அறம் காக்க ஆர்த்தெழு

by **karumalaithamizhazhan** Sun Dec 27, 2015 6:38 am

அறம்காக்க ஆர்த்தெழுவோம்

பாவலர் கருமலைத்தமிழாழன்

மனுநீதி சோழனவன் பசுவிற் காக
----மகனையை கொன்றுநீதி அறத்தைக் காத்தான்
முணுமுணுத்த சொல்மாறிப் போன தாலே
----முறைதவறிப் போனதுயிர் என்றே தம்மின்
அணுவெல்லாம் துடித்திடவே பாண்டிய மன்னன்
----அறம்காக்க உயிர்துறந்தான் கண்ணகிக் காக
மனுபோட்டு மனுபோட்டே இன்று நீதி
----மன்றத்தைக் கேலிக்கூத்தாய் ஆக்கு கின்றார் !

வரம்தந்த சிவன்தலையில் கையை வைக்க
----வந்தவொரு அரக்கன்போல் வாக்க ளித்தே
அரசாட்சி தந்தயிந்த மக்கள் தலையில்
----ஆள்வோர்கள் கைவைத்தே அழிக்கும் போதும்
உரமின்றிக் கேட்பதற்கும் துணிவு மின்றி
----உயிர்க்கஞ்சி வாழ்கின்ற மக்கள் தம்மைக்
கரம்கொடுத்துக் காப்பதற்கு முன்வ ராமல்
----கயமைகளே கோலோச்ச பார்த்தல் நன்றோ !

அறம்கூறும் இலக்கியங்கள் பலவி ருந்தும்
----அறநூலாம் திருக்குறள்தாம் இங்கி ருந்தும்
மறத்திற்கும் அறம்வகுத்து மாண்பு காத்த
----மன்னர்கள் வரலாற்றைப் படித்தி ருந்தும்
புறமொதுக்கித் தன்னலத்துக் கரவு நெஞ்சால்
----பும்மைசெயல் செய்திந்த சமுதா யத்தில்
அறந்தன்னைக் கொல்பவரைத் தட்டிக் கேட்டே
---ஆர்த்தெழுவோம் அநீதியை அழிப்ப தற்கே !

நல்லவர்கள் ஒதுங்கிநின்று அறத்தை யின்று
----நடுத்தெருவில் துடிக்கவிட்டுப் பார்ப்ப தாலே
வல்லவர்கள் அதைத்தம்மின் கையால் கொன்று
----வளர்க்கின்றார் அதர்மத்தைத் துணிவாய் நின்று
இல்லையென்னும் அறந்தன்னை இழுத்து வந்தே
---இங்கமர வைப்பதற்கே முயற்சி செய்தே
எல்லோரும் ஒன்றிணைந்தே துணிந்தெ ழுந்தால்
----எழில்அறம்தான் ஆட்சிசெய்ய வந்தி டாதோ !

[You must be registered and logged in to see this image.]

[You must be registered and logged in to see this link.]

வித்யாசாகரின் எழுத்து பயணம்

தமிழ் அறிஞர்களின் மின்நூல்கள் - யாழ்பாவாணன்

அறம் காக்க ஆர்த்தெழு

அறம் காக்க ஆர்த்தெழு