு?

என்று விடியும் எமக்கு?

Re: என்று விடியும் எமக்கு?

Re: என்று விடியும் எமக்கு?

Re: என்று விடியும் எமக்கு?

Re: என்று விடியும் எமக்கு?

Re: என்று விடியும் எமக்கு?

Re: என்று விடியும் எமக்கு?

Re: என்று விடியும் எமக்கு?