வெயிலிலும், மழையிலும் நம் உடலைக் காக்கும் அருமருந்து மஞ்சள். இன்னும் சில மாதங்களில் மழைக்காலம் துவங்கப் போகிறது. உடலின் வெளி அழகையும், உள் ஆரோக்கியத்தையும் பதம் பார்க்கும் இந்த மழைப் பருவத்தை எளிதில் கையாள கண்கண்ட மருந்து தான் மஞ்சள்.

மஞ்சளின் மருத்துவ குணத்தை நெடுங்காலத்திற்கு முன்பே அறிந்த இந்தியர்கள், அதை தினசரி உணவில் சேர்த்து வந்தனர். மஞ்சள் தூள் இல்லாத இந்திய சமையல் அறையே இல்லை எனலாம். அதுமட்டுமின்றி, காலங்காலமாக பெண்கள் தங்கள் மேனி எழிலுக்கும் மஞ்சளை பயன்படுத்தி வருகின்றனர். இப்போது, உலகம் முழுவதும் பல்வேறு நாடுகளில், விஞ்ஞானிகள் மேற்கொண்ட ஆய்வின் அடிப்படையில், மஞ்சள் பலவிதமான நோய்களை குணமாக்குகிறது என்று கண்டுபிடிக்கப்பட்டுள்ளது.

இந்தியாவின் பழமையான மருத்துவ முறையான ஆயுர்வேதத்தில், மூட்டு வீக்கம், தசைநார் கோளாறுகள் போன்ற நோய்களை குணப்படுத்த மஞ்சள் பயன்படுத்தப்படுகிறது. ஆஸ்துமா, வயிறு சம்பந்தமான பலவித கோளாறுகள், படர்தாமரை போன்ற நோய்களுக்கும் மஞ்சள் அருமையான மருந்து.

இந்தியாவில் பாரம்பரிய மூலிகை மருந்தாக கருதப்படும் மஞ்சள் குறித்து, அமெரிக்காவில் உள்ள எண்ணற்ற அறிவியல் கழகங்கள் ஆராய்ந்து வருகின்றன. பல்வேறு வகையான புற்றுநோய் பரவுவதை மஞ்சள் எவ்வாறு தடுக்கிறது என்பது குறித்தும் ஆராய்ச்சி நடைபெறுகிறது.

புற்றுநோய்க்கு பரிந்துரைக்கப்படும் "கீமோதெரபி" சிகிச்சையினால் ஏற்படும் பக்க விளைவுகளையும் மஞ்சள் குணப்படுத்துகிறது என்பது கண்டறியப்பட்டுள்ளது.

உலகிலேயே மஞ்சள் உற்பத்தியில் இந்தியா முன்னணியில் உள்ளது. இந்திய சமையலில் அன்றாடம் மஞ்சள் இடம் பெறுவதால், நாட்டின் உற்பத்தியில் 80 சதவீதம் உள்நாட்டு தேவைக்கே சரியாகி விடுகிறது.

இரத்தத்தை சுத்தப்படுத்தவும், சருமத்தை பாதுகாக்கவும், இருமல் கபத்தை வெளிக் கொணரவும் மற்றும் தீக்காயங்கள், தட்டம்மை, சொறி சிரங்கு ஆகியவற்றில் இருந்து நிவாரணம் பெறவும் மஞ்சள் பயன்படுத்தப்படுகிறது.

கடுமையான வயிற்று போக்கு இருந்தால், மஞ்சள் தூளை மோர் அல்லது சுத்தமான குடிநீரில் கலந்து பருகினால், உடனடியாக பலன் கிடைக்கும். குழந்தைகளுக்கு வயிற்றில் பூச்சி இருந்தால், அதை ஒழிக்கவும் மஞ்சள் உதவுகிறது.

சிறிதளவு மஞ்சள் தூளுடன் ஒரு சிட்டிகை உப்பு சேர்த்து தண்ணீரில் கரைத்து, அந்த கரைசலை 20 சொட்டுகள் என்ற அளவில் காலையில் எழுந்தவுடன் வெறும் வயிற்றில் பருகினால், பூச்சித் தொல்லை ஒழியும்.

"அனீமியா" எனப்படும் ரத்த சோகை நோயை குணப்படுத்த, மஞ்சள் தூளுடன் தேன் சேர்த்து சாப்பிடலாம். தட்டம்மை நோய்க்கு, கசப்பான சுரைக்காய் இலைச் சாறுடன் சில சொட்டு தேன் மற்றும் சிறிது மஞ்சள் தூள் சேர்த்து உட்கொள்ளலாம். நாள்பட்ட இருமல் மற்றும் தொண்டை கரகரப்பையும் இது போக்கும்.

இருமலுடன் சுவாசக் கோளாறு இருந்தால், ஒரு டம்ளர் வெதுவெதுப்பான பாலில் அரை டீஸ்பூன் மஞ்சள் தூள் சேர்த்து அருந்தினால், உடனடி நிவாரணம் கிடைக்கும்.

சுளுக்கு ஏற்பட்டால், மஞ்சள் தூளுடன், சிறிது எலுமிச்சம் பழச்சாறு மற்றும் உப்பு சேர்த்து, அந்தக் கலவையை சுளுக்கு ஏற்பட்ட இடத்தில் தடவினால், விரைவில் குணம் அடையலாம்.

மஞ்சளின் மகத்துவத்தை உணர்ந்து, நமது முன்னோர்கள் அதை நெடுங்காலமாக பயன்படுத்தி வருகின்றனர்.

மிகவும் பயனுள்ள தகவல்.