காலிஃப்ளவர் மிளகு வறுவல்

by **அ.இராமநாதன்** Sun Sep 01, 2019 12:08 am

கிச்சன் கீர்த்தனா: காலிஃப்ளவர் மிளகு வறுவல்

மழைக்காலங்களில் நோய் எதிர்ப்பு சக்தியை அள்ளித் தரும் உணவுகள் உட்கொண்டால் ஜில் மழையில் சொட்டச் சொட்ட நனைந்தாலும் குட்டித் தும்மல் கூட எட்டிப் பார்க்காது. அடர் பச்சை நிற காய்கறிகள் மற்றும் ஆரஞ்சு நிற பழ வகைகள், முட்டைக்கோஸ், காலிஃபிளவர், கேரட், பீட்ரூட் ஆகியவை நோய் எதிர்ப்பு சக்தியை அதிகரிக்கும். இந்த காலிஃப்ளவர் மிளகு வறுவல் மழைக்கு இதமளிக்கும் சூப்பர் சைடிஷாக அமையும்.

என்ன தேவை?

காலிஃப்ளவர் - ஒரு கப்

பெரிய வெங்காயம் – ஒன்று (பொடியாக நறுக்கவும்)

பச்சை மிளகாய் – ஒன்று (பொடியாக நறுக்கவும்)

கறிவேப்பிலை - சிறிது

இஞ்சி பூண்டு விழுது - ஒரு டேபிள்ஸ்பூன்

எலுமிச்சைச்சாறு – ஒரு டீஸ்பூன்

மிளகுத்தூள் - ஒரு டீஸ்பூன்

மிளகாய்த்தூள் - அரை டீஸ்பூன்

மல்லித்தூள் – ஒரு டீஸ்பூன்

சீரகத்தூள் - கால் டீஸ்பூன்

கரம் மசாலாத்தூள் - கால் டீஸ்பூன்

மஞ்சள் தூள் - கால் டீஸ்பூன்

உப்பு, எண்ணெய் - தேவையான அளவு

எப்படிச் செய்வது?

முதலில் பூவைத் தனித்தனியாகப் பிரித்து தேவையான அளவில் நறுக்கிக் கொள்ளவும். பின் ஒரு பாத்திரத்தில் தண்ணீர் ஊற்றி நன்கு கொதித்ததும் நறுக்கிய பூவைப் போட்டு உப்பு சிறிது போட்டு ஒரு கொதிவந்ததும் அடுப்பை அணைத்து இரண்டு நிமிடங்கள் மூடி போட்டு மூடி வைக்கவும். அதன் பின் பூக்களைக் கவனமாக புழு எதுவும் இல்லாமல் தனித்தனியாக கரண்டியால் எடுத்து தனியாக வைக்கவும். வாணலியில் எண்ணெய்விட்டு காய்ந்ததும் மிதமான சூட்டில் வைத்து சீரகம் சேர்த்து தாளித்து அதில் நறுக்கிய வெங்காயம் சேர்த்து வதக்கவும். லேசாக வதக்கிய பின் இஞ்சி பூண்டு விழுது சேர்த்து பச்சை வாசனை போனதும் பச்சை மிளகாய் சேர்த்து வதக்கி, கறிவேப்பிலை சேர்க்கவும். பின்னர் மிளகாய்த்தூள், மல்லித்தூள் கரம் மசாலாத்தூள், மஞ்சள்தூள், உப்பு சேர்த்து லேசாக வதக்கி ஒரு டேபிள்ஸ்பூன் தண்ணீர் விட்டு எண்ணெய் பிரிந்து வந்ததும் காலிஃபிளவர் சேர்த்து நன்கு கலந்து கிளறி விடவும். பின் மிளகுத்தூள் சேர்த்து கலந்து விட்டு இறக்கவும். விரும்பினால் எலுமிச்சைச் சாறு சேர்த்து கிளறி பரிமாறவும்.

இன்னும் சுவை கூட்ட, வெங்காயம் வதங்கியதும் நறுக்கிய தக்காளி ஒன்று சேர்த்து நன்கு வதக்கி பின் மசாலாத்தூள் சேர்த்துக் கொள்ளலாம்.

சிறப்பு

காலிஃப்ளவரில் ஆன்டி ஆக்ஸிடன்கள் நிறைந்துள்ளன. இது தசை வளர்ச்சிக்கு உதவுவதோடு நினைவாற்றலை அதிகரிக்கிறது. எலும்பு மெலிதல் பிரச்சினையைத் தாமதப்படுத்துகிறது. மன அழுத்தம், இதய நோய்களை குணமாக்குகிறது. புற்றுநோய் செல்களையும் கட்டுப்படுத்துகிறது. காலிஃப்ளவரில் வைட்டமின் கே, மற்றும் ஒமேகா உள்ளதால் உடலில் உள்ள நச்சுக்களை வெளியேற்றும். நோய் எதிர்ப்பு சக்தியை அதிகரிக்கும்.

வித்யாசாகரின் எழுத்து பயணம்

தமிழ் அறிஞர்களின் மின்நூல்கள் - யாழ்பாவாணன்

காலிஃப்ளவர் மிளகு வறுவல்

காலிஃப்ளவர் மிளகு வறுவல்