**
முதல் கோப்பைக் காப்பியுடன்
தொடங்கும் விடியலில்
முழுவதுமாக நிறைவதில்லை
மனது.
இரண்டாவது கோப்பைக்கான
இடைவெளியில்
உண்ணுவதற்கு எத்தனையோ
உணவிருந்தும்
மணக்கும் காப்பி யையே
மனம் விரும்புவது 
பழக்கமாய்ப் போனது .
பல முறை காப்பி
பருகுவது
உடலுக்கு கேடு என
உணவு ஆராய்ச்சியாளர்கள்
உரைத்தாலும்
ஃபில்டர் காப்பியின்
மணத்திற்கும்
நிறத்திற்கும்
மயங்காதவர் உண்டோ எம்
மண்ணில் !
களிப்பு என்றாலும்
கவலை ஏற்பட்டாலும்
தலை வலி என்றாலும
தடங்கல் வந்தாலும்
உடலும் உள்ளமும்
சட்டென்று
விரும்புவதென்னவோ
ஒரு கோப்பை காப்பி யைத்தான் !

- கே.ருக்மணி, கோவை

**
அருந்துதற்கு இனியதுதான் நல்ல காப்பி
……….அதைப்பற்றி சிறிதுநேரம் சிந்திப் போமே.!
ஒருசெடியை ஊன்றிவளத் துமர மாக்க
……….ஓராயிர லிட்டர்தண் ணீரும் வேண்டும்.!
உருவிலது பெரிதாகி காயும் காய்க்க
……….உழைப்போடு தண்ணீரும் அதிகம் தேவை.!
ஒருகோப்பைத் காப்பிக்குள் ஒளிந்தி ருக்கும்
……….உண்மையிது என்பதுவே வியக்க வைக்கும்.!

பிரச்சாரம் செய்வதற்கு இடையே நீங்கள்
……….பிரியமாக அருந்துகின்ற பானம் தேனீர்..!
தரமாகச்  செயல்களையே செய்ய காப்பி
……….தைரியத்தைக் கூட்டுமென மனம்நி னைக்கும்.!
சுரப்பிகளும் நன்றாக வேலை செய்ய
……….சுகந்தருமோர்ப் பானம்தான் சொல்வ துண்டு.!
இரண்டாவ துகோப்பையைநீர் குடிக்கு முன்னே
……….இதையெல்லாம் நினைப்பீரே இயற்கை பற்றி.!

வரமாக இயற்கைதந்த நல்வ ளத்தை
……….வரம்பின்றி அழிப்பதற்கும் அளவு மில்லை.!
உரம்போட்டு வளர்க்கின்றார் செடியை யின்று
……….உள்ளத்தில் நல்லெண்ணம் என்ப தில்லை.!
வரப்போகும் துன்பத்தை அறிந்தும் முன்பே
……….வேண்டுமென்றே செய்விப்ப துமநி யாயம்..!
இரசாய னமில்லாத உணவுப் பண்டம்
……….இன்றைக்கு இருக்கிறதா நீரே சொல்லும்.!

கவிஞர் பெருவை பார்த்தசாரதி

**
இரண்டாவது கோப்பை எதிர்பார்ப்பது தவறு 
எல்லோருக்கும் ஒரு கோப்பை என்பதே சரி !

தமிழகம் வந்தபோது காந்தியடிகளுக்கு 
தாகம் தணிக்க இளநீர் வழங்கினார்கள் !

குடித்துவிட்டு சுவையாக உள்ளது என்றார் 
காந்தியடிகளுக்கு மற்றொரு இளநீர் தந்தனர் !

காந்தியடிகள் வாங்க மறுத்து விட்டார் 
காரணம் என்ன ? என்று கேட்டார்  தந்தவர் !

மற்றுவருக்கான இளநீரை நான் குடிப்பது 
முறையன்று நியாயம் அன்று என்றார் !

இயற்கையின் வளத்தை ஒருவரே 
இனிதே அனுபவிப்பது தவறு என்றார் !

வள்ளுவர் வழியில் பகிர்ந்துண்டு வாழ
வழி சொன்னவர் நமது அண்ணல் !

