உயிர்

by sasikalav.nil Wed Sep 25, 2013 2:31 pm

ஆறறிவு
ஐம்புலனுக்கெட்டாத
அற்ப்புதமாம்,
ஆராய்ந்து பார்த்தாலும்
புரியாத பொற்ப்பதமாம்,
உயிரென்னும் தத்துவத்தின்
உறைவிடத்தை அறிந்திட்டோர்
உலகாளும் ஓம்கார(ப்)
பொருளன்றி எவருண்டோ?
ஈரைந்து மாதங்கள்
இடற்கொண்டே சுமந்தாலும்
தன்னுடலின் சரிபாதி
தன் மகவின் முகம் காண
தன்னுயிரை விலையாக்கி
ஈன்றெடுக்கும் தாயன்றி
உயிர் கொண்ட உன்னதத்தை
உணர்ந்திட்டோர் வேறுண்டோ?

இருப்பினும்........
என் புலனுக்கெட்டியதை
இங்கே நான் குறிக்கின்றேன் !
       கண்பார்க்க காணாது
கை கோர்க்க வாராது
கலைந்தாடும் காற்றாக
மெய்யில் அலைந்தாடும்
உணர்வாகி,
கற்றறிந்த வல்லவர்க்கும்
கல்லாத எளியவர்க்கும்
புரியாத புதிர் தந்து
புதையுண்ட பொருளாகி,
உயர்திணயோ அக்றிணயோ
உயர்வென்றோ தாழ்வென்றோ
பிரிவின்றி- யாவர்க்கும்
பொதுவான உருவாகி,
மண்ணிலே நிலைகொள்ளும்
மாசிலா உயிரே - உந்தன்
மரணத்தில் மனம்கொள்ளும்
வலியினும் பெரிதுண்டோ?
பிறப்பிலும் காணாத
பேரின்பம் வேறுண்டோ?
உயிரற்ற உடல்கண்டு
பிணமென்று பொருள்கூறி
உடலற்ற உயிர்தன்னை
இறை என்று தொழும்போது
உயிர் கொண்ட மேன்மை - அது
மெய்ப்பட விளங்குவதே!
அகிலத்தில் .....................
உயிர்கொண்ட உயர்நிலையை
உணராது - ஓர்நொடியில்
வீணான விரகத்தில்
உயிர்மாய்க்கும் வீணர்கள்
இனியேனும் இறையருளால்
இல்லாது போகட்டும்!
தன் வயிற்றுப்பசியாற்ற
தயங்காது மாந்தர்தன்
தலைகொய்யும் எத்தர்கள்
மென்மேலும் பூவிதன்னில்
தளிர்க்காமல் இருக்கட்டும்!
உயிருக்கு நிகராக
வேறில்லை எனும்போது
ஈசனருள் கொண்டு
தாய் தந்தை அளித்திட்ட
இன்னுயிராம் பொண்ணொளியை
நம் அந்தி நாள் வரையில்
அணையாமல் பார்த்திடுவோம்!
அணைக்காமல் காத்திடுவோம்!!
என்றும் அன்புடன்............

வி எஸ் கே