» ‘பாதியில் முறிந்த பயணம்’- கவிதைகள்!

by **அ.இராமநாதன்** Sun Sep 30, 2018 11:30 pm

**

உலக வாழ்க்கையே
ஒரு பயணம் தான் !
உனக்கான வாழ்க்கைப்
பயணம்
பாதியில் முறிந்தது என்று
பயணத்தை முடித்துக் கொள்ளாதே !
-
எதிர்பாராமல் நிகழும்
ஏதாவுதொரு தடங்கலால்
திசை மாறும் பயணம் உண்டு !
திருப்பங்கள் தரும் தருணமும் உண்டு !
பார்வையும் பாதையும் மாறினாலும்
பயணங்கள் என்றும் முடிவதில்லை.!
-
பாரினில் பயணிக்க பாதை
பல உண்டு என்பதால்
புதியதோர் பாதை தேர்ந்தெடு !
புதியதோர் பயணம்தொடங்கு!இலக்கு
கொண்டு பயணிக்கையில்
இடையே இடர் பல வருவதுண்டு !
-
இடறி விழாமல் பயணிக்க
இதயமதில் நம்பிக்கை கொள்
மனிதா ! முன்னேறும் எண்ணமதில்
திண்ணமாயிருந்தால்
முடிவில் கிடைப்பது வெற்றியே !
-
-----------------------
- ஜெயா வெங்கட்

by **அ.இராமநாதன்** Sun Sep 30, 2018 11:32 pm

**

அகத்தேடலின் ஒரு பயணம்.
தேடுதல் துறக்கவும் தேடிய‌ பயணம்.
பயணப்பட்டோம்..
-
பெரும் குன்றுகள்..
நடுங்கவைக்கும் பள்ளங்கள்..
சிரிக்கும் சிற்றோடைகள்..
சிறுவெளிச்சம்.. பெருமௌனம்..
கைப்பிடிக்கும் வழித்தடங்கள்..
-
உள்ளம் விரிக்கும் பரந்தவெளிகள்
சித்தன் மொழிகள் சிதறிக்கிடக்கும் காடு.
குன்றிலிருந்த சித்தனைத்தேடி வந்து
பாதியில் நின்றது பயணம்...
-
பெரும் மழை..
திசை மாறியது பயணம்..
கந்தலோடு கந்தலாய் நனைந்திருந்த‌
வழிப்போக்கன் வழித்துணை ஆனான்
கருப்பன் என்று பேர் சொன்னான்.
சித்தனையா தேடி வந்தீங்க ?
-
சித்தன் சிரிச்சதால பேய்மழையாப் பேயுது.
கருப்பட்டியும் கருஞ்சுருட்டும்
சித்தனுக்கு ஆகாத பொருளொன்னும்
எனக்கு வேண்டாத பொருளொன்னும்
எங்கிட்ட குடுத்துப் போங்க‌..
-
பேராசை பெருங்கோபம்
பெருந்தீனி பெருங்காமம்
பொய்பொரட்டு பொறணியெல்லாம்
சித்தனுக்கு ஆகாது
இந்தக் கருப்பனுக்கும் ஆகாது
எங்கிட்ட குடுத்துப் போனா
சித்தன்கிட்ட தந்துவிட்டு சொல்லிவெப்பேன்
-
சித்தனே வரச்சொல்லி உங்ககிட்ட சொல்லிவெப்பான்..
சித்தன் சிரிச்சதால பேய்மழையாப் பேயுது..
வந்த வழி சேர்த்துவிட்டு கருப்பன்
போன வழியே பாடிப்போனான்.
பயணம் பாதியிலே நின்றாலும்
வாழ்க்கையில்
பயணங்கள் என்றுமே முடிவதில்லை.
-
பிறகு
கருப்பட்டியும் கருஞ்சுருட்டும் சுமந்துபோன‌
பயணங்கள் அவ்வளவு..ஆனால்..
கருப்பனைக் காணவில்லை..
கருப்பனே சித்தனனால்
கண்ணுக்குத்தான் தெரிவானோ ?
-
---------------------------
- ரமேஷ் கோபாலகிருஷ்ணண்

by **அ.இராமநாதன்** Sun Sep 30, 2018 11:33 pm

**

செல்லும்வழி எல்லாம் சொல்லும் காதல்மொழி
வெல்லும் இந்த உலகையெல்லாம் போதைவிழி
கள்ளவிழும் பூக்கள் சொல்லும் காமன்மொழி
முள்சுமந்த காட்டில் என்ன மோகவழி?
-
ஆதியிலே வந்த திந்த ஆசை நெஞ்சம்
அன்புவழிப் பயணத்தில் எல்லாம் வஞ்சம்
பாதியிலே நின்றதடி பாழ்பட்ட பயணம்
பாடையிலே போகவைத்த போகத்தின் நயனம்
-
மலஜல மூட்டை ஒன்பதுவாய் ஓட்டை
மயக்கத்தில் ஏனிந்த மந்திரக் கோட்டை
கலகல எனவரும் வாழ்க்கை ஓடை
கடைசியில் மிஞ்சும் காலற்ற பாடை
-
யார் தொடங்கி வைத்ததிந்த பயணம்
எதைத் தேடிப் போகுதிந்த பயணம்
மார்தொடங்கி மண்முடியும் அவலத்தின் பயணம்
வடித்தெடுத்த பூமியிலே தேகம்கொளும் சயனம்
-
-------------------------------
- கவிஞர் மஹாரதி

