வாய் பேசும் ஓவியம்!

by **அ.இராமநாதன்** Thu Jul 17, 2014 8:36 am

--

தூரிகையைப் பற்களால் கடித்தபடி முழுமையான
உத்வேகத்துடன் வரையத் தொடங்குகிறார். தனது
உதவியாளரிடம் அடுத்தடுத்த வண்ணங்களைச்
சொல்ல, அவர் வண்ணம் நனைத்த தூரிகையை
இளங்காவின் உதடுகளில் மாற்றி மாற்றி வைத்துக்
கொண்டிருக்கிறார்.
-
ஒரு மணி நேரத்தில் மாயா ஜாலம் போல அற்புதமான
ஓவியத்தை வரைந்து விடுகிறார்.
-
இந்திய விமானப்படையில் பணியாற்றிக் கொண்டு
இருக்கும்போது ஒரு விபத்தில் தண்டுவட எலும்பில்
பலத்த அடிபட்டு கைகள் இரண்டும் செயலிழந்து
விட்டன. உதவியாளருடனே காலத்தைத் தள்ளி
முடங்கிவிடாமல் தனக்கு விருப்பமான ஓவியத்தைக்
கற்று அதில் முத்திரைப் பதித்து வருகிறார் மிலிட்ரி
இளங்கோவன்.
-
பெரம்பலூர் மாவட்டம், அம்மாபாளையத்தில் ஓவியர்
மிலிட்ரி இளங்கோவன் ரொம்ப ஃபேமஸ். இவரிடம்
தன்னம்பிக்கையோடு ஜெயித்த கதையைக் கேட்டோம்.
-
இந்திய விமானப்படையிலே தேர்வாகி பெல்காமில்
பயிற்சியை முடித்து வாகா எல்லையில் பணியில்
இருந்தேன். எங்க கேம்பஸ் ஆளுங்க சேர்ந்து ஒரு டூர்
போனோம். அங்கு எதிர்பாராதவிதமாக ஒரு விபத்து
ஏற்பட்டு எனக்குத் தண்டுவடம் பாதித்து விட்டது.
இரண்டு வருடம் ராணுவ மருத்துவமனையில் தீவிர
சிகிச்சை கொடுத்தும் பலன் எதுவுமில்லை.
-
என் உடலில் கழுத்துக்குக் கீழே எந்த உணர்வும்
இல்லாமல் போய்விட்டது. அப்போது என வயது 23 தான்.
-
1976இல் புனே ராணுவக் காப்பகத்துக்கு என்னைக்
கொண்டுவந்து விட்டார்கள். அங்கு என்னைப்போல்
விபத்து மற்றும் போரில் பாதிக்கப்பட்ட வீரர்கள்
இருந்தார்கள். நான் புத்தகம் படிப்பதில் ஆர்வமுள்ளவன்.
அப்போது யாரையாவது உதவிக்கு அழைத்து
ஒவ்வொரு பக்கமாகப் புரட்டிக் காட்டச் சொல்லி கல்கி
எழுதிய பொன்னியின் செல்வன், சாண்டில்யன் எழுதிய
கடல்புறா போன்ற நாவல்களைப் படிப்பேன்.
அப்போது அந்தக் கதைகளில் வருகிற ஓவியங்கள்
என் மனத்தில் நன்கு பதிந்து போனது,

நாவல்களில் வந்த கதாபாத்திரங்களும் ஓவியங்களும்
தான் எனக்கு தன்னம்பிக்கை கொடுத்து படுத்து
முடங்கிய நிலையிலும் எழுந்து உட்கார வைத்து
வாயாலேயே ஓவியம் தீட்ட வைத்தது.
ஓராண்டு பயிற்சிக்குப் பிறகு முழுமையாக வரையக்
கற்றுக் கொண்டேன்.
-
உங்கள் ஓவியத்துக்கான அங்கீகாரம் எப்படி இருக்கிறது?
-
பெண்கள் தினம், ராணுவ தினம், விமானப் படை தினம்
போன்ற சிறப்பான தினங்களில் மாற்றுத்திறனாளிகள்
ஓவியங்களை வைத்துக் கண்காட்சி நடத்துவார்கள்.
அதில் கலந்து கொண்டு என் ஓவியங்களும் விற்பனையானது.
அப்போது கிடைக்கிற சந்தோஷத்துக்கு அளவேயில்லை.
-
ஒரு கண்காட்சியில் சரத்பவார் மராட்டிய முதல்வராக
இருந்தபோது என் ஓவியம் பாராட்டுப் பெற்றது.
அந்தச் செய்தியைப் பார்த்துவிட்டு பாதிரியார் ஜான்சன்
என்னைப் பார்த்து வெகுவாகப் பாராட்டினார்.
"உன் திறமை உலகம் முழுதும் தெரிய சுவிட்ஸர்லாந்திலுள்ள
லீக் டென்ஸ் டின் என்ற அமைப்பில் பதிவு செய்ய வேண்டும்'
என்று சொன்னதோடுபதிவு செய்யவும் உதவினார்.
இந்த அமைப்பு உலகளாவிய வாய் மற்றும் கால்களால்
வரைவோருக்கான அமைப்பு.

இதில் தேர்வாகும் படங்கள் உலகளவில் பயன்படுத்தப்
படும். காலண்டர், கிரீட்டிங் கார்டு போன்றவற்றில் இடம்
பெறுவதோடு வரைந்தவருக்கும் நல்ல தொகை கிடைக்கும்.
அப்படி என் ஓவியம் இடம் பெற்று ஒரு பெரிய தொகையும்
கிடைத்தது. மும்பை, தில்லி, புனே, சென்னை மற்றும் வெளி
நாடுகளான சீனா, சிங்கப்பூரில் நடைபெற்ற கண்
காட்சிகளிலும் என் ஓவியங்கள் இடம்பெற்றன.
-
படிக்கிற குழந்தைகளுக்கு உதவி செய்யிறீங்களாமே?
-
1998 வரைக்கும் புனேவில் இருந்தேன். பண்டிகைக்
காலங்களில் அங்குள்ள கருணை இல்லங்களுக்குச்
சென்று இனிப்பு, புத்தாடைகள் கொடுப்பேன்.
சொந்த ஊருக்கு வந்தபிறகு அருகேயுள்ள செட்டிக்
குளத்தில் இயங்கிவரும் குருகுலப் பள்ளிக்குப்
பண்டிகைக் காலங்களில் என்னாலான உதவிகளைச்
செய்து வருகிறேன். கல்வியில் மேற்படிப்புப் படிக்கவும்
உதவி செய்து வருகிறேன்.
-
---------------------------------------------

- எம்.எஸ். மதுக்குமார்.(கல்கி)

by **கவியருவி ம. ரமேஷ்** Thu Jul 17, 2014 12:52 pm

திறமையைப் போற்றுவோம்... வளர்ப்போம்

வித்யாசாகரின் எழுத்து பயணம்

தமிழ் அறிஞர்களின் மின்நூல்கள் - யாழ்பாவாணன்

வாய் பேசும் ஓவியம்!

வாய் பேசும் ஓவியம்!

Re: வாய் பேசும் ஓவியம்!