ஊத்துக்கோட்டை,

சென்னை நகர மக்களின் குடிநீர் தேவையை நிறைவேற்ற
தமிழக அரசு ஆந்திர அரசுடன் 1983–ம் ஆண்டு கிருஷ்ணா
நதி நீர் பங்கீடு திட்டத்தை வகுத்தது. அதன் பேரில் ஆந்திர
அரசு நெல்லூர் அருகே உள்ள கண்டலேறு அணையில் இருந்து
பூண்டி ஏரிக்கு ஆண்டு தோறும் 12 டி.எம்.சி. தண்ணீர் வழங்க
வேண்டும்.

ஜனவரி மாதம் முதல் ஏப்ரல் மாதம் வரை 8 டி.எம்.சி. தண்ணீர்,
ஜூலை மாதம் முதல் அக்டோபர் மாதம் வரை 4 டி.எம்.சி.
தண்ணீர் என்று 12 டி.எம்.சி. தண்ணீர் வழங்க வேண்டும்.

இதற்காக கண்டலேறு அணையில் இருந்து பூண்டி ஏரி வரை
177 கிலோ மீட்டர் தூரம் வரை கிருஷ்ணா நதி கால்வாய்
அமைக்கப்பட்டது. இந்த கால்வாய் ஆந்திராவில் 152 கிலோ
மீட்டர், தமிழக எல்லையான ஊத்துக்கோட்டை தாமரைகுப்பம்
ஜீரோ பாயிண்டில் இருந்து பூண்டி ஏரி வரை 25 கிலோ மீட்டர்
தூரம் செல்கிறது.

1984–ம் ஆண்டு கால்வாய் வெட்டும் பணிகள் தொடங்கப்பட்டு
1995–ம் ஆண்டு முடிக்கப்பட்டது. 1996–ம் ஆண்டு முதன்
முதலில் கண்டலேறு அணையில் இருந்து பூண்டி ஏரிக்கு தண்ணீர்
திறக்கப்பட்டது. இந்த நிலையில் ஊத்துக்கோட்டை அருகே உள்ள
மயிலாப்பூர் பகுதியில் கிருஷ்ணா நதி கால்வாயில் மண் அரிப்பு
ஏற்பட்டு வந்தது.

கடந்த 2 மாதங்களுக்கு முன் இதே போல் மண் அரிப்பு ஏற்பட்டது..
பொதுப்பணித்துறை அதிகாரிகள் எப்போதும் போல பொக்லைன்
எந்திரங்களை கொண்டு அரிப்பு மணலை அகற்றினர்.
10 நாட்களுக்கு முன்னர் மீண்டும் மண் அரிப்பு ஏற்பட்டது.

மண் அரிப்பு சம்பவங்கள் தொடராமல் தடுக்க பொதுப்பணித்
துறை அதிகாரிகள் முடிவு செய்தனர். இதற்காக இஸ்ரேல் நாட்டின்
பாலங்கள் சீரமைப்பு நிபுணர்கள், நதிகள் இணைப்பு மற்றும்
கட்டிட நிபுணர்களின் ஆலோசனைகளை பெற்றனர்.

அதன்படி தற்போது மண் அரிப்பு ஏற்பட்ட பகுதியில் நவீன
தொழில்நுட்பத்துடன் ராட்சத கான்கிரீட் தடுப்பை கொண்டு
கால்வாய் சீரமைப்பு பணிகள் மேற்கொள்ளப்படுகிறது.

இந்த மாத இறுதியில் சிரமைப்பு பணிகளை முடிக்க
உத்தேசிக்கப்பட்டுள்ளதாக அதிகாரிகள் தெரிவித்தனர்.
-
--------------------------------
தினத்தந்தி