பெண்மை

by ஜான் விக்டர் Tue Aug 12, 2014 8:30 pm

பெண்ணாய் இருத்தலின் அழகினை வெறும் வார்த்தைகளால் மட்டும் விவரித்தால் இக்கட்டுரை சிறப்புறாது.பின் எப்படிதான் சொல்வது 'பெண்ணின் பெருமையை' என யோசித்தபோது வாழ்க்கையின் வழியாய் விவரிக்கலாமே! என தோன்றியது.ஆம்,அதுதான் சரியெனப்பட்டது.என் மனதில் நின்ற அந்த மூன்று பெண்களின் வாழ்க்கை மூலமாய் பெண்மையின் சிறப்பைக் கூறுகிறேன்.அம்மூவரும் வெவ்வேறு காலக்கட்டத்தைச் சேர்ந்தவர்களானாலும் ஒரே நேர்கோட்டில் சந்தித்துக் கொள்கிறார்கள்.அதுதான் 'சேவை'.இதோ,அவர்களைப் பற்றிய என் பார்வையை இங்கு பதிவு செய்கிறேன்.

போர்க்களம் - பல்லாயிரக்கணக்கான வீரர்கள் வீழ்ந்து கிடக்கின்றனர்.இரவில் ஒரு பெண் கைகளில் விளக்கை ஏந்தியபடி வருகிறார்கள்.இறந்துகிடக்கும் பிணங்களுக்கு மத்தியில் உயிருக்குப் போராடிக்கொண்டிருக்கும் வீரர்களைக் கண்டுபிடித்து அவர்களைக் காப்பாற்ற வேண்டிய மருத்துவ உதவிகளைச் செய்கிறாள்.இப்படியாக பல வீரர்கள் அவளால் காப்பாற்றப்பட்டனர்.அந்தப் பெண் யார் தெரியுமா?"கை விளக்கேந்திய காரிகை" என அழைக்கப்பட்ட Florence Nightingale.அவளது அந்த சேவையால் வீரர்களின் இறப்பு சதவீதம் 42லிருந்து 2 ஆகக் குறைகிறது என ஊடகங்கள் பாராட்டுகின்றன.போரில் ஈடுபட்ட பல ஆண்களுக்கு அழிக்க மட்டுமே தெரிந்திருந்தது.ஆனால் அந்த பெண்ணுக்குத்தான் உயிர்களைக் காப்பாற்றத் தெரிந்திருந்தது.

ஒரு பெண் எந்த ஆணையும் மணக்கவில்லை.அவள் கரு ஒரு குழந்தையைக் கூட சுமந்ததில்லை.ஆனால் நாம் அவளை 'அன்னை'என அழைக்கின்றோம்.கருணையின் வடிவாய்த் திகழ்ந்த அன்னை தெரசாதான் அவள்.தேவைப்படும் மக்களுக்குக் கை கொடுப்பதற்காக தன் தாய்நாட்டை விட்டு அந்நிய தேசத்திற்கு வந்தாள் அவள்.ஆண்களில் எத்தனை பேருக்கு வரும் இந்த மனம்!அவளிடம் கொடுப்பதற்குப் பணம் இல்லை என்றாலும் மனம் இருந்தது.அதனால்தான் ஆதரவற்றோருக்காக வீதி வீதியாக கையேந்திச் சென்றாள்.ஏழைகளுக்காகத் தன் வாழ்க்கையையே அர்ப்பணித்த அவள் உண்மையிலேயே அன்பின் அடையாளம்தான்.

Joan of Arc - தன் தேசத்திற்காக இன்னுயிரையும் ஈந்த தியாக மங்கை.தன் நாட்டை ஆக்கிரமித்த எதிரிகளிடம் இருந்து விடுவிக்க போராடத் துவங்கினாள்.ஒரு வீரனைப் போல முன்னின்று போர்ப்படையைத் தலைமையேற்று நடத்திச் சென்றாள்.சில வெற்றிகள் பெற்ற அவள் இறுதியில் எதிரிகளிடம் சிக்கிக் கொண்டாள்.அத்தனை இளம் வயதில்(19) தீக்கிரை ஆக்கப்பட்டாள்.அவள் உயிர் அன்று பிரிந்திருந்தாலும் அவளுடைய வீரமும்,தியாகமும் இன்றும் பலரால் நினைவு கூரப்படுகிறது.

உயிர்களைக் காக்க தன் தூக்கம் இழந்தாள் Florence Nightingale.ஆதரவற்றோரை அணைக்க தன் தேசம் இழந்தாள் Mother Teresa.தன் தேசம் காக்கத் தன்னையே இழந்தாள் Joan of Arc.கருணை,அன்பு,தியாகம்,தேசப்பற்று,வீரம் ஆகியவற்றால் உலகை வியக்க வைத்த இவர்களிடம் பெரிதாய் எதுவும் இல்லை 'பெண்மையை'த் தவிர!அதனால்தான் பாரதி சொன்னானோ "மாதராய்ப் பிறந்திட மாதவம் செய்திடல் வேண்டும்" என்று!

அருமையான கட்டுரை, பகிர்வுக்கு நன்றி நண்பரே, ஜான் விக்டர்

வித்யாசாகரின் எழுத்து பயணம்

தமிழ் அறிஞர்களின் மின்நூல்கள் - யாழ்பாவாணன்

பெண்மை

பெண்மை

Re: பெண்மை