பூக்காடே வாபக்கம் பூத்து

by **karumalaithamizhazhan** Thu Oct 30, 2014 8:46 pm

பூக்காடே   வாபக்கம்   பூத்து
பாவலர் கருமலைத்தமிழாழன்

பாக்காடு    போல்பேசிப்    பாவங்கள்   கண்காட்டி
சாக்காடு    கொண்டிடவே    சார்ந்திட்டாய் – தூக்கமின்றி
வேக்காடு   நெஞ்சேற    வேதனையில்    வாடுகின்றேன்
பூக்காடே    வாபக்கம்   பூத்து !

கெண்டை    பிறழ்கின்ற    செவ்வரிக்    கண்களிலே
வண்டை    அனுப்பி    வளைத்திட்டாய் – தண்மதியே
ஏக்கத்தில்    வெந்துழலும்    என்நிலையைப்    போக்குதற்குப்
பூக்காடே    வாபக்கம்    பூத்து !

முத்துச்    சரத்தில்    முறுவலினைக்    காட்டியென்
சித்தங்    கலங்கிடவே    செய்திட்டாய் – புத்தமுதே
தேக்குச்    சிலையேயுன்    தேனிதழில்    முத்தமிடப்
பூக்காடே    வாபக்கம்    பூத்து !

சேலத்து    மாம்பழமாய்ச்    சேர்ந்தினிக்கும்    கன்னத்தின்
கோலத்தில்    என்னுயிரைக்    கொள்ளையிட்டாய் – தாளமாய்
வாக்கெல்லாம்    உன்பெயரே    வாழத்    துணையாகப்
பூக்காடே    வாபக்கம்   பூத்து !

குத்திட்டு    நிற்கின்ற    கூர்முனைக்    கொங்கையிலே
கொத்திட்டாய்    நெஞ்சைக்    குறிவைத்து – பித்தனாய்
ஆக்கிட்டாய்    உன்நினைவில்    அல்லும்    பிதற்றுகின்றேன்
பூக்காடே    வாபக்கம்    பூத்து !

ஆடும்    அரவத்தின்    அல்குலைப்    பெற்றவளே
பாடும்    குயில்குரல்    பாவையே – நாடுகிறேன்
போக்கிடுவாய்   என்காமம்   பேரின்பம்   நாம்பெறுவோம்
பூக்காடே   வாபக்கம்   பூத்து !

வித்யாசாகரின் எழுத்து பயணம்

தமிழ் அறிஞர்களின் மின்நூல்கள் - யாழ்பாவாணன்

பூக்காடே வாபக்கம் பூத்து

பூக்காடே வாபக்கம் பூத்து

Re: பூக்காடே வாபக்கம் பூத்து