ஒருவருக்கு ஒரு கோப்பை என்று முறையாக 
ஒவ்வருவருக்கும் வழங்கிடும் வேளையில் !

ஒருவர் மற்றும் இரண்டாவது கோப்பை 
ஒருபோதும் கேட்கக் கூடாது உணர்க !

நாகரிகம் அருந்துவதிலும் வேண்டும் 
நாகரிகமன்று இரண்டாவது கோப்பை !

ஆர்வமாய்  கேட்கும் இரண்டாவது கோப்பை 
அடுத்தவருக்கானது என்பதை அறிந்திடுக !

யாரும் காணவில்லை என  இரண்டாவது கோப்பை 
யாசிப்பதை உங்கள் மனசாட்சி தடுக்க வேண்டும் !

ஒரு கோப்பை போதும் என்று திருப்தி கொள்க
ஒவ்வருவருக்கும் வேண்டும் நினைவில் கொள்க !

- கவிஞர் இரா .இரவி

**
தேனீர் - முதல் கோப்பைக்கே வழியில்லாதபோது
இரண்டாவது கோப்பைக்கு ஏங்க முடியுமா - ஏழை

மது - முதல் கோப்பைக்கே உடல் நலத்திற்கு கேடு விளையும்போது
இரண்டாவது கோப்பைக்கு ஏங்கும் - மதுப்பிரியர்

விஷம் - முதல் கோப்பையே உயிரை கொல்லும்போது
இரண்டாவது கோப்பைக்கு ஏங்கமுடியமா - தற்கொலையாளி

அமிர்த்தம் - முதல் கோப்பை கிடைத்தபோது
இரண்டாவது கோப்பைக்கும் ஏங்கும் - பேராசைக்காரர்

மருந்து - முதல் கோப்பையிலேயே முகத்தை சுழித்தபோது
இரண்டாவது கோப்பைக்கு மறுக்கும் - நோயாளி

பால்  - முதல் கோப்பையிலேயே வயிறு நிறம்பும் போது
இரண்டாவது கோப்பைக்கு போக்கு காட்டும் - குழந்தை

தண்ணீர் - முதல் கோப்பை கிடைத்தபோது
இரண்டாவது கோப்பை மட்டுமல்லாது 
பல கோப்பைகளை சேகரித்து வைக்கும் - பொதுஜனம்

மழை நீர் - உயிர்நீர், தண்ணீர் - உயிர்நீர்
குடிநீர் - உயிர்நீர் - உயர்நீர்

மழைநீர் - முதல் கோப்பையிலிருந்து அனைத்தையும் சேகரிப்பும்
உலகை காப்போம், வனத்தை காப்போம், சுற்றுச்சூழலை காப்போம்

- ஆம்பூர் எம். அருண்குமார்.

**

பச்சை வண்ண நிறம் படந்திருந்த
ஒரு தேநீா் கடையினுள்
உன் வருகை நோக்கி காத்திருக்கின்றேன் 
இரு கோப்பை தேநீருடன்...

குளத்துநீாில் கை கால் நனைத்து 
அலம்பும் குழந்தையின் மனதாய் நான் 
குதுகலிக்கிறேன்  

இரண்டாவது கோப்பையில் தேநீா்
 அருந்துகையிலே

மனிதர்கள் வழிபடும் பஞ்சபூதங்களும் அடங்கும்
என் இரண்டாவது கோப்பை தேனீரில்

குழந்தைகள் தேநீா் அருந்துகையிலே 
பொம்மைகளுக்கும்
இரண்டாவது கோப்பையில் தேநீா் ஊற்றியது

தேயிலையைப் பறித்து பறித்து கைசிவந்த 
தேயிலை விவசாயின் துயரம் தெரியுமா 
இரண்டு கோப்பை தேநீாில்...?

குரு சுரேஷ்.ப, குரோம்பேட்டை

**
முள் முளைத்த மூளைகளுக்கு நடுவே 
மூலதனம் முளைத்த மூளைக்கு 
சொந்தக்காரரான 
காரல்மார்க்ஸோடு
தேனீர் அருந்த 
இரண்டாவது கோப்பையோடு 
காத்திருக்கிறேன்.

