யாசகம் - சிவ.சூரியநாராயணன்.

by **அ.இராமநாதன்** Mon Mar 06, 2017 12:16 am

மகன்மகளைப் பெற்றளித்த தாய்தான் இன்று
   வயிறார உணவின்றி வீதி வந்து
முகம்பார்த்துக் கண்ணிரண்டால் கெஞ்சிக் கொண்டு
   முன்நீளும் கரமிரண்டும் நடுங்கி நிற்க
அகம்நிறைய ஆரிடுவார் அமுதம் என்றே
   அலைகின்றார் ஊரெங்கும் ஓய்வும் இன்றி,
சகந்தன்னில் ஓர்வயிறே எரிந்தா லுந்தான்
   சகத்தினையே எரியென்றான் தமிழன் அன்று!

மயிர்நீப்பின் வாழாத மானைப் பற்றி
    வள்ளுவமும் பலபடவே பேசிப் போகும்!
வயிறிருக்கும் உயிர்க்கெல்லாம் சோற்றை ஈயும்
    வள்ளண்மை இல்லாத நிலையைக் கண்டு
கயிறிருக்கும் எமனொருநாள் படைத்தான் தன்னைக்
   கட்டையிலே கொண்டேகச் சாபம் ஈயும்!
பயிற்றுவித்த பத்தெல்லாம் பசியின் முன்னே
   பகலோன்முன் பனியெனவே மறைந்து போகும்!

கணமெல்லாம் குடலதனைக் குடலே தின்னும்!
   கடகடெனக் கண்ணிரண்டும் கடலாய் மாறும்!
பணமென்னும் பேர்பெற்ற பொருளில் லாதோர்
   பசியாலே புழுவெனவே துடித்துப் போவர்!
குணமென்னும் குன்றேறி நிற்கும் பண்பு
   குவலயத்தை விட்டெங்கோ ஓடிப் போக,
பிணமென்னும் நிலையதனை அடைதல் கூட
   பேறெனவே எமதுள்ளம் ஏங்கிச் சாகும்!

ஆணிப்பொன் ஊசலிலே ஆடிப் பாடி
    அமரர்போல் வாழ்ந்திருப்பர் செல்வர் கோடி!
மாணிக்கம் வைரங்கள் இடையில் கட்டி
    மணம்வீசும் மலர்போல மக்கட் செல்வம்
காணக்கண் கூசச்செய் ஒளியின் வெள்ளம்
   காட்டுகின்ற மாமனையில் வளரும் நன்றாய்!
பூணப்பொன் பட்டாடை வண்ணம் கோடி
   பொதியமென நிறைந்திருக்கும் வீட்டில் எங்கும்!

திரையிருக்கும் சித்திரம்போல் எம்தே கம்மேல்
    தினம்சதையைச் சதையேதான் தின்றி ருக்கும்!
நரையிருக்கும் முடைநாற்றப் பிசுக்கி ருக்கும்!
   நடுக்கிருக்கும் நரம்பெல்லாம் புடைத்தி ருக்கும்!
அரையிருக்கும் பள்ளத்தில் ஆடை என்றே
அசைகந்தல் மானத்தை மறைத்தி ருக்கும்!
இரையிருக்கும் இடந்தேடி ஏக்கம் கொண்டே
   இழிவிலங்காய் இரந்துண்ணத் தோன்றும் தோன்றும்!

ஏசுகின்ற மக்கள்நீர் எம்மைப் பார்ப்பீர்!
   இனியிழக்க எம்மிடமே ஏதும் இல்லை!
யாசகத்தை இழிவாகச் சொல்லும் கூட்டம்
   எம்மைப்போல் ஓர்நாளே இருந்தாற் போதும்!
மாசகத்தில் இல்லாமல் வாழும் நாங்கள்
   மரணிக்கும் வழியறியா மாக்கள் என்னும்
வாசகத்தை நெஞ்சில்நீர் வைத்துக் கொண்டு
   வாழவொரு வழிசெய்வீர் எமக்கெல் லாமே
-
நன்றி- விதைமணி

வித்யாசாகரின் எழுத்து பயணம்

தமிழ் அறிஞர்களின் மின்நூல்கள் - யாழ்பாவாணன்

யாசகம் - சிவ.சூரியநாராயணன்.

யாசகம் - சிவ.சூரியநாராயணன்.