-
குஜராத்தில் அடுத்த சில தினங்களில் மிகப் பெரிய தொடர் 
குண்டு வெடிப்பு தாக்குதலை நிகழ்த்த திட்டமிட்டிருந்த 
2 பேரை அந்த மாநில பயங்கரவாதத் தடுப்புப் பிரிவு போலீஸார் 
கைது செய்தனர்.

இதனால், மிகப் பெரிய அசம்பாவிதம் தவிர்க்கப்பட்டுள்ளது.

கைது செய்யப்பட்ட இருவரும் ஐ.எஸ். பயங்கரவாத அமைப்புடன் 
தொடர்பு வைத்திருந்ததும் தெரியவந்துள்ளது.

இதுகுறித்து பயங்கரவாதத் தடுப்புப் பிரிவு துணைக்
 கண்காணிப்பாளர் கே.கே.படேல், ராஜ்கோட்டில் 
செய்தியாளர்களிடம் ஞாயிற்றுக்கிழமை கூறியதாவது:

ராஜ்கோட் மாவட்டத்தில் வசித்துவரும் வாஸிம், பாவ்நகர் 
மாவட்டத்தில் வசித்துவரும் அவரது சகோதரர் நயீம் ரமோடியா 
ஆகிய இருவரின் செயல்களில் மாற்றம் ஏற்பட்டிருப்பதாக 
ரகசியத் தகவல் கிடைத்தது. அதன்பேரில், அவர்கள் இருவரின் 
செயல்பாடுகளையும் கடந்த 3 மாதங்களாக கண்காணித்து
 வந்தோம். 

அப்போது, அவர்கள் இருவரும் சமூக வலைதளங்களான முகநூல், 
ஸ்கைப், கட்செவி அஞ்சல் (வாட்ஸ் அப்), சுட்டுரை (டுவிட்டர்) 
ஆகியவற்றின் மூலம் ஐ.எஸ். அமைப்புடன் தொடர்பில் இருந்தது 
தெரிய வந்தது.

அவர்கள் இருவரும் ஏதோ நாச வேலையில் ஈடுபடப் போகிறார்கள் 
என்ற சந்தேகம் எங்களுக்கு சமீபத்தில் எழுந்தது. இதையடுத்து, 
அவர்களின் இல்லங்களில் ஞாயிற்றுக்கிழமை அதிரடிச் சோதனை
 நடத்தினோம். 

அப்போது, வெடிகுண்டு தயாரிக்கப் பயன்படுத்தப்படும் பொருள்கள், 
முகமூடிகள், ஐ.எஸ். கொள்கைகள் அடங்கிய கோப்புகள் உள்ளிட்ட 
பல்வேறு பொருள்கள் கைப்பற்றப்பட்டன. இதனைத் தொடர்ந்து, 
அவர்களை கைது செய்தோம்.

அடுத்த சில தினங்களில் சுரேந்திரநகர் மாவட்டத்தில் உள்ள 
சோட்டிலா போன்ற சில கோயில் நகரங்களில் தொடர் குண்டு 
வெடிப்புத் தாக்குதலை நிகழ்த்த அவர்கள் திட்டமிட்டிருந்தது 
விசாரணையில் தெரியவந்துள்ளது.
-
----------------------------------------
தினமணி