வாழ்கையின் எல்லாத் திசையிலிருந்தும்
துன்பக் காற்று
துரத்தி அடித்தாலும் 
அடிபெயரா இமயமாக இருந்து 
கம்யுனிச சித்தாந்தம் வடித்த 
மன வலிமையோடு உரையாட
இரண்டாவது கோப்பையோடு 
காத்திருக்கிறேன்.

பள்ளியில் பரீட்சைத் தாளே
அறிஞர்கள் வியக்கும் 
ஆய்வுக் கட்டுரையான 
அதிசயத்தைப் பற்றி பேச
இரண்டாவது கோப்பையோடு 
காத்திருக்கிறேன்.

உலகின் மிகப் பெரிய நூலகத்தை
அதிக நேரம் பயன்படுத்தி
சேமிக்கப்பட்ட உழைப்பே மூலதனம்
என்ற மாமனிதரோடு உரையாட 
இரண்டாவது கோப்பையோடு 
காத்திருக்கிறேன்.

பணக்காரப் பெண்ணை  
ஏழை கதாநாயகன் 
காதலித்து கரம் பிடிக்கும் 
பெரும்பாலான தமிழ் சினிமாவிற்கு
கதை தந்த வாழ்க்கைக்கு 
சொந்தக்காரரோடு உரையாட 
இரண்டாவது கோப்பையோடு
காத்திருக்கிறேன்.

பொருளாதாரப் பிரச்சினையோடு போராடினாலும்
சம்சாரத் தோடு அன்பாய் வாழ்ந்த 
ரகசியத்தைப் பற்றி தெரிந்துகொள்ள
இரண்டாவது கோப்பையோடு
காத்திருக்கிறேன்.

ஏக்கத்தோடு காத்திருக்கிறேன்
ஏங்கல்ஸ் பற்றி அறிந்து கொள்ளவும்
நீ எழுதிய போது புகைத்த 
சுருட்டைகூட சம்பாதிக்காத எழுத்தையும் 
தொடர்ந்து எழுதிய 
நம்பிக்கை மனிதரோடு உரையாட
இரண்டாவது கோப்பையோடு
காத்திருக்கிறேன்.
-கு.முருகேசன்

**
தேனீர் கோப்பைகள் இரண்டு எப்போதும் பயன்படுத்தப்படாமல் காட்சி அலமாரியில் இருக்கும்,
முதல் கோப்பையில் நாங்கள், இரண்டில் எங்களுடன் மகன்களும்,
உருவப் படங்கள் பொறிக்கப்பட்டு,
அன்பாக ஆதரவாக மிகவும் கவனிப்பவர்களாக தெரிந்தார்கள் - மகன்கள்,
இரண்டாவது கோப்பையில்,
உண்மையில் டாலர் விழுங்கி
பல்லாண்டுகளாகின,
பெரியவன் போன் செய்து பல மாதமாக, சின்னவனோ- ஹாய், டேக்கேர் என்று வாட்ஸா ப்பில் வசனிக்கிறான்,
இரண்டாவது கோப்பையில் மகன்கள் இப்போதும் முறுவலிக்கிறார் கள் அன்பாக, ஆதரவாக, 
நிஜத்தில் காணாமல் போயிருந்தார்கள்
டாலர் தேசத்தின் வரைபடத்திற்குள்

கவிதா வாணி, மைசூர்

**

ஒரு கோப்பை காப்பியில்
ஒன்றானோம் வாழ்வில்..!
நன்றாகத்தான் 
சென்றாலும்..
நமக்குள் ஏதோ ஒன்று 
நம்மை நம்மிடமிருந்து
வேறுபடுத்திக் காட்ட..
மாறுபாடோடு மறுகிக் கிடப்பதுவும் ஏன்?
காலயந்திரம் ஒன்றும் வரப்போவதில்லை
கடந்த காலத்திற்கு கொண்டு போக!
காதலித்த காலத்தை 
கொணர்வோம் மீண்டும்..!
உணர்வோம் ..
நமக்கு நாமேயென்று..!
இதழ் சிரிப்புடன்
இதயம் நீ 
என்னோடு வருவாயோ?
இரண்டாவது கோப்பைக்கு..!

கவுதம் கருணாநிதி, திருச்சூர், கேரளா