by **அ.இராமநாதன்** Sun Sep 30, 2018 11:34 pm

**

பாதையறியா பயணங்கள் கூட முடிவுறும்!
மனிதன் மாண்பு தவறிய பயணம்
பாதியிலே முறியும்!
-
உணர்வறியா உறவினால் காதல் முறியும்!
மதிப்பறியா மனதினால் உறவு முறியும்!
கேடுகெட்ட மதியினால் நட்பு முறியும்!
சூட்சம புத்தியினால் சுற்றம் முறியும்!
-
வழியறியா பயணம் பல உண்டு வாழ்வில்!
அதை கடந்து சென்றால் வெற்றி!
தடுக்கி நின்றால் அனுபவம்!
சிலிர்த்து நின்றால் ஆர்வம்!
சோர்ந்து தங்கினால் தோல்வி!
முறிந்து போகும் பயணம் முற்றிடுவதில்லை!
-
சினம் காத்து, நாவடக்கி திட்பம் சரியாக அமைவின்
எப்பயணமும் நில்லா!
அப்படியேனும் நிற்பின்
அதற்கான விடை காலத்திடம் உண்டு!
கனியும் காலத்திடம் கணக்கும் உண்டு!
-
விடை நோக்கி காத்திருப்போம்!
-
---------------------------------
-இனிய தமிழ் செல்வா, ஓமன்

by **அ.இராமநாதன்** Sun Sep 30, 2018 11:34 pm

**

பயண மென்பதே ஒரு சுகம் தான் – அது
பாதியில் முறிந்தால் சோகம் தான்!
-
அயரா(து) உழைக்கும் சூரியன் போல
அன்றாடம் உழைத்தால் வெற்றி தான்!
-
பயிலும் பள்ளியில் பயணம் என்றே
பாதியில் முறிந்திடின் கவலை தானே!
-
துயிலா கடல லை நீரதனில் – பளிங்கு
நிலாவின் பார்த்தல் நல்ல மகிழ்ச்சியே!
-
வானில் பறந்திடும் பறவைப் போல
விண்ணில் பறந்திட வாய்ப்பு கிட்டின்
கானம்பாடி மகிழ்ந்தால் மறுப்பு சேதி
காதில் விழுந்து விட்டால் கவலையே!
-
----------------------
- கவிஞர் கே. அசோகன்

by **அ.இராமநாதன்** Sun Sep 30, 2018 11:35 pm

**

இலையுடன் பனியின் பயணம்
வெயில் வரும் வரையே
செடியுடன் பூக்களின் பயணம்
அதை பறிக்கும் வரையே

அலையுடன் கரையின் பயணம்
தொட்டு செல்லும் வரையே
இரவுடன் பூமியின் பயணம்
பொழுது விடியும் வரையே

ரயில் சிநேகம் பயணம்
முடியும்வரையே
நட்பின் பயணம் நம்பிக்கை
உள்ள வரையே

இப்படி அனைத்துமே பாதியில்
முறிந்த பயணம் எனில்
நம்மை விண்ணுலகுக்கு
எடுத்து செல்லும்

இறப்பு மட்டும்
விதிவிலக்கா என்ன
அதுவும் நம் வாழ்விலிருந்து
பாதியில் முறிந்த பயணமே!!
-
---------------------
- பிரியா ஸ்ரீதர்

**

by Sponsored content

வித்யாசாகரின் எழுத்து பயணம்

தமிழ் அறிஞர்களின் மின்நூல்கள் - யாழ்பாவாணன்

» ‘பாதியில் முறிந்த பயணம்’- கவிதைகள்!

» ‘பாதியில் முறிந்த பயணம்’- கவிதைகள்!

Re: » ‘பாதியில் முறிந்த பயணம்’- கவிதைகள்!

Re: » ‘பாதியில் முறிந்த பயணம்’- கவிதைகள்!

Re: » ‘பாதியில் முறிந்த பயணம்’- கவிதைகள்!

Re: » ‘பாதியில் முறிந்த பயணம்’- கவிதைகள்!

Re: » ‘பாதியில் முறிந்த பயணம்’- கவிதைகள்!

Re: » ‘பாதியில் முறிந்த பயணம்’- கவிதைகள்!